Yooma 78

1Nɛresaaleba, be'e ya toba kelehe mam pa'alegɔ. Kelehe ya mam nɔɔrɛ yelehom wa zan'an soŋa. 2N wan tara la magaha tɔgɔra bɔ'ɔra ya, ge lilige yelese'a n eŋɛ deemen deemen ha la vɔnrɛ pa'alɛ ya. 3Yele se'a te to wom ge mina, yelese'a te to yaabdoma pon yele to, 4to kan dekɛ a sogɛ ba kɔma, to wan mɔɔlɛ a bo buuri se'a n nan kene na la. To wan yele ba Na'ayenɛ toonsoma la a paŋa la a nyalematooma la te a tom la. 5A ze'ele la nɔze'elego Yakob buuri la pa'alegɔ boe Israel. Te a yuum bo to yaabdoma nɔɔrɛ te ba dekɛ pa'alɛ ba kɔma. 6Te buuri saŋa se'ehe n kene na la mini te bama me han ta zo'a na, ba me dekɛ a pa'alɛ ba kɔma. 7Te la bahɛ te ba tara potɛn'ɛrɛ Yenɛ poan, ge da tamɛ n tom toonse'a la, ge me dɔla en bo ba nɔse'ere la. 8Ge te ba da ana wo ba yaabdoma la n de pobirega la tobekperegadoma buuri saŋa la. Ba dela buuri se'a sunya n yuun ka sɛ ze'ele. Ba sunya ka dole Yenɛ yɛla. 9Epraim buuri la en yehe na la ba tiini la, ba yuun tuluge lebe mɛ. 10Ba ka dole Yenɛ nɔbiŋere la te a ze'ele la ba la, ba zagahɛ mɛ te ba kan doohe Yenɛ pa'alegɔ la. 11Ba tamɛ Yenɛ n eŋɛ se'em la mɛ, la nyalematooma la te a tom bo la. 12Yenɛ tom nyalema mɛ ba yaabdoma nɛŋa Mizraim teŋa poan, Zoan samana zuto. 13Enŋa n yele ko'kantɛ la te bo gu' zɛ'a, zuo la gɔbega, ge te ba doohe bo teŋasoka tole. 14Ne dɛna saŋgbanɛ wontɛɛŋa saŋa pin' ba te ba kena, te yu'uŋɔ te a ne dɛna bugum pa'alɛ ba sore. 15Wɔnrɛ tanhe mɛ pɔgɔtia poan ha, te ko'om yehe na te ba nyu' tegɛ wo bo boe la kolaa poan la. 16A bahɛ te ko'nini tanhɛ tanhe poan mɛ yehe na zɔta wo kolaahe la. 17Ge la bala zan'an, ba kelom tona la be'em gana bala, bita ba pɔya mɔen la ha la Saazuo Daana wa. 18Ba dekɛ la bama en bote disɛka, magahɛ Yenɛ ba suunre poan behɛ. 19Ba zɛrɛgɛ Yenɛ mɛ pɔgɔtia la ha, sɔkera yeti, Yenɛ wan nyaŋɛ bo tomam dia mɔɔ wa poan me yoi? 20To mi' te a ŋmɛ' taŋa te ko'om yehe na zɔta wo kolaa la, ge a wan nyaŋɛ bo to la dia la nɛnɔ yoi? 21Na'ayenɛ n wom yele dena wa la, a suunre ihege mɛ la Yakob, te a sunsunyiim taɛ bahɛ Israel buuri wa, te a bahɛ te bugum lu ba zuo na di ba, 22la ba ka tare sakerɛ sera la Yenɛ la, ge me ka dekɛ ba mɛhe delom en te a fan' ba la. 23Ge la dela Yenɛ n sɔe saŋgbana wa ge bahera te saazuo kolehe yu'uhera. 24Enŋa n miim *manna dia bahɛ ba na te ba dita, bo ba saazuo dia. 25Nɛresaaleba n di Yenɛ soŋoreba dia. Yenɛ bo ba la dia kekeko. 26Yenɛ bahɛ mɛ te sabeeo ze'ele dapɔya bɔba lobe na, te a tuluge ko, te ko ze'ele gɔbega bɔba lobe na, 27te a ni nɛnɔ wo puhugo la bahɛ ba zuo. A ne la kɔɔrɔhe wo kolaa tentɔnɔ bin'ihigo la bahɛ ba zuo na. 28A bahɛ te ba ɛnkɛ mɛ na luta Israeldoma wa tiiheŋɔ zen'an la, lu kae ba sogorɛ deto la. 29Te Israeldoma wa obe ta tegɛ ge te ba gan'an yoo. Se'ere n sɔe la, Yenɛ bo ba la ba suunre en eere la. 30Ge ban boe bini te ba nya ma'ɛn ba koŋkoma'ahom la, se'em ma'an te dia la bɔna ba nɔyan la, 31te Yenɛ sunsunyiim taɛ bahɛ ba zuo na, ko ba nɛre kpɛ'ɛma, ge ko Israel kɔmpɔlɔgɔ me. 32Yele ana wa woo poan la, Israel kelom tona la be'em. La nyalema ana zan'an la, ba kelom ka sakɛ. 33Bala te Yenɛ bahɛ te ba yuuma la zan'an dɛna paleŋ'ɛnka bo ba, te ba vom dabeha la tole wana kalam. 34Yenɛ n koore ba la te ba nya ɛɛra en, ba nya daa tee mɛ, ge ɛ Yenɛ la ba sunya zan'an. 35Ba nya tɛnre, te Yenɛ n de ba taŋa, ba daa nya mi' te Yenɛ n de Saazuo Daana la n de ba faanra. 