Yooma 18

1Mam nɔŋɛ hom, Na'ayenɛ. Hom de mam paŋa. 2Na'ayenɛ de mam taŋa la mam soka zen'an la mam faanra. Mam Yenɛ de mam taŋa, mam soka zen'an la mam tɛ'ɛla la mam faanrɛ paŋa la mam paŋa zen'an. 3Mam ne yi' la Na'ayenɛ se'ere n nare pɛnka la, te de fan' mam n diŋdoma nu'uhen bahɛ. 4Kum paŋa n kae mam mum, wo ko'om la, kum ko'mi'inhe n libere mam. 5Ke'enteŋa mi'inhe n lote mam, te kum bɛntɔ yɔgɛ mam kae. 6Mam sunsagaŋɔ poan, mam yi la Na'ayenɛ, mam yi la n Yenɛ la n sunsagaŋɔ poan. A wom mam konkore la a Yire la poan, bilam te mam kaahega lu a tobai. 7Te teŋa wa kpilina ge damena, te saazuo ha miina ge damena, Na'ayenɛ sunsunyiim la zuo. 8Zun'uhe n ze'ele a nyɔya poan yehe na, te bugum sebo n dite piiha ka kiŋira la, ze'ele a nɔɔrɛn yehe na, bugumsaana n taɛ dita, n ze'ele a poan yɛhera na. 9Te a daregɛ saazuo sigera na, te lika pin' sɛla woo n boe teŋa na wa zan'an. 10A zom la kelompagehedoma zuo ɛnkɛ, te ba nyɛ en saŋgbana zuo. 11A dekɛ la lika tin' paka kae a mɛŋa, te saŋgbanɛ sɔbelegɔ pin' ho. 12A nɛŋain la nyangere la, saakuga la nyaŋka bo la saŋbana luta na. 13Na'ayenɛ ze'ele la saazuo ha damɛ bahɛ na, Gaŋɛ Zan'an Na'ayenɛ la n tɔgɔre. 14A tom la a pɛɛma na, te a dige n diŋdoma bahɛ, A tom la saa bugum na, te bo voen n diŋdoma la bahɛ. 15Na'ayenɛ tanhɛ mɛ, te ko'kantɛ wa zɔ ku'e, a vo'ohe la sabeeo ma'an tuule teŋa wa, te sɛla woo n boe ka zuo mɛlom, ge te gan'an beele. 16A ze'ele saazuo ha ge nyɔkɛ mam. A foe mam yehe ko'kanra woo n libere mam la mɛ poan. 17A fan' mam mɛ n diŋdoma sɛba n kpe'em gana mam la, n diŋdoma sɛba n yaɛ mam la nu'uhen bahɛ. Se'ere n sɔe la, ba ba' kpe'em gana mam mɛ. 18Mam zoa dabeha la, te ba bibige mam na, ge Na'ayenɛ n daa ze'ele mam pooren. 19Enŋa n tare mam ze'ele pɛɛnbɔn'ɔrɔ poan yehe na, faanra mam bahɛ zen'an woo, la a nini n tegɛ la mam la zuo. 20Na'ayenɛ yɔ mam mɛ doohe la mam n de tontɔɔ se'em. A behɛ la n nu'uhe n ka tare dɛngerɔ se'em la ge yɔ ma. 21Mam dole Na'ayenɛ nɔɔrɛ mɛ, n bire la poore bahɛ n Yenɛ wa. 22Na'ayenɛ nɔze'elego la woo mam dole a mɛ, n ka dekɛ tobekperega zagahɛ a malema la. 23Mam ka tare taalɛ a nɛŋan, ge me gu'ura n mea ganleŋɔ poan. 24Bala te Na'ayenɛ nya yɔ mam, doohe la mam n de tontɔɔ la, a behɛ la mam n ze' fa'a se'em la ge yɔɔra mam. 25Ho dela birikina bo sɛba n de birikindoma, dɛna tontɔɔdaana bo sɛba n de tontɔɔdoma. 26Ho dela fa'a bo sɛba n de fa'a, ge me nigina la sɛba n nigini. 