Yooma 72

1Yenɛ, bo naba la birikinte. Bo' en yelemɛŋɛrɛ vom. 2Bahɛ te a tara birikinte gankera ho nɛreba wa. A tara yelemɛŋɛrɛ gankera nahehom. 3Bahɛ te zɔya bule tatelom bo ho nɛreba wa, te zobibihe bule yelemɛŋɛrɛ vom bo ba. 4Bahɛ te naba wa tara taromdoma giinle ba yɛla poan, ge faanra nahadoma bahera, ge sagona sɛba n muguhere nɛreba la bahɛ. 5Bahɛ te naba wa zɔɔlom bɔna buuri saŋa woo poan wuuha wo wontɛɛŋa la ŋmarega n boe wuuha se'em la. 6Bahɛ te a ana wo saa n niire baha mɔpɔlɔgɔ zuo la. A ana wo saa n niire baha samanɛ te warɛ woŋɛ zuo la. 7A saŋa la poan, bahɛ te tontɔɔ vom, la sunma'ahom bɔna zan'an woo, ka tara ba'ahegɔ. 8Bahɛ te a paŋa sɔna ko'kantɛ wa paara bo beene, ta' kolaa, ta paɛ teŋparɛ wa beenɛ zan'an beha. 9Bahɛ te sɛba n kɛn'ɛre pɔgɔtia teŋa poan la pɔta na'ma a nɛŋan, te a a diŋdoma pɔnta na'ma a nɛŋan. 10Bahɛ te Tarsis teŋa, la ko'om n kae teŋse'ehe la nadoma bɔna a nu'uhen tara lɔgɔrɔ kana yɔɔra en. Bahɛ te Sheba la Seba teŋa nadoma tara bo'olom kena na bɔ'ɔra en. 11Bahɛ te nadoma wo pɔnta na'ma a nɛŋa, te teŋhe woo tona bɔ'ɔra en. 12Se'ere n sɔe la, nahadoma han ne yi' bo en, a ne fan' ba bahɛ mɛ. Taromdoma, la sɛba n ka tare soŋora han ne yi' en, a ne fan' bahɛ mɛ. 13A tare taromdoma la nahadoma giinle mɛ, ge faanra nahadoma vom baha. 14A fan' ba vom la namehegɔ, la muguhego poan bahɛ. Ba vom dela toolom bonɔ a nɛŋan. 15A vɔna wuuha. Sheba teŋa sanlema wan tare na bo la enŋa. Ba wan po'ohera bɔ'ɔra naba wa, ge kan'ara bɔ'ɔra en saŋa woo. 16Bahɛ te dia buge teŋa la poan. Ba te dia la wom velegɛ, te zɔya la zuto zan'an maalɛ la dia, te nɛreba perɛ teŋa la poan yɛhɛra na wo mɔɔ la. 17Bahɛ te naba wa yu'urɛ bɔna bala yɛ'ɛha, a paŋa bɔna bala ka tara ba'ahegɔ, te kan'an paɛ teŋa woo, enŋa zuo. 18Na'ayenɛ la n de Israel Yenɛ la dela kan'an ma'an. Enŋa ma'an n tone nyalema. 19Kan'an wan bɔna a yu'urɛ la poan ka tara ba'ahegɔ, te a soŋa to'e teŋparɛ wa poan woo. Taarɛ. 20Yesse dayɔa naba David sohoga la beene n wana.

will be added

X\