36Ge ba nɔya ma'an te ba tara pan'aha, ge parona bɔ'ɔra en. 37Ge ba sunya ka lo' la Yenɛ. Ba ka dole a nɔze'elego la la yelemɛŋɛrɛ. 38Ge Yenɛ n de ninbɔn'zɔrɛ daana la, te a di suguru bo ba tuure la, ge ka sagom ba, a gu' a sunsunyiim la mɛ, ge ka bahɛ te a suunre ihegera la ba. 39Yenɛ tɛɛn ya te ba dela nɛresaaleba. Ba dela sabeeo en lobe tole kan le lebena. 40Ba bire pɔya baha en la bala pɔgɔtia la poan ha, kɛn'ɛha en sunkpɛnlega. 41Ba magahɛ Yenɛ beha la bala saŋa woo, kɛn'ɛhɛ Israel fa'a Daana wa sunkpɛnlega. 42Ba ka tɛnre Yenɛ paŋa la, bii daanse'ere te a fan' ba se'em n muguhere ba la nu'uhen bahɛ la. 43Ba ka tɛnre Yenɛ n tom nyalema se'a te a tom Mizraim teŋa poan la, la kerehe se'a te a tom Zoan samanɛ poan la. 44Enŋa n bahɛ te Mizraim teŋa kolehe zan'an lebege ziim te ba ka tana nyuura se poan. 45Te a tom zun'uhe, te se bibige ba teŋa la poan na duna ba, te a le tom lono to wa'ana perɛ ba teŋa la, daam ba. 46Enŋa n dekɛ Mizraim teŋa boom tuunle la sonwa'ara, ge dekɛ ba teŋa la dia tuunle sonwa'ara. 47Ge bahɛ te saakuga ni sagom ba tiihe dia vatɔ, ge bahɛ te ko'om gerɛ tabɛ tiihe, sagom ba kiŋkanma tiihe piinlom. 48Ge dekɛ ba nii tuunle saakuga, ge bahɛ te saa bugum di ba piihe. 49A ka'ɛ la a sunsunyiim, la sunsagaŋɔ bahɛ ba zuo na, a bahɛ te Yenɛ soŋoreba sɛba n sagone tare wa'an ba zuo na. 50A bo a sunsunyiim la la sore te bo tom, a ka gu' ba kum poan, ge ton dekɛ ba vom tuunle la too. 51Enŋa n ko Mizraim teŋa bikeema woo, ko Ham bikeema a sogorɛ poan. 52Ge nya gu'ura a nɛreba wa wo piihe la yehe. A gu' ba la bala wo piihe la, ta kɛn' pɔgɔtia poan. 53A gu'ure ba la soŋa soŋa, te dabeem ka tara ba, ge bahɛ te ko'kantɛ la di ba diŋdoma la zan'an. 54Ge nya tare a nɛreba wa wa'an a toolom teŋa la poan. Teŋsɛka n de zɔya te a zabɛ to'e ka la a paŋa la. 55Enŋa n sa'ahɛ teŋhe nɛreba ba nɛŋan, ge magahɛ ba sɔ'ɔlom tɔntɛ bo ba, ge sɛ Israel buuri wa woo zin'ire ba yiya poan. 56Ge la bala zan'an, ba magahɛ Saazuo Yenɛ wa behɛ mɛ, bire ba pɔya bo en, ka dɔla a nɔze'elego la, 57ge ete bama n bote se'em wo ba yaabdoma la, kanra wo baanrɛ n ŋmɛlegɛ la. 58Se'ere n sɔe la, ba nyiihe la Yenɛ suunre la ba kaanbegɔ zen'enhe la, tara nyuunre kɛn'ɛra en la ba baga la. 59Yenɛ n wom ba la, a suunre nyie mɛ, te a zagahɛ Israel bahɛ. 60Yenɛ zagahɛ a Sogorɛ la n boe Silo la mɛ, zen'sɛka te a bɔna la nɛresaaleba la, 61ge bahɛ te dima la dekɛ a paŋa la, ge dekɛ a soŋa la n de nɔbiŋere daka la eŋɛ dima la nu'uhen. 62A dekɛ a nɛreba la tuunle la so'a, ka'ɛ a sunsunyiim bahɛ a mɛŋa sɔ'ɔlom la zuo, 63te bugum di ba boraahe, te ba pugunto kan nyɛ sereba ele. 64So'a en kɔrom ba malemadoma, ge bahɛ ba pɔgɔba te se koŋe kɛlega. 65Te Daana la ana wo a nan ihege la koomen la, ana wo pɛɛntɛɛnra en nyu' buge vɔɔla yoo yoo la. 66A zabɛ a diŋdoma mɛ lebehe ha, bahɛ te nyanɛ se'ere n ka tare ba'ahegɔ di ba. 67A zagahɛ Yosef yiya mɛ, ka to'e Epraim buuri, 68ge ton loe Yuda buuri la n boe Zion Zoore la te a nɔŋɛ la zuo la. 69A mɛ a Yire la te de kanregɛ mɛ saazuo, ge yalegɛ wo teŋparɛ wa te a naam te ka bɔna se'em yɛ'ɛha wa. 70A loe la a yameŋa David, foe en duŋkeeŋɔ poan. 71Yenɛ yehe en la peyan'an la pebibihe behega poan, tare en na te a beha a nɛreba Israeldoma wa n de Yakob buuri, dɛna a sɔ'ɔlom wa. 72Te naba David tare sunsonɛ beha ba, gu'ura ba la a mi'ilom.

will be added

X\