Yooma 84

1Pɛɛntɛɛnreba Na'ayenɛ wa, ho bɔŋa zen'an la ane la soŋa. 2Mam suunre boe la bilam. Mam suunre lo la Na'ayenɛ yire zenzaka la poan, te mam suunre la mam iŋa wa yoone mɛ la nyeema bɔta vom Yenɛ wa. 3Pɛɛntɛɛnreba Na'ayenɛ wa, mam Naba, la mam Yenɛ wa, laalehe tara gan'aregɔ zen'an, te amɔkeenha tara teko wɛkera a kɔma ko poan, hom kaanbegɔ zen'an la. 4Kan'an boe sɛba n boe hom yire poan la zuo. Saŋa woo ba pɛngera hom mɛ. 5Kan'an boe mɛ la sɛba paŋa n boe hom poan, la sɛba sunya en lo te ba keŋɛ Zion. 6Ban nɛɛre Baka bɔn'ɔn poan tɔla la, ba nɛ bahɛ te la lebege la bulehe, te sigisaahe me ni te bɔgɔhe gan'an ko poan. 7Ban kenɛ woo la, ba paŋa malom pa'ahera mɛ, gura te ba woo ta paɛ Zion Yenɛ la nɛŋan. 8Pɛɛntɛɛnreba Na'ayenɛ wa, Yenɛ wa, kelehe n sohoga. Yakob Yenɛ wa, wom n sohoga wa. 9Yenɛ, hom de tomam zaba tɛ'ɛlega, sure behɛ ho naba n sɔ' se'em la kaam wa. 10Hom zenzaka la poan bɔŋa daanyenɛ nyane zen'sɛka bɔŋa yuuma. Mam wan dɛna nayaŋa gura Yenɛ yire la poan nyane mam ta kɛn'ɛra toonfɛn'ɛhadoma yiya poan. 11Se'ere n sɔe la, Na'ayenɛ n de Yenɛ wa dela wontɛɛŋa, la zaba tɛ'ɛlega. Na'ayenɛ n nyɛte nɛra ninbaanlega, ge tɛbegera nɛra. A kan gu' yelesonɛ te de da sige sɛba n kene tontɔɔ la zuo na. 12Zaba nɛŋadaana wa, kan'an en dole se'em woo n dele hom.

will be added

X\