Yooma 69

1Yenɛ, fan' mam bahɛ. Ko'om n libe mam paɛ n nyugela. 2Mam muhe mɛ feta bɛngerɔ poan, ka malom paara teŋa. Mam muhe la ko'om teŋa teŋa ha, te ko'om la uura mam. 3Mam kele taregɛ mɛ, te mam konkore sin'. Mam gu'uhe n Yenɛ wa mɛ te mam nini ta fɔ. 4Sɛba n yaɛ mam yoo la zo'e gana mam zuo zonto mɛ. Sɛba n wan sagom ma la kpe'em mɛ. Ba zaberɛ mam mɛ la ponpɔrɔŋɔ. Mam zun la bem, ge wan tare ta lebehe? 5Yenɛ, hom mi' mam tom gerego tom be'em seko. Mam tuure la woo gan' la ho nɛŋan. 6Daana Pɛɛntɛɛnreba Na'ayenɛ wa, da bahɛ te nyanɛ di sɛba n dele hom wa mam zuo. Israel Yenɛ wa, da bahɛ te fagehom nyɔkɛ sɛba n eere hom wa mam zuo. 7Hom yu'urɛ wa zuo, te yaalegɔ paara mam, te nyanɛ di mam. 8Mam lebege la saana n sɔɔnrɔ zen'an. Mam dela saana mam la sɛba n de ma yenɛ nɛŋan. 9Mam nɔŋɛ ho yire wa se'em la n perɛ mam. Toorɛ se'a woo n toore hom la sigere la mam zuo. 10Mam zagahɛ dia la kɛle, ba ne toora mam mɛ de zuo. 11Mam han yɛ sunsagaŋɔ fuo, mam ne lebege la ba bontoola te ba toora. 12Sɛba woo n zin' ba sɔnhega zen'an, tɔgɔre la mam yele, te daambugureba tara mam yoona yooma. 13Ge han dɛna mam, mam sohore la hom. Na'ayenɛ, saŋa la han ta paɛ, ho wan ze'ele ho nɔŋerɛ kantɛ la, la ho sakerɛ sera la poan lerege mam na. 14Fan' mam te n da ferɛ bɛngerɔ wa poan. Fan' mam n diŋdoma wa nu'uhen. Fan' mam ko'kantɛ wa poan bahɛ. 15Da bahɛ te ko'om wa di mam, bii n muhe bo poan, bii n lu boko wa poan te ko lige mam. 16Na'ayenɛ, lerege mam na. Ho zo'ohogɔ la dela som. Ho ninbɔn'zɔrɛ la n zo'e gaŋɛ la zuo, kelehe mam. 17Da sogɛ ho nɛŋa la ho yameŋa wa. N boe la sunsagaŋɔ poan. Lerege mam tɔtɔ. 18Lɛm na, la ho to'e mam. N diŋdoma wa zuo, fan' bahɛ fai. 19Hom mi' mam yaalegɔ, n nyanɛ, la n fagehom la zan'an. Hom mi' n diŋdoma zan'an mɛ. 20Toorɛ ma'an n sagom mam suunre, te mam ka bɔta n mɛŋa. Mam eere se'em n wan zɔ n ninbɔn'ɔn, ge mam ka nyɛ. Mam eere la se'em n pogolɛ n suunre koŋe. 21Ba bo mam la yabega te n dia n bala, ge bo mam ko'tɛnrehegɔ te n ko'om n bala. 22Bahɛ te ba mɛhe dia zen'an lebege bɛnregɔ, te ba soka zen'an dɛna bɛnregɔ bo ba. 23Bahɛ te ba nini nyanlegɛ te ba da nyɛta, te ba sɛɛhe damɛ te ba gɛnta. 24Ka'ɛ ho sunsunyiim bahɛ ba zuo na. Bahɛ te ho sunsunyiim di ba wo bugum la. 25Bahɛ te ba tiiheŋɔ zen'an woo yeregɛ, te ba kɛn'an zen'an lebege daboo, te nɛra da bɔna bini. 26Se'ere n sɔe la, Se'em te ho mɛŋa ŋmɛ' la, te ba tara muguhera. Sɛba te hom mɛŋa pogolom la te ba zabera la ba. 27Dekɛ namehegɔ malom pa'ahɛ ba namehegɔ la zuo. Da bahɛ te ba lɛna hom vo'ohogo la poan na. 28Saalom ba yu'ura. Saalom ba yu'ura vɔpa gɔŋɔ la poan bahɛ. Da bahɛ te ba yu'ura pa'ahɛ tontɔɔdoma la yu'ura poan. 29Ge mam pogolom mɛ, bɔna iŋtoo poan. Yenɛ, fan' mam bahɛ ge gu' mam. 30Mam wan pɛngɛ Yenɛ yu'urɛ wa la yoonɛ. Mam wan na'ahɛ en, ge bo en fara. 31Wana n wan tegɛ Na'ayenɛ nini gana lɔlega, bii lɔletalɛ en mɛ torɛ la nyugela. 32Sɛba n boe muguhego poan wan nyɛ bala nyeena. Sɛba n eere Yenɛ la ba sunya wan malom kpeŋe. 33Yenɛ kelehere taromdoma sohoga mɛ, ge ka zagahɛ a mɛŋa nɛresɛba n boe bobore poan. 34Pɛngɛ ya mɛ, saazuo la teŋparɛ la ko'kantɛ la sɛla woo n boe ba poan wa. 35Se'ere n sɔe la, Yenɛ wan fan' Zion bahɛ, ge malom mɛ Yuda teŋhe la, te a yamehe wa kɛn'ɛra se poan sɔna se, 36te a yamehe wa kɔma ta wana sɔe se sɔna, te sɛba woo n nɔŋɛ a yu'urɛ la kɛn'ɛra se poan.

will be added

X\