Yooma 57

1Yenɛ, zɔ n ninbɔn'ɔn. Zɔ n ninbɔn'ɔn, mam sea sogɛ la hom poan. Mam wan sogɛ la hom kelompagehe wa poan gura te sabeeo seko n sagone wa lobe tole. 2Mam kaahɛ bo la Yenɛ se'ere n de Saazuo Yenɛ wa, Yenɛ se'ere n tone de toonɛ n de se'em bɔ'ɔra mam wa. 3A wan tom saazuo na fan' mam bahɛ. A wan bahɛ te nyanɛ di sɛba n nɛɛre mam wa. A wan tom a nɔŋerɛ kantɛ, la a sakerɛ sera la na. 4Mam gan' mɛ la gbegema, mam gan' mɛ la nɛreba vo'ohom n de bugum. Dɛna nɛresaaleba, ge te ba nyɛna dɛna kana la pɛɛma te ba zɛlehe dita wo so'ahe. 5Yenɛ, hom sɔe pɛnka saazuo ha, bahɛ te ho soŋa pin' teŋparɛ wa zan'an. 6Ba dekɛ la bɛnregɔ bɛnrɛ mam dɔlɔga zen'an woo. Muguhego n nyɔkɛ mam te mam kan ta'an gorege zuo. Ba tun' la boko bɛnrɛ mam, tuluge lu to poan. 7Mam suunre sɛ mɛ, Yenɛ, mam suunre kɔ'ɔn sɛ mɛ. Mam wan yoon yoonɛ bo ho, mam wan yoon pɛngɛ hɔ. 8Mam, ihege. Kɔnlɔgɔ la duureŋa, damɛ ya mɛ. N wan voole la bala nɛɛ beere. 9N Daana, mam wan ze'ele nɛreba teŋasoka bo ho fara. Mam wan ze'ele teŋhe nɛreba teŋasoka yoon pɛngɛ hɔ. 10Se'ere n sɔe la, ho nɔŋerɛ som la yalegɛ mɛ wo saazuo wa la. Ho sakerɛ sera la yalegɛ mɛ wo saŋgbanɛ la. 11Yenɛ, hom n sɔe pɛnka saazuo ha. Bahɛ te ho soŋa pin' teŋparɛ wa zan'an.

will be added

X\