Yooma 81

1Yoon la nyeema bo Yenɛ se'ere n de tomam paŋa wa. Yoon la paŋa bo Yakob Yenɛ wa. 2Yoon yoonɛ. Ŋmɛ' senyagarɛ. Ŋmɛ' duureŋa la kɔnlɔgɔ la. 3Peebe peraa iilɛ tentanɛ la ŋmarepaalega, la ka peelega poan de'eŋɔ daarɛ la. 4La dela malema ze'ele bo Israel. La dela Yakob Yenɛ la nɔze'elego. 5Yenɛ ze'ele ze'elego wa bo la Yosef, se'em ma'an te Yenɛ zabɛ la Mizraim teŋa la, zen'an te to wom yetɔgom sebo te to ka wuna bɔ la. 6A yeti, Mam pakɛ zeero la ya zuin mɛ. Ya nu'uhe kan le ɔnbera pitɔ. 7Ya muguhego la poan te ya kaahɛ te mam fan' ya bahɛ. Mam lebehe ya mɛ la saa tanhega, saa saŋgbanɛ poan na. Ge dekɛ Meriba teŋa ko'om la makɛ ya behɛ. 8N nɛreba wa, kelehe ya, n kan'ane ya mɛ la ninmɔ'ɔrɛ. Hom Israel han wan kelehe ne. 9Da tara bagarɛ ho poan. Da pɔnta na'ma bɔ'ɔra bagɛ se'ere. 10Mam n de Na'ayenɛ ya Yenɛ, tare ya ze'ele Mizraim teŋa yehe na. Mam yele ya yeti, Ya yele mam yamam n bote sɛla ge n wan bahɛ te la seke ya. 11Ge mam nɛreba wa kan kelehe mam. Israel kan sigehe a mɛŋa bo mam. 12Bala te mam dekɛ ba bo ba sunkanberɛ la, te ba dɔla ba mɛhe etegɔ la. 13Mam nɛreba wa han wan kelehe ne mam. Israel han wan dole ne mam boolom. 14Mam wan ba'ahɛ ne ba diŋdoma wa wana kalam. N mɛŋa wan zabɛ ne ba diŋdoma wa. 15Sɛba n ka bote Yenɛ la lu gan'an la a nɛŋan. Ba sagaŋɔ ka tare ba'ahegɔ. 16Ge han dɛna yamam, n wan diihe ya la ki soma, ge bo ya taŋa poan seerom te ya di tegɛ.

will be added

X\