Yooma 77

1Mam kaahɛ bo la Yenɛ te a soŋɛ mam. Mam kaahɛ la paŋa bo en te a han wan wom. 2Mam daaŋɔ daarɛ la, ma' ɛ n Daana la mɛ. Mam nu'o zɛnkɛ yu'uŋɔ la bala bo en, ka taregera, te mam sea yehe n mɛŋa. 3Mam tɛn'ɛhe la Yenɛ yele ge kɛla. Mam tɛɛnhe la a yɛla la yeti n lige. 4Hom bahɛ te mam nini ka muna gɔɔm saŋa. Mam suunre n ba' daam gaŋɛ, te mam ka tana tɔgɔra. 5Mam tɛn'ɛhere la deemen ha yɛla la, yuuma se'a n tole la. 6Mam tɛɛn la n yoonɛ la yu'uŋɔ, te mam suunre tɔgɔra, te mam potɛn'ɛrɛ ɛɛra. 7Daana la wan kɔ'ɔn zagahɛ mam, kan malom le zɔ mam ninbɔn'ɔn. 8A nɔŋerɛ kantɛ la ba'ahɛ mɛ n bala? A nɔbiŋ'a la ba'ahɛ mɛ n bala saŋa woo? 9Yenɛ tamɛ a zo'ohogɔ yele mɛ en bala? A sunsunyiim la zuo te a yo' a ninbɔn'zoolom la? 10Te mam yele n mɛŋa yeti, Mam etegɔ wa zuo te Yenɛ foe a paŋa wa n zuo. 11N wan tɛnra Na'ayenɛ tooma la. Mam wan tɛnra hom Yenɛ nyalema la te ho tom yuuma ha la. 12Mam wan tɛn'ɛha ho tooma la zan'an yele. 13Yenɛ, hom sore boe la de tɔka. Bagarɛ dene n kanregɛ wo tomam Yenɛ wa? 14Hom n de Yenɛ se'ere n tone nyalema. Hom n pa'alɛ nɛreba ho paŋa n zone se'em. 15Ho nu'o paŋa te ho dekɛ fan' Yakob, la Yosef yaahe la n de ho nɛreba la. 16Ko'om nyɛ la hom Yenɛ te dabeem kɛn' bɔ, te bo gbi'ira poan poan na, 17te saa ze'ele saŋgbana poan niire na, ge te saa tanhera saŋgbanɛ mɛ poan na, te hom nyagera zen'an woo. 18Saabeeokeŋɔ n vukure, te ho bahɛ te saa tanhera ko poan. Te ho saa la bugum nyagɛ nɛɛ teŋparɛ wa zuo zan'an, te teŋparɛ wa miina ge gbe'era. 19Hom sore doohe la ko'kantɛ la poan, ho maalɛ la dɔlɔga zen'an ko'mi'inhe n kpe'em zuo, kena te ho na'ma ka nyɛta. 20Ho dekɛ la Moses la Aron te ba gu'ura ho nɛreba la wo piihe la.

will be added

X\