Yooma 73

1Yelemɛŋɛrɛ, Yenɛ ane soŋa mɛ bo Israel, la sɛba sunya en pelege. 2Ge han dɛna mam, mam deŋɛ bɔregɛ mɛ, mam na'ma deŋɛ serom mɛ. 3Mam nini tɛnte mɛ la nɛre wuruba, la toonfɛn'ɛhadoma n sɔe ba mɛnha la. 4Se'ere ka daane ba. Ba tare iŋma'ahom mɛ, la paŋa. 5Daaŋɔ seko ka paare ba wo lan ete nɛreba se'em la. Too ka sigere ba zuo wo lan ete nɛreba se'em la. 6Bala zuo, pa'alɛ mɛŋa n de ba nonɔm baŋa, te gbirigere dɛna ba fuo te ba yɛ. 7Ba nini ane la kura kura, te ba sunya perɛ la toonfɛn'ɛha sɔrɔtɔ. 8Te ba toora ge tara yetɔgɔyooro kɛhera nɛreba, ge tara ba sunkanba la vuunha nɛreba. 9Ba tɔgɔre wo bama n sɔe saazuo la be'em, ge tanhera ban bote se'em teŋparɛ wa zuo. 10Te nɛreba yare ŋmɛregɛ pɛngera ba, ge lagom nyuura ba ko'om la tegera. 11Te ba nya ne yeti, Yenɛ mi' mɛ yoi? Bene yam n boe saazuo wa ha? 12Toonfɛn'ɛhadoma n ane se'em n bala. Saŋa woo bama sɔe la ba mɛhe, malom panta. 13Mam suunre wa de tontɔɔ la yoo. Mam nu'uhen n ka tare dɛngerɔ wa dela yoo. 14Se'ere n sɔe la, too sigere mam zuo mɛ, te mam nyɛta tobedɔnlegerɛ daarɛ woo. 15Mam me han yele ne te n me tɔgɔra bala, n wan dene ponpɔrɔma ho kɔma la nɛŋan. 16Ge mam ne han yeti, N tɛn'ɛhe bɔkɛ yele dena wa, la ne woŋɛ mam mɛ paɛ paɛ, 17han dagana n keŋɛ la Yenɛ Yire la poan. Bilam te n ne ta baŋɛ toonfɛn'ɛhadoma wa ba'ahegɔ n wan ta ana se'em. 18Yelemɛŋɛrɛ, ho dekɛ ba bahɛ la salɛ poan. Ho maahom te ba lu mɛ wɔnrɛ. 19Behɛ ban sagom se'em kalam. Paleŋ'ɛnka ma'an n piie ba keŋɛ. 20La ane wo zaanheŋɔ te nɛra zaanhom ihege la. N daana, hom han ihege ba wan zɔ mɛlom. 21Se'em ma'an te mam suunre poan kpɛnla ge zabera la, 22la pa'alɛ te mam gerege mɛ ka mina sɛsɛla, ana wo mɔen duŋa la ho nɛŋan. 23Ge la kan malom dɛna bala, mam boe mɛ la hom saŋa woo. Ho gorɛ mam nu'o mɛ. 24Ho ne dekɛ la ho kan'aŋɔ la gu' mam, ge ne to'e mam la nu'uhe seyi'. 25N tare la ane zuin ha gana hom? Sɛla ka boe teŋparɛ wa zuo te mam bɔta gana hom. 26Mam iŋa, la mam potɛn'ɛrɛ ta'an kɔ'ɔhɛ, ge Yenɛ n de mam suunre wa paŋa, la mam tɔntɛ yɛ'ɛha. 27Yelemɛŋɛrɛ, sɛba n zaan la hom wan bahɛ yoo. Ho wan ba'ahɛ sɛba n dagɛ tontɔɔ bo ho la. 28Ge han dɛna mam, la ane soŋa bo mam te n lɛna Yenɛ. Daana Na'ayenɛ wa n de mam soka zen'an. N wan mɔɔlɛ hom tom se'em bo mam la zan'an.

will be added

X\