Yooma 5

1Na'ayenɛ, be'e ho toberɛ kelehe n yetɔgom wa. To'e n fabelegɔ wa. 2N naba, la n Yenɛ, kelehe mam n kaahe ɛɛra soŋorɛ wa. Se'ere zuo la, mam soha bɔ'ɔra hɔ. 3Na'ayenɛ, ho wone mam konkore bolika mɛ. Bolika mam ne dekɛ n sohoga woo biŋe la ho nɛŋan ge gura te ho lebehe mam na. 4Ho dagɛ Yenɛ se'ere n lɛne be'em. Potɔpa kan nyaŋɛ bɔna la hɔ. 5Pa'alɛ nɛŋadoma kan nyaŋɛ ze'ele hom nɛŋan. Hom yaɛ sɛba woo n tone be'em me. 6Ho sagone ponpɔrɔŋdoma mɛ, ge zagaha sɛba n ka'ahe nɛreba ziim, ge pan'aha nɛreba. 7Ge mam wan doohe la ho ninbɔn'zorɛ la kɛn' ho Yire wa poan na. Dabeem poan, n wan gan'arɛ aliko ho mɛŋa Yire la poan. 8Na'ayenɛ, tare mam doohe ho mɛŋa tontɔɔ sore la poan, n diŋdoma wa zuo. Pa'alɛ mam ho tontɔɔ sore mam nɛŋa la. 9Yele ka boe zɔ'ɔta ba nɔɔrɛ poan yɛhera na dɛna yelesonɛ. Sagaŋɔ yɛla ma'an n perɛ ba sunya la poan. Ba konkɔya dela yɔɔrɔ, te ba zɛlehe ana malemale. 10Mam Yenɛ, bahɛ te ba baŋɛ te ba ganlom mɛ. Bahɛ te ba mɛŋa be'em etegɔ la sagom ba. Dige ba bahɛ ba yelebe'ero zo'e zo'e zuo la. Se'ere n sɔe la, ba bire la ba pɔya bahɛ hom. 11Ge bo sɛba n dekɛ hom eŋɛ ba soka zen'an la popeelom. Bahɛ te ba yoona popeelom yooma daarɛ woo. Yeregɛ ho gu'a paŋa la pin' ba, ge bahɛ te sɛba n nɔŋɛ hom yu'urɛ la tara popeelom ho poan. 12Na'ayenɛ, ho seren kan'are maala la sɛba n de tontɔɔ nɛreba la. Ho ninbɔn'zɔrɛ la n de tɛ'ɛlega kae ba.

will be added

X\