Yooma 37

1Da bahɛ te sɛla daam hɔ potɔpa wa zuo. Da bahɛ te ho nini tɛnta la be'emdoma wa. 2Ba wan ku'e nananawa wo mɔɔ la. Ba wan ki' wo vɔntɔ la. 3Delom Na'ayenɛ, ge tona som. Bala te ho wan vɔna teŋa la poan, ge di Na'ayenɛ gu'ulom nyɛlom. 4Nam Na'ayenɛ, ge a wan bo ho ho sunboolom. 5Dekɛ ho yele la bo Na'ayenɛ. Nam en, ge a wan ete bala. 6A wan bahɛ te ho tuntɔɔ yele nyagera wa bugum la, te ho yele la boorɔ nɛɛ wo wontɛɛŋa la. 7Ana baanlam Na'ayenɛ nɛŋan, ge ma'ɛn ho mɛŋa gura en. Da bahɛ te sɛla daam hɔ, la sɛba n dole se'em tara ba tarega, bii sɛba n tare ba be'emtooma tona se'em. 8Yehe ho mɛŋa sunsunyiim poan, ge zagahɛ nyabega. Da bahɛ te sɛla daana hɔ, ge bala tare ho yɛ'a be'em poan. 9Ba wan ŋma potɔpa la bahɛ, ge sɛba n ze' gura Na'ayenɛ la, n wan to'e teŋa la sɔna. 10La gee fiin wa, te potɔpa la kan bɔna. Ho wan ma'ɛn ho mɛŋa ɛ ba, ge ho kan nyɛ ba. 11Ge sunbogohomdoma la n wan sɔna teŋa la, nyɛ tara popeelom la tarega kantɛ sɛka n boe ka poan la. 12Potɔpa la tare la be'em dɔla tontɔɔdoma la, ge ge'era ba nyɛna la ba. 13Ge Na'ayenɛ la'are potɔpa la mɛ. Se'ere n sɔe la, a mi' te ba ba'ahegɔ dabaherɛ la kene na. 14Potɔpa la foe la ba so'ahe, ge ba' ba tiini te ba ko taromdoma, la nahadoma la, ge ko sɛba n de tontɔɔdoma la. 15Ge ba so'ahe la wan tuluge lo ba mɛhe sunya, te ba tiini la me kɔ'. 16Tontɔɔdaana la n tare sɛla fiin wa la tare zuo gana potɔya la n panrɛ la. 17Se'ere zuo, ba wan kɔ' potɔya la nu'o, ge Na'ayenɛ n wan gura tontɔɔdaana la. 18Na'ayenɛ mi' sɛba n ka tare tuure la dabeha, ba sɔ'ɔlom wan bɔna la bala ka tara ba'ahegɔ. 19Nyanɛ ka dite ba be'em saŋa. Kom saŋa, dia ne buge bama mɛ. 20Ge potɔpa la ne bɔregɛ mɛ. Se'em n de Na'ayenɛ dima ane mɛ wo mɔɔ man'aha la, ba ne mɛlom mɛ, ba ne mɛlom mɛ wo zun'uhe n guluge mɛlom se'em la. 21Potɔpa pemehe mɛ, ge ka lɛbeha yɔɔra, ge tontɔɔdoma la bo'ore mɛ, kelom bɔ'ɔra. 22Na'ayenɛ n kan' somɔ bahɛ sɛba zuo la, n wan sɔna teŋa la. Ge sɛba te a zagahɛ ba la, ba wan ŋma ba bahɛ. 23Na'ayenɛ nini n gan' se'em zuo la, a bo'ore en la paŋa ba kenɛ woo poan. 24Ena daana wan gɛnrɛ, ge a kan lu paɛ teŋa. Se'ere n sɔe la, Na'ayenɛ nu'o wan gin' en tara. 25Mam n de bia tara tara ta korogɛ wa, mam ka tabelɛ nyɛ te Na'ayenɛ bahɛ tontɔɔdoma wa, bii ba kɔma ɛɛra soha dia. 26Ba kɔ'ɔn bɔ'ɔra la bala yabe yabe, ge tara pɛmɛha nɛreba, te ba kɔma dɛna bonsola bo ba. 27Bahɛ be'em, ge eta som, ge bala te ho wan tara vom. 28Na'ayenɛ nɔŋɛ la narehom. Bala, a kan bahɛ sɛba n de birikindoma la. Tontɔɔdoma wan bɔna la fai, ge potɔpa kɔma kan tara vɔnrɛ. 29Tontɔɔdoma la n wan to'e teŋa la bɔna ka poan yɛ'ɛha. 30Tontɔɔdaana la nɔɔrɛ tɔgɔre la yam yetɔgom ma'an. A zɛleŋa tɔgɔre la sɛla n nare. 31A Yenɛ la pa'alegɔ la boe la a suunre poan, te a na'ma ka serena. 32Potɔpa la pigiri la tontɔɔdoma la, ɛɛra te ba ko ba. 33Na'ayenɛ kan dekɛ tontɔɔdoma wa eŋɛ potɔpa wa nu'uhen, bii a bahɛ te ba di vi yetɔgom poan. 34Gura Na'ayenɛ, ge dɔla a sore la. A wan zɛnkɛ hɔ, te ho to'e teŋa la. Ho nini wan nyɛ potɔpa te a sagom ba se'em. 35Mam nyɛ nɛrebe'a wa n muguhere nɛreba se'em, ge ba' zɛ'a se'em wo Lebanon teŋa tikantɛ la. 36Ge pooren, mam ta le dɔla tɔla la, mam ka le nyɛ ba, te ɛ ba, ge mam ka wam ba nyuŋo. 37Beha sɛba n ka tare taalɛ wa, beha sɛba n ze' tontɔɔ wa, ba yaahe se'ehe woo n wan wa'ana, wan tara sunma'ahom. 38Ge toonbe'erodoma woo wan sagom ba yaahe se'ehe woo n wa'ana, kan tara vɔnrɛ. 39Tontɔɔdoma faanrɛ la ze'ele la Na'ayenɛ mɛŋa zen'an na. Daaŋɔ han ta bɔna enŋa n de ba soka zen'an. 40Na'ayenɛ n ne soŋɛ ba, ge fan' ba potɔpa la nu'uhen. Se'ere n sɔe la, ba sogɛ la enŋa Na'ayenɛ poan.

will be added

X\