27Ho faanre sigehe mea doma mɛ, ge kɔ'ɔn mɔ'ɛ nini te ho lobɛ pa'alɛ mea doma. 28Sera, hom Na'ayenɛ dela mam butolela, Na'ayenɛ n bahɛ te mam lika dɛna nɛɛhom. 29Ho bo'ore mam paŋa te n nyaŋera n diŋdoma, mam Yenɛ wa paŋa poan, te n wan ta'an zoe sɛla n beŋere mam. 30Yenɛ dena wa, de sore ba'ahɛ la sore. N biŋe nɔse'ere la seren tom ya, A dela tɛ'ɛlega bo sɛba woo n sogɛ a poan. 31Yenɛ denɛ n boe, han dagana Na'ayenɛ wa? Ane me n boe, dɛna taŋa, han dagana tomam Yenɛ wa? 32Yenɛ se'ere n bobe mam la paŋa la, de yu'ɛ la sore yaleŋa bo mam. 33A bahɛ te mam na'ma koreha mɛ wo walega na'ma la, ge dekɛ soge zen'an te sɛla kan paɛ mam. 34A kpemehe mam nu'uhe mɛ, te n ta'an zabera. Mam nu'uhe wa wan ta'an daregɛ nyɔgom tanhɔ. 35Hom dekɛ la faanrɛ tɛ'ɛlega vuge mam, ho soŋorɛ wa n bahɛ te mam lebege nɛrekantɛ. 36Hom piihe sore bo mam te mam kena, te mam na'arɛ ka malom sɛregɛ. 37Te mam dige n diŋdoma, ka malom lebe pooren, ge tara tara ta sagom ba ba'ahɛ. 38Mam taɛ ba mɛ di wo bugum la, kɛ' ba te ba lu gan'an n na'mai kan malom le ihege. 39Se'ere n sɔe la, hom bobe mam la paŋa te n kɛn' zaberɛ la poan, ho bahɛ te mam diŋdoma wa fenrɛ mɛ mam na'mai. 40Ho ne bahɛ te mam diŋdoma zɔ mɛ ka gɛlegera poore. Ho bo mam paŋa te mam sagom sɛba n yaɛ mam la. 41Mam diŋdoma wa ne limihe la zen'an woo, ge se'em ka boe wan soŋɛ ba, te ba ne kaahɛ bo Na'ayenɛ, ge a me kan kelehe ba. 42Te mam nɛ zan' ba wo n zan'are la teŋa la, te mam ne wɔnrɛ ba, nɛ ba tabelɛ teŋa wo sin'iro n lu sore zuo te ba nɛ tabelɛ teŋa se'em la. 43Ho fan' mam n nɛreba n zabɛ la mam se'em la poan bahɛ, ge dekɛ zin'ire, te mam dɛna teŋhe wa naba. Te nɛresɛba te mam ka tabelɛ mina, tona bɔ'ɔra mam. 44Te saama wona n yele, kɛla kena n zen'an na, nana mam n yeti ba sɛla woo la. 45Ba giinla kɔ'ɔhɛ mɛ, te ba zɛ'ɛta ba soka zen'enhe la, gbe'era yɛha na. 46Na'ayenɛ boe mɛ, mam taŋa la dela kan'somɔ. Mam Yenɛ wa yu'urɛ zɛnkere la saazuo, enŋa n de mam faanrɛ taŋa. 47Na'ayenɛ dena n bo mam leregere paŋa, te n lɛta n diŋdoma, ge bo mam paŋa, te n sɔna nɛreba beha. 48Hom n fan' mam n diŋdoma nu'uhen bahɛ, ge bo mam nyaŋerɛ n diŋdoma woo poan, hom n fan' mam gbirigere, la paŋa woo poan bahɛ. 49Yele ana wa zuo te mam wan zɛnkɛ hom yu'urɛ nɛra woo nɛŋan, ge yoon pɛngɛ ho yu'urɛ wa. 50Na'ayenɛ n bo a naba wa faanrɛ kɔhegɔ, ge dekɛ a nɔŋerɛ kantɛ wa pa'alɛ se'em te a sɔ' la kaam wa. A dekɛ dɛ pa'alɛ la David la a yaahe kɔ'ɔn yɛ'ɛha.

will be added

X\