Yooma 132

1Na'ayenɛ, tɛnra David la namehegɔ seko woo te a ŋmibe ko poan la. 2A wa pɔ mɛ Na'ayenɛ wa nɛŋan, ge po'olɛ nɔɔrɛ Yakob Yenɛ Kanrɛ wa nɛŋan yeti, 3N kan kɛn' n yire poan, bii n gan'arɛ n soŋɔ zuo. 4Mam nini wa kan makɛ gɔɔm, bii n zɔgɔra, 5gura te mam ta nyɛ zen'an bo Na'ayenɛ. N ta nyɛ bɔŋa zen'an bo Yakob Yenɛ Kanrɛ. 6Behɛ, tomam wom de mɛ Eprata teŋa, te nyɛ dela Yaar samana poan. 7Bahɛ te to keŋɛ a Sogorɛ la! To keŋa ya ta na'ahɛ ya en a nɛŋan! 8Na'ayenɛ, ihege wa'an ho vo'ohogo zen'an la poan na, ho la ho nɔbiŋere daka n de ho paŋa. 9Bahɛ te tontɔɔ vom dɛna fuo yɛ ho malemadoma la, te ho nɛreba la yoona la yɛɛnma. 10Ho yameŋa David zuo, da malom zagahɛ ho naba te hom mɛŋa sɔ' en la kaam wa. 11Na'ayenɛ pɔ mɛ biŋe David te a kan luke yeti, Ho yaahe poan kayema, n wan dekɛ zin'ire na'am gɔŋɔ wa zuo. 12Ho dayɔɔhe han ta nam mam nɔbiŋere wa la pa'ale seko te mam pa'alɛ ba wa, ba dayɔɔhe wan me zin'an ho na'am gɔŋɔ wa zuo ka tara ba'ahegɔ. 13Na'ayenɛ mɛŋa n loe Zion. Enŋa mɛŋa suunre kɛn' bilam te la dɛna a bɔŋa zen'an. 14A yeti, Mam bɔŋa zen'an n wana kɔ'ɔn yɛ'ɛha. Mam wan zin'an n na'am gɔŋɔ zuo la ka'lam. Se'ere n sɔe, mam suunre n kɛn' zen'an kana wa. 15N wan kan' lɔgɔrɔ zo'e zo'e bahɛ a zuo. N wan diihe a nahadoma la dia te ba tegɛ. 16N wan yɛɛlɛ a malemadoma la faanrɛ. Te a nɛreba la n zote Na'ayenɛ la yoona vɔɔla la nyeema. 17Bilam te n wan bahɛ te iilɛ puhe yehe David zen'an na. Bilam te n wan nɛɛ bugum ze'ele se'em te n sɔ' la kaam la. 18N wan yɛɛlɛ a diŋdoma la nyanɛ. Ge a muŋa la wan bɔna a zuin mɛ la nyeema yɛ'ɛha.

will be added

X\