Yooma 41

1Popeelom boe mɛ la sɛbadoma n tare taromdoma giinle. Na'ayenɛ wan yehe ba daaŋɔ saŋa poan bahɛ. 2Na'ayenɛ n gu'ure ba, ge tara ba vom. Ba yi'ire ba teŋa la poan la popeelomdoma. Hom Na'ayenɛ kan bahɛ te ba diŋdoma nayaŋɛ. 3Ba han bɛn'ɛnra gan'an ba soŋɔ zuo, Na'ayenɛ wan tebɛ ba ban'an la n de bɔra woo. 4Han dɛna mam, mam yeti, Na'ayenɛ, zo'ohɛ mam, ge tebɛ mam, ge mam mi' te mam tom la be'em ho nɛŋan. 5Mam diŋdoma dole mɛ waahena mam n ki daanse'ere daarɛ te n yu'urɛ saalom teŋa wa zuo. 6Ge ba han wa'ana nyɛ mam, ba ne yeen tɔgɔra la nɔmalehom, ge te ba simua la perɛ la pan'ahegɔ ma'an, te ba nya han yehe, ba ta eta la mam yelebibihe. 7Sɛba woo n yaɛ mam la tugi la taaba tobai waahena mam yele bɔ'ɔra taaba, ba bote ne te la woŋɛ mam gaŋɛ mɛ. 8Ba tɛn'ɛhe te ban' too n nyɔkɛ mam, te n pon kan yee bii n ihege ka poan. 9Se'em n de ma zɔ paɛ paɛ te mam dekɛ n mɛŋa delom en, te mam la enŋa lagom dita laa kayena poan la, zagahɛ mam mɛ. 10Ge hom Na'ayenɛ, zo'ohɛ mam, ge le zɛnkɛ mam ze'ele saazuo, te n lerege ba. 11Yele se'ere zuo te mam mina te ho suunre bote mam dela ho ka bahɛ te n diŋdoma nyaŋɛ mam. 12Ge mam ka tare taalɛ zuo, ho tare mam la kaŋkaŋe, ge bahɛ te n bɔna ho nɛŋan bala yɛ'ɛha. 13Na'ayenɛ Israel Yenɛ la dela som ka tara ba'ahegɔ! Taarɛ! Taarɛ!

will be added

X\