Yooma 35

1Na'ayenɛ, zabɛ n bɛ'ɛba wa. Zabɛ la sɛba n zaberɛ la mam la. 2Ba' ho lea boraanɛ, la ho zabɛ bo mam. 3Dekɛ ho kanɛ, la ho zan'anɛ zabɛ la sɛba n digere mam wa. Yele mam n potɛn'ɛrɛ poan yeti, Mam n de ho faanrɛ. 4Bahɛ te vi di sɛba n eere mam kum, yerom ba bahɛ. Bahɛ te sɛba n maahene te ba tom mam be'em la gɛnrɛ ba mɛŋa zɛ'a. 5Bahɛ te ba' ana wo urugo n boe sabeeo poan la, te Na'ayenɛ soŋora pe'e ba ta bahɛ na. 6Bahɛ te ba sore woo dɛna lika, ge serena, te Na'ayenɛ soŋora digera ba. 7Se'ere n sɔe la, ba tare la bɛntɔ bɛnta mam ge te n ka eŋɛ ba sɛla. Ba tun' la boko biŋe mam, ge te n ka eŋɛ ba sɛla. 8Bahɛ te sagaŋɔ sige ba zuo na din'ɛn ba. Bahɛ te bɛnre seko te ba sogɛ bɛnrɛ mam la tee nyɔkɛ ba. Bahɛ te ba mɛhe tee lu ko poan sagom ba mɛhe. 9Bilam te mam potɛn'ɛrɛ poan wan nyeena la Na'ayenɛ, te n poorɛ pee la a faanrɛ la. 10Mam konba zan'an wan lagom yeti, Na'ayenɛ, ane n boe ana wo hom? Hom n faanre taromdoma, sɛba n kpe'em gana ba nu'uhen bahɛ, ge faanra taromdoma, la nahedoma te sɛba sagona ba la nu'uhen baha. 11Ba tare la yelese'a n dagɛ sera dɔla n poore, sɔkera mam yelese'a te n ka mina. 12Ba dekɛ la be'em yɔɔra n som la, te mam potɛn'ɛrɛ yehe n mɛŋa. 13Ge han dɛna mam, se'em ma'an te bɛn'ɛnra la, mam yɛ' sunsagaŋɔ futo la sigehe la zagahɛ mam mɛŋa. N sure n zuo sohora, ge ka wom sɛsɛla. 14Wo mam n wan eŋɛ bo n zɔ, bii n sɔɔn la, ɛɛra nyaanra wo nɛra n kele a ma la, n sure n zuo, ge kɛla. 15Ge mam n ta gɛnta la, ba lagahɛ me na geen la mam. Ba lagahɛ nɛre wuruba sɛba te mam pon ka mina. Ba zabɛ la mam, te ba yaala mam ka malom gɔ'ɔra. 16Nɛrebe'ero n lagahɛ na kɛhera mam ka malom gɔ'ɔra, ge ɔbera ba nyɛna. 17N Daana, hom yeti ho beha wana paɛ la wane ma'an. Fan' mam ba tannega wa poan. Fan' n vom gbegema wa nɔyan bahɛ. 18N wan ze'ele nɛrekooŋɔ la poan po'ohɛ hɔ. N wan pɛngɛ hɔ nɛrekooŋɔ la poan. 19Da bahɛ te n diŋdoma nyeem bahɛ n zuo, da bahɛ te sɛba n yaɛ mam la yoo mumuhe mam la ba nini. 20Ba ka tɔgɔre sunma'ahom yele, ge ba nyɔkɛ la pan'ahegɔ puurɛ, dɔla pan'aha sɛba n boe teŋa la poan baanlam la. 21Ba ya'ɛ la ba nɔya tanhera mam yeti, to nini ka nyɛ? 22Na'ayenɛ, behɛ, da sina. N Daana da zaan la mam. 23N Yenɛ, la n Daana wa, ihege saazuo to'e mam n yele wa poan bahɛ. 24Na'ayenɛ, la n Yenɛ wa, ze'ele ho tontɔɔ bɔŋa la poan bo mam vo'ohogo. Da bahɛ te nyeem bahɛ n zuo. 25Da bahɛ te ba nyaŋɛ yele ba mɛhe yeti, to nya nyɛ tomam n bote ne se'ere la. Da bahɛ te ba nyaŋɛ yeti, to pin' en. 26Bahɛ te vi, la tuuŋɔ di sɛba woo poorɛ n pee la mam daaŋɔ wa la. Bahɛ te sɛba n pa'ale ba mɛhe la mam la yɛ sunsagaŋɔ futo, te fagehom di ba. 27Bahɛ te sɛba n bote mam nyɛ vo'ohogo la voole la popeelom, la nyeema. Bahɛ te ba voole yeti Na'ayenɛ se'ere nini n boe de yameŋa zuo la, dela Na'ayenɛ kantɛ. 28Te mam zɛleŋa nya wan ta'an yɛta ho tontɔɔ bɔŋa la yeti, ge pɛngera hɔ daarɛ woo.

will be added

X\