Yooma 58

1Baanlam ge pa'ala sɛla n wan gu' yelemɛŋɛrɛ la bahɛ? Nɛresaaleba, yamam tan' gankera yɛla yelemɛŋɛrɛ? 2La ka boe bala. Se'ere n sɔe la ya sunya poan ete la sɛla n dagɛ ma'an, yamam nu'uhen n tare gbirigere sigera teŋparɛ wa zuo na. 3Toonfɛn'ɛhadaana ne pon tue te a nan boe la a ma pooren, ba ne pon tue la ba dɔgom daarɛ, parona. 4Ba tare la yabega ba poan wo kanpɛn'a la, te ba toba kpa' wo dunduuo la, 5ka kɛleha se'em n yoone n la, bii se'em n tare tiim daahera en la. 6Yenɛ, kɔ' nyɛna se'a n boe ba nɔyan la bahɛ. Kɔ' ba nyɛna n ane wo gbegenpaala nyɛna la bahɛ. 7Bahɛ te ba nyun'ɛn wo ko'om n ka'ɛ kɛ'ɛŋa poan la. Ba han tɛn' ba pɛɛma, bahɛ te bo bahɛ zaŋa. 8Bahɛ te ba ku'e poan ha, wo katawegehɛ n ki ku'e de pɔkɔ poan ha se'em la. Bahɛ te ba yee suram wo puurɛ en ka seke ge dɔgɛ te bia la yee suram se'em la. 9Piie ba kalam bahɛ, te dɔkɔ n pon dɔga dɔɔ kɛ'ɛhe, la dɔɔ man'aha bugum zuo pon nan ka eŋɛ wam. 10Tontɔɔdoma la han ta nyɛta leregere wa, ba puurɛ wan pee. Ba wan pee ba na'ma toonfɛn'ɛha wa ziim la poan. 11Nɛreba wan yeti, Sera, tontɔɔdoma seren tare yɔɔrɛ. La de sera te Yenɛ boe gankera teŋparɛ wa zuo yɛla.

will be added

X\