Yooma 31

1Na'ayenɛ, mam sogɛ la hom poan, da malom bahɛ te nyanɛ di mam. Ze'ele ho tontɔɔ bɔŋa la poan fan' mam. 2Kelehe mam, ge fan' mam ka'an bahɛ. Dɛna taŋa, te n sogɛ ho poan. Dɛna soka zan'an, fan' mam bahɛ. 3Ho dela mam taŋa, la mam soka zan'an. Ho yu'urɛ la zuo, bɔna n nɛŋa, ge gu'ura mam. 4Yehe mam bɛnregɔ seko n sogɛ gura mam wa poan. Se'ere n sɔe la, mam sogɛ la poan. 5Mam dekɛ n sea eŋɛ la ho nu'uhen. Hom Na'ayenɛ wa, n de sakerɛ sera Yenɛ wa n to'e mam. 6Ho yaɛ la sɛba n dekɛ ba mɛhe delom baga, ge mam dele la hom Na'ayenɛ. 7Mam popeere, la n nyeema boe la hom poan. Se'ere n sɔe la hom nyɛ n daaŋɔ wa. Ho nyɛ n diŋdoma wa. 8Ho kan tare mam eŋɛ dima la nu'uhen ge ho yehe mam la yɔle yɔle. 9Na'ayenɛ bo mam zo'ohogɔ, ge la suunre n ba' sagom suunre ma'an te mam kele te n nini fɔ, te n potɛn'ɛrɛ, la la n sea yehe n mɛŋa. 10Mam vom zan'an dela ninbɔn'ɔn, mam yuuma la zan'an dela sin'iŋɔ ma'an. Mam ka tare paŋa, n be'em la zuo, mam konba zan'an kɔ'ɔhɛ mɛ. 11Mam diŋdoma zuo, mam zɔtɔ yaɛ mam. Mam dɛna dabeem lɔkɔ bo n sɔɔnrɔ. Ba ne han nyɛ mam sore zuo, ba peɛn bahɛ mam. 12Mam yam bɔrege mɛ wo kum la, mam ane la yema yema wo yoore n wɔnregɛ gan'an se'em la. 13Se'ere n sɔe la, dabeem waaheŋɔ ma'an n kae mam mum. Ba naɛ la taaba te ba zabɛ la mam, ba maahene mɛ te ba ko mam. 14Ge Na'ayenɛ, mam dela la hom. Mam yeti, Hom n de mam Yenɛ. 15Mam saŋa boe ho nu'uhen fan' mam n diŋdoma wa nu'uhen. Fan' mam sɛba n muguhere mam wa nu'uhen. 16Ŋmɛregɛ ho nɛŋa bo ho yameŋa wa. Ze'ele ho nɔŋerɛ kantɛ la poan fan' mam bahɛ. 17Na'ayenɛ, da bahɛ te nyanɛ di mam. Se'ere zuo, mam yi'ire la hom. Bahɛ te nyanɛ di potɔpa. Bahɛ te potɔpa ki. 18Bahɛ te nɔgbama se'a n tare parona tabɛ, bahɛ te nɔse'a n tare zɛrɛgera, ge sagona, ge pa'ala ba mɛhe, ge tara nini tɛnrega la tontɔɔdoma la tabɛ. 19Na'ayenɛ, som sebo te a tara bɔ'ɔra sɛba n zote en la, la sɛba n zɔ na sogɛ a poan la ka tare makerɛ. Nɛra woo nini nyɛ ya. 20Hom sogɛ ba la ho mɛŋa poan, te nɛresaaleba n maahom sɛla la, ka paɛ ba. Ho gorɛ ba la bala, te zɛlehe se'ehe n de yabega la, ka nyaŋɛ sagom ba. 21Na'ayenɛ dela som. Se'ere n sɔe la, a doohe la nyalema sore, dekɛ a nɔŋerɛ kantɛ la pa'alɛ mam, se'em ma'an te la ana mam wo teŋa te dima wa'ana kae ka mum gan'an gura ka la. 22Te mam yele n mɛŋa yeti, ba ŋmaɛ mam Na'ayenɛ nɛŋan bahɛ mɛ. Ge mam n kaahɛ bo ho ɛɛra soŋorɛ la, ho kelehe mam mɛ. 23Yamam sɛba n de Na'ayenɛ nɛreba wa, nɔŋɛ ya en. Na'ayenɛ n gure birikindoma la, ge a ne lebehe yɔ potɔpa mɛ. 24Yamam sɛba n ze' gura Na'ayenɛ wa, kpe'em ya kaŋkaŋe, ge tara potɛn'ɛrɛ.

will be added

X\