Yooma 40

1Mam ma'ɛn la n mɛŋa gura Na'ayenɛ, te a me kelehe mam kaahega. 2A ve'e mam la boko te ko poan dɛna bɛngerɔ poan dooe na, nya sɛ mam na'ma yagelɛ taŋa zuo, te mam na'ma ka miina. 3Ge bo mam yoonpaalɛ, yoonɛ n pɛngere to Yenɛ la. Zo'e zo'e wan nyɛ, te dabeem kɛn' ba, te ba dekɛ ba mɛhe delom Na'ayenɛ. 4Popeelom boe mɛ la sɛba n dekɛ ba mɛhe delom Na'ayenɛ, ge ka dekɛ ba mɛhe lamenɛ la pa'alɛ mɛŋadoma la. 5Na'ayenɛ wa n de mam Yenɛ wa ho tom ho toonkanrɛ nyanle na la pa'ahɛ mɛ bo tomam. To kan ta'an dekɛ se'em makɛ la hom. N han yeti n yele ho tooma wa zan'an a wan zo'e gaŋɛ n kaan'ɛ a. 6Hom ka bote kaanbegɔ la bo'olom, ge ho bo mam toba n kelehe ho yelehom. Ge ho ka bote nyɔ'an bo'olom la be'em bo'olom. 7Te mam yeti, Mam n wana. Ba golehɛ mam yele eŋɛ gɔŋɔ la poan mɛ. 8Mam Yenɛ wa, mam bote te n tom ho sunboolom la. Ho pa'alegɔ la boe mam suunre poan mɛ. 9Mam mɔɔlɛ ho faanrɛ nyeena la bo nɛrekooŋɔ la mɛ' Na'ayenɛ, ho mɛŋa nyɛ ya, te n ka mum n nɔɔrɛ la ho yɛla la. 10Hom n fan' mam bahɛ la, mam ka sogɛ dɛ n suunre poan ma'an. Mam tɔgɛ ho sakerɛ sera la, la ho faanrɛ, la ho zo'ohogɔ la yele mɛ nɛrekooŋɔ la poan. 11Na'ayenɛ, da go' ho ninbɔn'zɔrɛ la n zuo. Bahɛ te ho zo'ohogɔ la, la sakerɛ sera la bɔna n zuo bala yɛ'ɛha. 12Se'ere n sɔe la, be'em n ka tare kanlɛ n kae mam mum. Mam ganleŋɔ la pin mam mɛ te mam ka le nyɛ ta na. Ba gane mam iŋa konberɔ mɛ, bahɛ te mam ligira. 13Na'ayenɛ eŋɛ suguru, ge fan' mam bahɛ Na'ayenɛ fan' mam kalam. 14Bahɛ te vi, la tuuŋɔ di sɛba n zegere te ba ko mam la. Bahɛ te sɛba n bote mam pogolom la, tuluge lebe la zufagahom. 15Bahɛ te vi di sɛba n yeti mam te la ma'ɛn hɔ, la ma'ɛn hɔ la. 16Bahɛ te sɛba woo n eere hom, nyɛ nyeema, la kereŋɔ ho poan. Te sɛba n nɔŋɛ ho faanrɛ la yɛta la paŋa yeti, Na'ayenɛ kanregɛ mɛ. 17Mam dela taroma, dɛna naha, ge Yenɛ tɛnre n yele mɛ. Mam Yenɛ wa, hom de mam soŋorɛ, la mam faanra. Da go'om.

will be added

X\