Yooma 66

1Teŋparɛ wa zan'an, voole ya popeelom voole bo Yenɛ. 2Yoon ya a yu'urɛ soŋa la yooma. Yoon ya a soŋa la pɛnka yooma bo en. 3Yele ya en yeti, Ho tooma la tare la dabeem, ho paŋa la bahɛ te ho diŋdoma nyanla. 4Teŋparɛ wa zan'an po'ohere la hom. Ba yoone pɛngera la hom. Hom yu'urɛ te ba pɛngera. 5Wa'an ya na behɛ Yenɛ n eŋɛ se'em. A tooma tare la dabeem nɛresaaleba nɛŋan. 6Enŋa n bahɛ te kɛ'ɛŋa gan'arɛ ko'kantɛ teŋasoka. Ba nɛ la kɛ'ɛŋa ko'kantɛ teŋasoka yakɛ. Bala, bahɛ ya te to nyeena a poan. 7Enŋa paŋa n sɔe zan'an yɛ'a. Enŋa nini en behe teŋhe wa zan'an zuo. Da bahɛ te tobekperegadoma wa nyaŋɛ pa'alɛ ba mɛhe. 8Nɛreba wa, pɛngɛ ya to Yenɛ wa. Pɛngɛ ya en voole bahɛ zen'an woo. 9Ane n behere to to vom wa poan, ge ka malom bahɛ te to to sɛregera wa? 10Yenɛ, hom magahɛ to behɛ mɛ. Ho nyɛlegɛ to mɛ wo sanlenpeelega te ba nyɛnhegɛ paahɛ dɛngerɔ ba poan se'em la. 11Hom tare to wa'an bɛnregɔ la poan na, dekɛ muguhego zeero pagalɛ to pɔya zuto. 12Hom bo sore te nɛreba namehɛ tɔ, te to doohe bugum, la ko'om poan tole. Ge la bala zan'an, ho tare to wa'an la zen'sɛka te sɛla woo buge poan na. 13Mam wan tare nyɔ'an bo'olom wa'an ho Yire la poan na. Mam wan bo mam po'olɛ nɔɔrɛ te n bo ho sɛla la. 14Mam wa bɔna n daaŋɔ poan ge ya'ɛ nɔɔrɛ yele te n wan eŋɛ se'em bo ho la. 15Mam wan ganhɛ la n dunhe soma la kaanbɛ bo ho. N wan nyɔ' piihe bo ho, ge kaanbɛ lɔlehe la boohe bo ho. 16Yamam sɛba woo n zote Yenɛ wa, wa'an ya na kelehe ya te n yele Yenɛ n eŋɛ sɛla bo mam. 17Mam kaahɛ mɛ bo en, te a kelehe mam kaahega la. 18Mam suunre han pee ne mɛ la be'em, Daana wa kan kelehe ne mam. 19La de sera. Yenɛ kelehe mam mɛ. A kelehe mam sohoga la woo mɛ. 20Yenɛ dela som. A ka zagahɛ mam sohoga, bii a foe a nɔŋerɛ kantɛ la n zen'an ka le nɔŋɛ mam.

will be added

X\