Yooma 139

1Na'ayenɛ, hom ɛ mam poan behɛ mɛ, ho me mi' mam n ane se'em. 2Ho mi' mam zin'ite se'em ma'an, la mam ihegere se'em ma'an mɛ. Hom zaen mɛ ha, ge ho mi' mam tɛn'ɛhere sɛla. 3Ho ne pon baŋɛ mam yɛhega, la mam gan'aregɔ mɛ. Ho mi' mam sɔya zan'an mɛ. 4Mam nɔɔrɛ ta pota yele baha na la, te hom Na'ayenɛ pon mina de zan'an mɛ. 5Ho yu' mam mɛ n poan, n pooren, la n nɛŋa zan'an te ho nu'o paga n zuo. 6Mi'ilom bona ba' nyalem mɛ gaŋɛ mam. A bo ba' kpe'em bo mam te n paɛ bɔ. 7Mam wan nyaŋɛ keŋɛ la bɛ ge kan bɔna hom Sea? Mam wan ta'an zɔ hom nɛŋan keŋɛ la bɛ? 8Mam han zɔna la saazuo, ho boe bilam mɛ. N han sige teŋa teŋa ha ta yeregɛ n soŋɔ bilam, ho boe bilam mɛ. 9Mam han pon zɔ keŋa wontɛɛŋa n ze'ete zen'an zɔna la, bii n keŋɛ ta kɛn'ɛra ko'kantɛ nɛŋa bɔba zaan zaanrɛ ha, 10bilam me, ho nu'o wan kelom gura mam. Ho nu'o zu'ɔ wan gorɛ mam bilam te n kan peɛn. 11Mam yeti, Lika seren wan sogɛ mam, te wontɛɛŋa pon lebege yu'uŋɔ kae mam, 12lika pon kan dɛna lika bo hom, te yu'uŋɔ la me nɛɛ wo wontɛɛŋa hom nɛŋan. Se'ere n sɔe la, lika ane mɛ wo nɛɛhom la hom nɛŋan. 13Bala, hom maalɛ mam poan lɔgɔrɔ. Hom yagom mam naɛ taaba mam ma pooren. 14Mam pɛngere hom se'ere zuo n sɔe ho naam mam te la tara la dabeem la nyalema. Ho tooma la zan'an dela kerega. Mam mi' bala mɛ soŋa soŋa. 15Mam nɛre dɔɔ la ka sogɛ ho ninin, se'em ma'an te ho ta bɔna bini naana mam n ma pooren, zen'an n sogɛ la. 16Ho nini daa nyɛ mam iŋa wa, n nan ka gomehɛ la mɛ. Mam vom dabeha n de se'em zan'an, golehɛ eŋɛ la hom gɔŋɔ poan, ge te dabeha la deyena, nya nyaŋɛ sige teŋparɛ wa zuo na. 17Yenɛ, hom tɛn'ɛhegɔ dela toolom bonɔ bo mam. Behɛ ban tare toolom se'em. 18Mam han wan ta'an ne kaanlɛ ba, ba wan zo'e gana tentɔnbin'ihegɔ. Mam han ta gan'arɛ ihege, mam kelom bɔna mɛ la hom. 19Yenɛ, mam bote te ho wan kɔrom ne toonfɛn'ɛhadoma wa, sɛba n bote ziim ka'ahegɔ wa fɔnregɛ ne ge bahɛ mam. 20Ba tɔgɔre hom yele mɛ la potɛn'be'o. Ho diŋdoma la pote ho yu'urɛ la yoo yoo. 21Na'ayenɛ, mam yaɛ sɛba n yaɛ hom mɛ. Mam kiha sɛba n zaberɛ la hom? 22Mam ka tare se'ere la ba gaŋɛ yaarɛ ma'an. Mam yi'ire ba la n diŋdoma. 23Yenɛ, ɛ n poan behɛ, la ho baŋɛ mam sunre n ane se'em. Magahɛ mam behɛ, la ho baŋɛ mam tɛn'ɛhe sɛla. 24Ɛ n poan behɛ nya tuure boe n poan, ge tare mam dɔla sose'ere n ka tare ba'ahegɔ.

will be added

X\