Yooma 83

1Yenɛ, da sina, da ana bala baanlam, da zɛ'a ge beha. 2Behɛ ho diŋdoma la en voole se'em na, sɛba n yaɛ hom la okore la ba mɛhe la hom. 3Ba nyanlene mɛ naara taaba zabera la hom nɛreba. Ba tare la diŋo la sɛba te hom nini gan'an ba poan la. 4Ba yele la taaba yeti, wa'an ya na te to sagom Israel wa bahɛ te a da le dɛna teŋa, te a yu'urɛ da le pota. 5Ba naɛ la taaba eŋɛ potɛn'ɛrɛ deyena lagom zabera. Ba naɛ la taaba zabera la hom: 6Edom la Ismael la Moab la Hagi la 7Gebal la Ammon la Amalek la Pilistia la Tire teŋhe zan'an, 8ta ta' la Asiria teŋa lagom la taaba te ba pa'ahɛ Lot yaahe paŋa. 9Eŋɛ ba wo hom eŋɛ Midiandoma la Sisera la Yabin se'em Kison kolaa la poan la. 10Ho sagom ba la Endor teŋa, te ba lebege teŋa la poan sɔgɔrɔ. 11Eŋɛ ba nadoma la wo Oreb la Zeeb la. Eŋɛ ba nabiihe wo hom eŋɛ Zeba la Zalmuna 12se'em n yele ba mɛhe yeti, to fan' Yenɛ bɔn'ɔrɔ wa sɔna la bala. 13Mam Yenɛ wa, eŋɛ ba wo kanlenkaan la, eŋɛ ba wo urugo te sabeeo kanra yɛ'a la. 14Wo bugum n taɛ mɔen dita se'em la, bii bugum peelom en wobele zɔya zuto se'em la, 15bahɛ te ho sunsunyiim ana bala digera ba. Vuunhe ba la sabeeo kanra. 16Bahɛ te nyanɛ di ba, te nɛresaaleba nyɛ bala ɛ hom Na'ayenɛ. 17Bahɛ te vi dita ba saŋa woo. Bahɛ te ba mɛlom la valom. 18Bahɛ te ba baŋɛ yeti, Hom se'em yu'urɛ n dela Na'ayenɛ. Hom ma'an n de Saazuo Daana teŋparɛ wa zuo.

will be added

X\