Yooma 119

1Na'ayenɛ kan'somɔ bo sɛba n tooma ka tare dɛngerɔ, sɛba n dole Na'ayenɛ pa'alegɔ la. 2Na'ayenɛ kan'somɔ boe mɛ la sɛba n nane a kan'aŋɔ la, ge ɛɛra en la ba suunre zan'an la. 3Ba ka ete sɛla n ka ane soŋa. Ba kenɛ la Na'ayenɛ sore la poan. 4Hom Na'ayenɛ biŋe la pa'alegɔ n de to nam ko zan'an soŋa. 5Mam bote ne te n etegɔ ane ne soŋa. Mam bote ne te n nane ne hom malema wa. 6Te mam han behɛ ho nɔɔrɛ la, nyanɛ da di ne mam. 7Mam wan pɛngɛ hom la sunsonɛ, ge zameha ho tontɔɔ vom nɔze'elego la. 8Mam wan nana ho malema la. Da zagahɛ mam zan'an zan'an. 9Bonbilipaalega wan eŋɛ la wane te a vom kan tara dɛngerɔ? La dela a vɔna wo hom yelehom la n pa'alɛ se'em la. 10Mam eere hom mɛ la n suunre zan'an. Da bahɛ te n sɛregɛ yehe hom nɔɔrɛ la poan. 11Mam dekɛ hom yelehom la sogɛ la n suunre poan, te n da ta'an tom be'em. 12Pɛnka dela hom Na'ayenɛ denɛ. Pa'alɛ mam ho malema la. 13Mam dekɛ la n nɔze'elego, mɔɔlɛ ho yelehom la zan'an te ho yele la. 14Ho kan'aŋɔ la dɔlɔga bo mam la nyeema, wo nɛra n yɛ lɔgɔrɔ zo'e nyeena se'em la. 15Mam tɛn'ɛhere ho pa'alegɔ wa poan mɛ, ge tɛn'ɛha hom ete se'em la. 16Mam suunre kɛn' ho malema la mɛ, te mam kan bahɛ ho yelehom la. 17Na'ayenɛ, eŋɛ ho yameŋa wa soŋa, te n ta'an vɔna. Mam wan nana ho yelehom la. 18Pekɛ n nini te a nyɛ nyalema se'a, n boe ho pa'alegɔ la poan. 19Mam dela saana teŋparɛ wa zuo. Da sogɛ mam ho nɔɔrɛ la. 20Mam suunre kete mɛ, gu'uha hom nɔze'elego la saŋa woo. 21Ho tanhere nɛre wuruba la, sɛba n nare ho namehe ba la, la sɛba n yehere ho nɔze'elego la poan la mɛ. 22Yehe toorɛ la zɛrɛgerɛ n zen'an, ge mam dole ho kan'aŋɔ la mɛ. 23Nadoma n lagahɛ taaba sagona mam yu'urɛ, ge mam ho yameŋa wa tɛn'ɛhere la ho malema wa. 24Hom kan'aŋɔ la te mam suunre kɛn'. Bama n de mam kan'ana. 25Ba din'inhe mam mɛ ta biŋe teŋa. Tara n vom wa wo ho yelehom la n yele se'em la. 26Mam yele en n etegɔ n ane se'em te ho lerege mam. Bala, pa'alɛ mam ho malema la. 27Bahɛ te n bɔkɛ ho yɛla la pa'alegɔ la, la n tana tɛn'ɛha ho nyalematooma la. 28Mam suunre taregɛ mɛ, la ninbɔn'ɔn ma'an. Kpemehe mam ho yelehom la poan. 29Gu'ura mam pan'ahegɔ sɔrɔtɔ poan. Tom som bo mam ho pa'alegɔ la poan. 30Mam loe la yelemɛŋɛrɛ sore la. Mam suunre boe la ho nɔze'elego la poan. 31Na'ayenɛ, mam gorɛ ho kan'aŋɔ la la kaŋkaŋe. Da bahɛ te nyanɛ di mam. 32Mam dole la ho nɔɔrɛ la. Se'ere n sɔe la ho bo'ore mam la bɔkerɛ zo'e zo'e. 33Na'ayenɛ, pa'alɛ mam te n dɔla ho malema la. Te n tara a bala ta paɛ ba'ahegɔ. 