Yooma 44

1Yenɛ, to wom ya, to sɔyaabdoma yele to toonse'a te hom bo ba ba saŋa ha la. 2Hom mɛŋa n yuun sa'ɛ teŋhe, ge sɛ bama ze'ele, yuun namehɛ nɛreba mɛ, ge te bama bɔna fai. 3La dagɛ bama mɛŋa so'a te ba yuun dekɛ zabɛ nyaŋɛ teŋhe la, bii bama mɛŋa nu'o paŋa n bo ba nyaŋerɛ la, ge la dela hom mɛŋa paŋa, te ho zaba la ho bugum sa'ahɛ ba. Se'ere n sɔe la hom nɔŋɛ to sɔyaabdoma wa mɛ. 4Ho dela mam naba, la mam Yenɛ Hom n bo Yakob nɔɔrɛ te a nyaŋera zaba poan. 5Hom zuo te to zan'ɛn to diŋdoma bahɛ teŋa. Hom zuo te to nɛɛra ba. 6Mam ka dekɛ n mɛŋa delom n tanhɔ, bii n so'a ta'an fan' mam bahɛ. 7La dela hom n fan' tɔ to diŋdoma nu'uhen bahɛ, ge bahɛ te sɛba n yaɛ tomam tuuna la taaba. 8Hom Yenɛ zuo te tomam ŋmɛ'ɛra nyɔn'ɔn saŋa woo, ge wan pɛngera ho yu'urɛ la saŋa woo. 9Ge la bala zan'an, ho zagahɛ tomam mɛ, ka doohe to pɛɛntɛɛnreba la yehe pɛɛntɛɛnrɛ poan. 10Ho bahɛ te tomam zɔ mɛ to dima la nɛŋan, te ho bahɛ te va to lɔgɔrɔ. 11Ho eŋɛ to mɛ te to ana wo piihe la, te ba tara yɛ'a kɔrɔŋɔ, yerom to bahɛ teŋhe woo poan. 12Ho koohe ho nɛreba wa la naana. Ho ka eere ho koohe ba lagi kantɛ. 13Hom bahɛ te to dɛna la toorɛ bo sɛba n lɛm tɔ. To dela yelɔ'ɔrɔ la kɛhega zogɔ bo sɛba woo n kae to la. 14Ho eŋɛ tɔ te to dɛna la teŋhe wa yele te ba tara to makera, ge dɛna kɛhega lɔkɔ bo nɛreba. 15Daarɛ woo mam nyanɛ wa gan' la nɛŋan. Vi n dite mam. 16Nɛre tooreba la nɛre kɛhereba la n diŋdoma la sɛba n yeti ba lerege mam la nɛŋan daarɛ woo boe. 17Ba zuo te yele ana woo sige tomam mɛ na, ge to ka tamɛ hom yele, bii to zagahɛ ho nɔbiŋere la. 18To sunya ka tɛn'ɛhere boyi' boyi' bii to dɔla ho sore la. 19Ge la bala zan'an, ho zan'an tomam ta bahɛ la sanhe zen'an, zen'an n de lika poan. 20Tomam wa han tamɛ la to Yenɛ wa, ka yi'ira ho yu'urɛ, bii to kaanbere la baga, 21Yenɛ wa kan baŋɛ mɛ yoi? Se'ere n sɔe la, enŋa n mi' yelese'ere n sogɛ bɔna nɛresaala suunre poan ha. 22Hom zuo te tomam koora to mɛhe daarɛ woo, nya ana wo piihe te ba tara yɛ'a te ha ta kɔrom la. 23N Daana, ihege ze'ele mɛ! Da ginhe. Da lobe to bahɛ zan'an. 24Bene te ho sogɛ ho mɛŋa to zen'an? Bene te ho tamɛ to too, la to muguhego wa? 25To nya kɔ'ɔn feta mɛ. To iŋa nya taberɛ mɛ la teŋa. 26Ihege la ho soŋɛ tɔ. To'e yɔ' to ho nɔŋerɛ kantɛ la zuo.

will be added

X\