Yooma 33

1Tontɔɔdoma wa, nyeene ya Na'ayenɛ wa poan. Pɛnka nare mɛ la tontɔɔdaana wa. 2Ŋmɛ' ya duureŋa pɛngɛ Na'ayenɛ wa. Dekɛ ya kɔnlɔgɔ n tare giinla pia ŋmɛ' pɛngɛ en. 3Yoon yoonpaalɛ bo Na'ayenɛ. Ŋmɛ'ɛra kɔnlɔgɔ limiha vɔɔla bo Na'ayenɛ. 4Na'ayenɛ yetɔgom dela tontɔɔ, te a tooma woo me tona sakerɛ sera poan. 5A nɔŋɛ la tontɔɔ vom, la sɛla n nare. Teŋa wa perɛ mɛ la Na'ayenɛ nɔŋerɛ kantɛ la. 6Na'ayenɛ yetɔgom ma'an n maalɛ saazuo. A nɔɔrɛ sabeeo ma'an n maalɛ punhe se'ehe woo n boe ka poan ha la. 7A kan'ahɛ ko'kanra wa mɛ su' wo bo boe kɔleba poan la, ge la baanrɛ poan la. 8Teŋa wa zuo zan'an, zote ya Na'ayenɛ saaleba woo n boe teŋparɛ wa zuo zɛ'a Na'ayenɛ nɛŋan la dabeem. 9Se'ere n sɔe la, a tɔgɛ la tɔgom ma'an, te la tom. A bo la nɔɔrɛ, te la sɛ kaŋkaŋe. 10Na'ayenɛ ka dekɛ teŋhe wa kan'aŋɔ te ba dɛna sɛla. Nɛreba n ne maahom te ba eŋɛ sɛla woo, a ne bahɛ te la sagom mɛ. 11Na'ayenɛ kan'aŋɔ ka tare ba'ahegɔ. A suunre tare la potɛn'sonɛ bɔ'ɔra teŋhe woo. 12Teŋsɛka Yenɛ n de Na'ayenɛ wa, dela popeelom teŋa. Nɛresɛba te Na'ayenɛ loe bo a mɛŋa la dela popeelomdoma. 13Na'ayenɛ ze'ele la saazuo ha ge behe na, a nyɛte nɛre saala woo mɛ. 14Na'ayenɛ zin' la a na'am gɔŋɔ la zuo, ge beha saala woo n boe teŋa zuo. 15Enŋa n mi ba sunya, ge nyɛta ban ete sɛla la woo. 16Naba pɛɛntɛɛnreba kekeko la kan ta'an to'e en bahɛ. Pɛɛntɛɛnra paŋpeelega kan ta'an fan' en bahɛ. 17Zaba yeho kan ta'an tare nyaŋerɛ na. La yeho la paŋa la zan'an, bo kan ta'an fan' sɛla bahɛ. 18Yelemɛŋɛrɛ, Na'ayenɛ niho gan' sɛba me n tare potɛn'ɛrɛ a nɔŋerɛ kantɛ la poan, 19te a fan' ba saa kum poan bahɛ, ge bo ba vom kom saŋa la zuo mɛ. 20Tomam sea gure la Na'ayenɛ, enŋa n de tomam soŋorɛ, la tomam tɛ'ɛlega. 21Tomam sunya nyeeŋɔ boe la enŋa poan. Se'ere n sɔe la, tomam dela la a fa'a yu'urɛ la. 22Na'ayenɛ, tomam gure la hom bahɛ te ho nɔŋerɛ kantɛ la ka'ɛ to zuo na.

will be added

X\