Yooma 34

1Mam wan kan'ara Na'ayenɛ saŋa woo. Mam nɔɔrɛ wan pɛngera en saŋa woo. 2Mam nyɔn'ɔn ŋmɛ'a boe la enŋa poan. Sɛba n sigehe ba mɛhe wan nyeena. 3Lagom pɛngɛ ya Na'ayenɛ la mam. Bahɛ ya te to lagom zɛnkɛ a yu'urɛ. 4Mam soke la Na'ayenɛ, te a lerege mam. A yehe mam yelese'a woo n tare mam dabeem la poan. 5Beha Na'ayenɛ, ge a wan bahɛ te ho nɛɛ wo ŋmarega la, nyanɛ kan malom di ho. 6Mam taroma wa kaahɛ mɛ, te Na'ayenɛ wom n kaahega la, te mam nyɛ faanrɛ n daaŋɔ woo poan. 7Na'ayenɛ soŋora n gure sɛba woo n zote Na'ayenɛ la, ge faanra ba baha. 8Wa'ana lɛm behɛ, Na'ayenɛ ane soŋa mɛ. Popeelom boe mɛ la sɛba woo n zɔ sogɛ a poan la. 9Na'ayenɛ nɛreba wa, zote ya en. Se'ere n sɔe la, sɛba woo n zote Na'ayenɛ, sɛla ka daane ba. 10Gbegenɛ n pon tara paŋa namehere mɛ dia zuo, ge sɛba n eere Na'ayenɛ ka koŋere sɛla. 11Kɔma wa, wa'an ya na kelehe mam. N wan pa'alɛ ya ban zote Na'ayenɛ se'em. 12Ya se'em n bote vom, ge bɔta te a di nyɛlom. 13Da dekɛ ho zɛleŋa tɔgɔra be'em. Da dekɛ ho nɔgbanɛ pan'ahɛ. 14Yehe be'em poan, ge tona som. Ɛɛra sunma'ahom, la dɔla sunma'ahom. 15Na'ayenɛ nini gan' tontɔɔdoma la zuo mɛ. A toba kelehe ba kaahega woo. 16Na'ayenɛ zaberɛ mɛ la be'emdoma la, a wan ŋma ba teŋa wa zuo bahɛ, te ba kanle tɛnra ba yele. 17Tontɔɔdoma ne han kaahɛ bo Na'ayenɛ, a ne wom mɛ, ge fan' ba sagaŋɔ poan bahɛ. 18Na'ayenɛ lɛm mɛ la sɛba sunya n sagom, ge faanra sɛba sea n yehe ba mɛŋa la bahera. 19Yele se'a n muguhere tontɔɔdoma la zo'e mɛ, ge Na'ayenɛ n faanre ba a poan baha. 20Na'ayenɛ n gu'ure a kɔnba, te deyena me kan wɔnregɛ. 21Be'em tare la kum bɔ'ɔra potɔpa la. Sɛba n yaɛ tontɔɔdoma la wan nyɛ sagaŋɔ. 22Na'ayenɛ wan gura a yamehe la vom. Sɛba woo n sogɛ Na'ayenɛ poan la, ba ayena me kan nyɛ sagaŋɔ.

will be added

X\