Yooma 25

1Na'ayenɛ, mam dekɛ n potɛn'ɛrɛ zan'an bo la hom. 2N Yenɛ wa, mam dekɛ n mɛŋa delom la hom. Da bahɛ te nyanɛ di mam, da bahɛ te n diŋdoma nyaŋɛ mam. 3Da bahɛ te nyanɛ di sɛba n gure hom la. Ge bahɛ te nyanɛ di pan'ahereba, la ponpɔrɔŋdoma. 4Na'ayenɛ eŋɛ mam te n mina ho sɔya la, pa'alɛ mam ho sɔya la. 5Tare mam doohe ho yelemɛŋɛrɛ la poan, ge pa'ala mam. Se'ere n sɔe la, hom n de faanrɛ Yenɛ la. Hom te mam gura. 6Na'ayenɛ, tɛɛn ho ninbɔn'zɔrɛ la, la ho zo'ohogɔ la yele. Se'ere n sɔe ho yele ana wa pon bɔna la bala pin'ileŋɔ poan na. 7Da tɛɛn n bilomen toonbe'ero la bii n tuure wa. Ge ho nɔŋerɛ kantɛ la zuo, tɛnra mam. Na'ayenɛ, ho dela somdaana. 8Na'ayenɛ ane soŋa, ge me dɛna tontɔɔ, bala zuo, a pa'ale yelebe'erodoma a sore la mɛ. 9A tare sigehe mɛŋa doma dɔla la sɔrɔɔ soŋɔ poan, ge pa'ala ba a sore la. 10Na'ayenɛ sɔrɔɔ la dela nɔŋerɛ kantɛ, la birikinte bo sɛba n dɔla a nɔbiŋere la a ze'elego la. 11Na'ayenɛ ho yu'urɛ wa zuo, bahɛ n tuure wa bo mam ge de ba kanregɛ mɛ. 12Bane n zote Na'ayenɛ? A wan pa'alɛ ba ban wan loe sɔrɔɔ seko. 13Ba wan panrɛ, te kɔma sɔna teŋa la. 14Na'ayenɛ dela zɔtɔ la sɛba n zote en, ge te me pa'ala ba a nɔbiŋ'a la. 15Mam nini kɔ'ɔn kpa' la hom Na'ayenɛ wa. Se'ere sɔe hom n wan yehe mam bɛnregɔ wa poan. 16Ŋmɛregɛ n zen'an na, la ho bo mam zo'ohogɔ. Se'ere n sɔe la, n boe la n ma'an te la me wona mam. 17Yehe n suunre poan daaŋɔ wa bahɛ, ge yehe mam n sunsagaŋɔ wa poan bahɛ. 18Behɛ lan wone mam se'em wa, la n daaŋɔ wa, ge di suguru bo mam n be'em wa poan. 19Behɛ n diŋdoma n zo'e se'em ge behɛ yaarɛ se'ere taaba te ba dekɛ yaɛ mam. 20Gura n vom wa, ge fan' mam. Mam sogɛ la hom poan, da bahɛ te nyanɛ di mam. 21Bahɛ te zutebehom, la tontɔɔ bɔŋa dɔla mam. Se'ere zuo, mam gure la hom. 22Yenɛ, fan' Israel a daaŋɔ woo poan bahɛ.

will be added

X\