Yooma 68

1Yenɛ, ihege bahɛ te ho diŋdoma wa mɛlom. Bahɛ te sɛba woo n yaɛ hɔ zɔ fɔnregɛ ho nɛŋan. 2Kaan ba wo sabeeo n kanrɛ bugum zun'uhe se'em la, ta bahɛ ha. Bahɛ te ba nyɛlegɛ wo gbamvaga n lɛm bugum nyɛlegɛ se'em kalam la. Bahɛ te toonfɛn'ɛhadoma wa mɛlom ho nɛŋan. 3Bahɛ te tontɔɔdoma la tara popeelom. Bahɛ te ba nyeena la popeelom hom nɛŋan. Bahɛ te tara popeelom. 4Yoon yooma bo Yenɛ, yoon pɛngɛ a yu'urɛ la. Yoon yoonɛ bo saazuo daana wa. A yu'urɛ dela Na'ayenɛ. Tara popeelom a nɛŋan. 5Yenɛ dela keebehe sɔ, la pɔkɔnpa tɛ'ɛla. Yenɛ boe la a fa'a zen'an la. 6Yenɛ n bo'ore sɛba n ka tare sɛla la yire te ba kɛn'ɛra, ge yo'oha sɛba n boe paka deo poan baha te ba lɛbegera dakanpa. Ge tobekperegadoma bɔŋa zen'an ka malom ana soŋa. 7Yenɛ, hom daa boe ho nɛreba wa nɛŋan tare ba doohe mɔen la na. 8Teŋparɛ wa' miine mɛ hom Yenɛ nɛŋan, te saazuo niira saa na. Hom n de Israel Yenɛ, Yenɛ se'ere n sɔe Sinai. 9Hom Yenɛ n bahɛ te saakanra niira teŋparɛ wa zuo zen'an woo. Ho sɔ'ɔlom wa han ne ta ku'ura, hom mɛŋa ne maalɛ bɔ, 10te ho piihe nyɛta yaama ɔbera. Hom Yenɛ etesoŋɔ la zuo te nahadoma nu'uhe paara ba nɔyan. 11Yenɛ bo la a nɔɔrɛ, te pɔgɔhe zo'e zo'e mɔɔlɛ yelesoma se'a woo te a tom la. 12Zaba nɛŋadoma ɛnkɛ mɛ, mɛlom ge te pɔgɔhe sɔe vaɛ ba lɔgɔrɔ tɔnrɛ taaba. 13La hom pon gan'an la piihe zɔŋɔ la, dayene kelompagehe la en pin' la sanlenpeelega la, te de kelompage ɛngerehe la dɛna sanlema la dela ho denɛ. 14Gaŋɛ Zan'an Yenɛ la han yerom nadoma la bilam, saakuga wan lu Zalmon teŋa. 15Yenɛ zoore n de Basan teŋa zoore, yagom zo'e zo'e wa. 16Mam zɔyagoma wa, bene zuo te ho nini tɛnta la zose'ere te Yenɛ mɛŋa loe te a bɔna de poan wa? Bene zuo te ho nini tɛnta la zen'sɛka te Yenɛ loe te a bɔna bini wuuha wa? Na'ayenɛ wan bɔna la bilam wuuha. 17Na'ayenɛ zaba toroto la ka tare kanlɛ. To kɛn' la tuha, te Daana la bɔna la ba la a soŋa la. 18Ho zom zoore la mɛ la nyaŋerɛ, te yamehe zo'e zo'e dɔla ho poore, te nɛreba bɔ'ɔra ho bo'olom, te sɛba n pon daa dɛna toonfɛn'ɛhadoma, bɔ'ɔra hom bo'olom. Na'ayenɛ n de Yenɛ la wan bɔna la bilam. 19Pɛnka dela Daana se'em n ziire tomam zeero daarɛ woo la denɛ. Yenɛ n de tomam faanrɛ. 20Tomam Yenɛ wa dela faanrɛ Yenɛ. Enŋa n de Na'ayenɛ. Daana la n faanre tɔ kum poan bahera. 21Ge Yenɛ wan wɔnrɛ a diŋdoma la zuto. A wan wɔnrɛ sɛba n tare geere la zuto. 22Daana la yeti, N wan tare n nɛreba wa Basan teŋa lebe na. N wan yaɛ ba ko'kantɛ teŋa teŋa ha lebe na. 23Ba wan dekɛ ba diŋdoma ziim pee ba na'ma, baahe obe ba diŋdoma la nɛnɔ ta tegɛ. 24Mam Yenɛ wa n de mam naba wa, to nyɛ nɛrekooŋɔ n kene kɛn'ɛra ho Yire la poan la, 25te baambaandoma la bɔna ba nɛŋa, te yoonyooneba la yee poore, te pugunto bɔna ba teŋasogehe ŋmɛ'ɛra senyagahe. 26Pɛnkɛ Yenɛ nɛrekooŋɔ la poan. Na'ayenɛ wa, hom de Yenɛ n de Israel tile. 27Benyamin buuri la n de buuri peka la n boe nɛŋa, te Yuda nɛŋadoma la la ba nɛreba tagalɛ, te Zebulun la a nɛreba tagalɛ, te Naptali la a nɛreba tagalɛ. 28Yenɛ, pa'alɛ ho paŋa. Pa'alɛ ho paŋa la wo hom pon tabelɛ tom se'em bo to la. 29Ho Yire la n boe Yerusalem teŋa poan la zuo te nadoma tara bo'olom kena na bɔ'ɔra hɔ. 30Tanhɛ mɔen dunhe wa, la panhedoma lagaŋɔ wa la teŋhe lɔlehe wa n nɛɛre taaba sanlema zuo wa, ge yeregɛ sɛba n nɔŋɛ zaberɛ wa bahɛ. 31Bahɛ te Mizraim teŋa tara wɔbegɔ nyɛna na, te Kus teŋa tɛɛn a nu'o la hom Yenɛ. 32Yoon ya yooma bo Yenɛ. Teŋparɛ wa zuo sɔ'ɔlom wa woo, yoon ya pɛnka yooma bo Daana la. 33Yoon ya bo se'em n boe saŋgbana wa zuo la, te a konkore tanherɛ baha na la. 34Paŋa dela Yenɛ denɛ. Yenɛ se'ere n de Israel naba, te de paŋa sɔna saŋgbana wa zuo la. 35Yenɛ se'ere n de Israel Yenɛ wa dabeem n boe a Yire la poan. Enŋa n bo'ore a nɛreba kpe'eŋo la paŋa. Yenɛ dela som Yenɛ.

will be added

X\