1 Yenɛ, ho zo'ohogɔ la zuo, zɔ n ninbɔn'ɔn. Ho ninbɔn'zɔrɛ la n zo'e la zuo, duuhe n tobekperega be'em wa bahɛ. 2 Pee n tuure wa bahɛ. Duuhe n be'em wa bahɛ. 3 Mam mi' n tobekperega be'em waw mɛ. Mam be'em wa kɔ'ɔn gan'an la n ninin. 4 Mam tom be'em bo la hom ma'an, hom ma'an te mam tue, tom sɛla n de be'em ho nɛŋan, ho yetɔgom dela ma'an. Ho han gankɛ mam te mam tue mɛ, la dela ma'an. 5 Behɛ, ba dɔgɛ mam mɛ la tuure, se'em ma'an te mam ma ta nyɔkɛ mam puurɛ la, te mam dela be'emdaana. 6 Hom bote yelemɛŋɛrɛ en bɔna nɛresaala suunre poan, bala pa'alɛ mam yam n suunre wa poan ha. 7 Pee mam la buruŋa, te n yehe filam. Pee mam te n pelege gaŋɛ tampegelom. 8 Bahɛ te n nyɛta popeelom, la nyeema. Bahɛ te konba se'a te hom wɔnrɛ wa nyeem. 9 Da bahɛ te ho nini beha n be'em wa. Saalom n tuure wa bahɛ. 10 Yenɛ, naam suunre se'ere n ka tare dɛngerɔ eŋɛ n poan, ge bo mam tontɔɔ vom sunboolom. 11 Da sa'ɛ mam ho zen'an bahɛ, da yehe ho sea la n poan. 12 Lebehe bo mam ho faanrɛ popeelom la, ge bo mam naŋa suunre. 13 Te n me nyaŋɛ pa'alɛ sɛba n tue la ho sɔya la, te be'emdoma ŋmɛregɛ lebe ho zan'an na. 14 N Yenɛ wa, hom n de mam Yenɛ, la mam faanrɛ, yehe mam taala wa poan bahɛ, te n ta'an ya'ɛ n nɔɔrɛ yoon voole hom fan' mam se'em la. 15 N daana, lakɛ n nɔgbama, te n nɔɔrɛ ta'an pɛngɛ hɔ. 16 Dagɛ kaanbegɔ bo'olom te hom bɔta. Mam han kaanbɛ bo'olom bo ho, bala kan pee ho puurɛ. 17 Kaanbegɔ seko n peere Yenɛ puurɛ dela suunre se'ere n sagom, doohe la denɛ n tue la. Hom Yenɛ kan zagahɛ suunre se'ere n sagom, ge kɛla de tuure zuo la. 18 Eŋɛ Zion soŋa. Mɛ Yerusalem dangɔɔma wa. 19 Te ho puurɛ nya wan pɛɛra la ba kaanbegɔ seko n de tontɔɔ, nyɔ'an bo'olom, la bo'olom sebo n ne nyɔ' mune la, bala te ba nɛreba nya wan tara lɔlehe kena kaanbera ho kaanbegɔ daka la zuo.
