Yooma 144

1Pɛnka dela Na'ayenɛ n de mam Taŋa la, se'em n kpemehe mam nu'uhe zaberɛ poan, ge bi'ihe mam nu'dibilihe pɛɛntɛɛnrɛ poan la denɛ. 2Enŋa n bo'ore mam zo'ohogɔ, ge dɛna mam paŋa zen'an. Enŋa n de mam soka zen'an la mam faanrɛ. Enŋa n de mam tɛ'ɛlega te mam sogɛ a poan. Enŋa n degehɛ n diŋdoma eta n nu'uhen te n sɔna ba. 3Na'ayenɛ, asaala dela bem te a yele pakɛ hɔ? Asaala dela bem te ho tɛn'ɛha a yele? 4Nɛresaala dela vo'ohom boyena ma'an. A vom dabeha ane wo yilinyiliŋɔ la. 5Na'ayenɛ, aanhegɛ saŋgbanɛ wa sige na. Kalom zɔya wa te ba taɛ la bugum. 6Tom saa bugum na yeregɛ diŋdoma wa. Tɛn' ho pɛɛma dige ba bahɛ. 7Tɛɛn ho nu'o saazuo na fan' mam bahɛ. Fan' mam ko'kanra wa poan bahɛ. Fan' mam saama wa nu'uhen bahɛ. 8Ba nɔya n perɛ la ponpɔrɔŋɔ, te ba zu'ɔ nu'uhe perɛ la pan'ahegɔ wa bahɛ. 9Yenɛ, mam wan yoon yoonpaalɛ bo ho. Mam wan yoon dɛ la giinli pia kɔnlɔgɔ bo hom. 10N wan yoon bo hon se'em n bo nadoma nyaŋerɛ zaba poan la hon se'em n fan' ho yameŋa David yabega so'ahe nɔyan la. 11To'e ge fan' mam saama nu'uhe. Ba nɔya perɛ la ponpɔrɔŋɔ te ba zu'ɔ nu'uhe perɛ la pan'ahegɔ bahɛ. 12Bala te to dayɔɔhe n nan de bonbilipaalehe wan ana wo bugulugo n seke bonbula la. Ge te to pɔyɔɔhe ana wo naba deo poan zenya te ba golɛ la. 13Te to banya perɛ la ki' yema yema, te to piihe wi'ɛ tuha tuha, wi'ɛ kɛn' tuha pia pia to pabera poan. 14To nii wan tona toonkpɛ'ɛma. Dima kan gbi'ira dangɔɔma kɛn' ya tenhe. Ba kan nyɔkɛ ya doma keŋ saama teŋhe la. Ba kan bahɛ te kaahega lu' to tenhe wa sɔrɔtɔ la. 15Kan'somɔ wan bɔna yele ana n wan tom bo nɛresɛba la zuo. Kan'somɔ boe mɛ la nɛresɛba Yenɛ n de Na'ayenɛ wa.

will be added

X\