Yooma 60

1Yenɛ, ho pon zagahɛ tomam mɛ, kɔ' to paŋa bahɛ. Ho suunre n nyie la tomam, ge to sohore ho mɛ te ho malom sɛ to ze'ele. 2Hom bahɛ te teŋparɛ wa miim. Hom bahɛ te ka tanhɛ, ge to sohore ho mɛ, te ho le maalɛ ka. Se'ere n sɔe la, ka miine mɛ yɛ'a lua. 3Ho bahɛ te ho nɛreba wa ba' namehɛ la namehe kanra. Ho bo to la daam te to nyu' gɛnta. 4Ho lo' la danlehom bo sɛba n zote ho la. Daaŋɔ saŋa ho ne zɛnkɛ pa'alɛ ba mɛ. 5Kelehe to ge bo to nyaŋerɛ, te sɛba n nɔŋɛ ho la nyɛ faanrɛ. 6Yenɛ tɔgɛ la a fa'a bɔŋa la poan bahɛ na yeti, Mam nyeene mɛ yeti, N wan tɔnrɛ Sekem teŋa wa tehɛ, ge aanhom Sukot bɔn'ɔn la tɔnrɛ. 7Gilead dela mam denɛ, Manase dɛna mam denɛ. Epraim dela mam zuowanɛ, te Yuda dɛna mam paŋa. 8Moab dela mam nɔsarɛ, te Edom dɛna mam tagara biŋere zen'an. Mam tanhɛ mɛ nyaŋɛ Pilistia teŋa. 9Ane n wan tare mam wa'an teŋa wa te dangoone Mɛ kae ka mum wa? Ane n wan tare mam keŋɛ Edom teŋa wa poan? 10Yenɛ, hom ka zagahɛ tomam mɛ n bala wa? To pɛɛntɛɛnreba wa han yɛ'a pɛɛntɛɛnrɛ, ho ka boe la ba. 11Yenɛ, bo to soŋorɛ te to nyaŋɛ to diŋdoma wa, ge nɛresaala soŋorɛ dela yoo. 12Yenɛ han bɔna la tɔ, to wan zabɛ boraanɛ la to diŋdoma wa. Se'ere n sɔe la enŋa n wa lobɛ ba bo to.

will be added

X\