1 Pɛngɛ Na'ayenɛ! La ane la soŋa te to yoon yooma pɛngɛ Yenɛ. La zan'anhom mɛ, ge nara te to pɛngɛ en. 2 Na'ayenɛ n mɛte Yerusalem. A lagahere Israeldoma la n yeregɛ bɔna teŋhe poan la mɛ na. 3 Enŋa n bogole sɛba sunya n sagom la suunre, ge tebera ba pogoloŋɔ la. 4 Enŋa n mi' ŋmarebibihe wa kanlɛ. A yi'ira ba ba yu'urɛ ba yu'urɛ. 5 To Daana la kanregɛ mɛ, ge kpe'em la paŋa. A bɔkerɛ ka tare beene. 6 Na'ayenɛ soŋorɛ la sɛba n sigehe ba mɛhe, ge a lobe toonfɛn'ɛhadoma bahɛ la teŋa. 7 Yoon farafara yooma bo Na'ayenɛ. Ŋmɛ' kɔnlɔgɔ baam bo to Yenɛ la. 8 Enŋa n pin' saŋgbanɛ wa la saa saŋgbana. A bahɛ te saa ni bahɛ teŋparɛ wa zuo, te mɔɔ puhura zɔya zuo. 9 Enŋa bo'ore nii yaama, ge bɔ'ɔra niiŋbibihe dia, se'em ma'an te ba kaahɛ bo en. 10 A suunre ka gan' la yiri paŋa poan, bii a suunre kɛn' la asaala n kpe'em se'em. 11 Na'ayenɛ suunre kɛn' mɛ la sɛba n zote en, sɛba n dele a zo'ohogɔ la. 12 Na'ahɛ Na'ayenɛ, Yerusalem. Zion, pɛngɛ ho Yenɛ wa. 13 Se'ere n sɔe la a bo ho nayahe la la paŋa, ge kan' som bahɛ ho nɛreba n boe ho poan la. 14 A bo ho teŋan beena la la sunma'ahom, ge tegehɛ hɔ la ki soma zaŋa. 15 A tom la a nɔɔrɛ teŋparɛ wa zuo na. A yelehom la zote mɛ kalam kalam. 16 Enŋa bahɛ te saakuga ka'ɛ gan'an pelege, wo yaarom la, ge lobege pika wo tampegelom la. 17 Enŋa ka'are sɛla n gete bahɛ na, wo ba dela kugubibihe la. Ane wan ta'an ze'ele a ma'ahaga la poan? 18 A tom la a yelehom na, te ba mɛlom. A bahɛ te a sabeeo n lobe, te ko'niho boe. 19 A pa'alɛ a yelehom bo Yakob. A tɔgɛ la a malema la a nɔze'elego pa'alɛ Israel. 20 A ka eŋɛ wana bo teŋsɛka. Teŋhe ka mi' a nɔze'elego la. Pɛngɛ Na'ayenɛ.
