Yooma 50

1Paŋa Zan'an Daana la, Yenɛ la n de Na'ayenɛ la yi nɛreba teŋparɛ wa zuo, ze'ele dapɔya ba yɛ'a zanɔya bɔba zan'an lagahɛ na. 2Yenɛ soŋa ze'ele la Zion poan nɛɛ na. 3To Yenɛ la ka ze' a kene mɛ na, te bugum sebo n dite kanbela bɔna a nɛŋan, te saabeeokeŋɔ kae en. 4Te a yi saazuo, la teŋa wa, te a gankɛ a nɛreba. 5Kan'ahe ya sɛba n tare sakerɛ sera la mam la, sɛba n biŋe nɔɔrɛ la mam ba kaanbegɔ poan la. 6Saazuo zan'an yele ya, te Yenɛ dela tontɔɔ. Yenɛ mɛŋa n de gankera la. 7N nɛreba wa, kelehe ya mam te n tɔgɛ. Israel, mam tare la yele la hɔ. Mam n de Yenɛ, ho Yenɛ la. 8N ka sa'ɛ hɔ la ho kaanbegɔ bo'olom wa, ge te ho sina ge kelom tara bo kena n nɛŋan na? 9N kan to'e ho yire poan lɔlega, bii boa ho boohe poan. 10Se'ere n sɔe la, Mɔɔ poan dunhe la woo dela mam denɛ, mɔen nii la n boe zɔya tuha tuha poan la dela mam denɛ. 11Mam mi' niihe kanlɛ n zone se'em ɛngera saazuo, la bonvɔa woo kanlɛ n de se'em ɛɛra mam samanɛ wa zuo. 12Kom han tare ne mam, mam pon kan yele ne ho. Se'ere n sɔe la teŋparɛ wa woo, la sɛla woo n boe ka poan dela mam denɛ. 13Mam obere la lɔlehe nɛnɔ? Bii n nyuure la boohe ziim? 14Bahɛ ya te pɛnka dɛna kaanbegɔ, te ya kaanbɛ bo Yenɛ ge bo Gaŋɛ Zan'an Yenɛ la, yan biŋe ya nɔya te ya bo en sɛla la. 15Yi mam daaŋɔ saŋa, te n fan' hɔ bahɛ, te ho pɛngɛ mam. 16Ge han dɛna potɔpa wa, Yenɛ yele ba yeti, Ya ka tare sore te ya pota mam malema la, bii ya tara ya nɔgbama lagom tɔgɔra mam nɔbiŋere la yele. 17Se'ere n sɔe la ya ka bote kan'aŋɔ ya zan'ɛn mam yelehom la bahɛ la ya pooren. 18Ba han ne nyɛ nayiga, ya ne dekɛ la enŋa te a dɛna ba zɔ, te baga kaanbereba dɛna ya zɔdoma. 19Ba ya'ɛ la ba nɔya bo be'em, ge te ya zɛlehe maahena ponpɔrɔŋɔ. 20Ho zin' mɛ tɔgɔra ho sɔɔn yele, ho viiri la hom, la se'em n de ma ayena fehega. 21Ho ete yele ana wa mɛ, ge te mam ana baanlam, te ho tɛn'ɛhɛ te mam me ane wo hom la. Ge nananawa mam sa'ɛ ho mɛ, ge tara yele la hɔ, 22Tɛnra yele dena wa, te, hom se'em n tamɛ Yenɛ, n wan aanhom ho zɔnra zɔnra, te se'em ka bɔna wan fan' hɔ bahɛ. 23Sɛba n dekɛ pɛnka te la dɛna ba kaanbegɔ te ba tara bɔ'ɔra mam la, na'ahere la mam. Sɛba n dole sɛla n de yelemɛŋɛrɛ la te n wan pa'ahɛ ba Yenɛ faanrɛ la.

will be added

X\