34Bo' mam bɔkerɛ, te n ta'an tara ho pa'alegɔ wa, ge nana ko la n suunre zan'an. 35Pa'ala mam ho nɔɔrɛ la n bote se'em. Mam suunre kɛn' ba. 36Ŋmɛregɛ n suunre lebe tɔ ho kan'aŋɔ la, ge dagɛ lɔgɔrɔ. 37Yehe n nini yeleyooro behega poan, ge bahɛ te n vom dɔla ho yelehom la. 38Tom bo ho yameŋa wa, wo hom biŋe nɔɔrɛ te ho tom se'em bo sɛba n zote ho la. 39Dekɛ nyanɛ se'ere n dite mam wa bahɛ. Se'ere n sɔe la, ho nɔze'elego la ane la soŋa. 40Mam bote ho pa'alegɔ la mɛ. Bahɛ te n vom bɔna ho tontɔɔ bɔŋa la poan. 41Na'ayenɛ, bahɛ te ho zo'ohogɔ la paɛ mam, te ho faanrɛ la paɛ na wo hom biŋe ho nɔɔrɛ se'em la, 42te n ta'an lerege se'em n voole mam wa. Se'ere n sɔe la, mam dele la hom yelehom la. 43Da fan' ho yelemɛŋɛrɛ yelehom la n nɔɔrɛn. Se'ere n sɔe la, mam dele la ho nɔze'elego la. 44Mam wan nana ho pa'alegɔ la kɔ'ɔ yɛ'ɛha. 45Mam wan bɔna fai. Se'ere n sɔe la, mam vɛɛnhe ho pa'alegɔ la poan mɛ. 46Mam wan ze'ele nadoma nɛŋan, tɔgɛ ho kan'aŋɔ la, ge te nyanɛ kan di mam. 47Se'ere n sɔe la, mam suunre kɛn' la nɔɔrɛ. Mam nɔŋɛ dɛ la zuo. 48Mam zɛnkɛ n nu'uhe bo la hom nɔɔrɛ la te mam nɔŋɛ la, ge me tɛn'ɛha ho malema la soŋa. 49Na'ayenɛ, tɛnra hom yele ho yameŋa wa se'em la. Ho bahɛ te n tara la potɛn'ɛrɛ. 50Sɛla n bogolɛ mam suunre n daaŋɔ la poan dela, ho nɔbiŋere la n tare mam vom. 51Nɛre wuruba la ɛnregerɛ mam mɛ ka malom bahera. Ge mam kan malom bahɛ hom pa'alegɔ la dɔlɔga. 52Na'ayenɛ, mam tɛnre ho nɔze'elego la te ho bo de deemen deemen ha la, te a pogolɛ la mam suunre. 53Mam suunre n nyiire la nɛre toonfɛn'ɛhadoma wa n zagahɛ hom pa'alegɔ wa. 54Ho malema la n de mam yoonɛ mam gan'aregɔ zen'an woo. 55Yu'uŋɔ, mam tɛnre hom Na'ayenɛ yu'urɛ wa mɛ. N me wan tara ho pa'alegɔ la. 56Mam nane ho kiha la ge mɛ pon tona a. 57Na'ayenɛ, sɛla te mam bɔta dela, mam biŋe la nɔɔrɛ te n wan nana ho yelehom la. 58Mam eere ho mɛ la n suunre zan'an. Eŋɛ mam som wo hom biŋe ho nɔɔrɛ se'em la. 59Mam nyɛ mam ane se'em mɛ, ŋmɛregɛ n mɛŋa lebe hom kan'aŋɔ la poan na. 60Mam wan kanbelɛ nam ho nɔɔrɛ la ge kan go'om. 61Toonfɛn'ɛhadoma la bobe mam mɛ la mi'inhe, mam kan malom tamɛ hom pa'alegɔ la. 62Yu'uŋsunsua, mam wan ihege bo ho fara, la ho nɔze'elego la n de tontɔɔ la zuo. 63Mam dela zɔtɔ bo sɛba woo n zote ho, la sɛba woo n dole ho pa'alegɔ la. 64Na'ayenɛ, teŋparɛ wa zan'an perɛ mɛ la hom zo'ohogɔ. Pa'alɛ tɔ ho malema la. 65Na'ayenɛ, eŋɛ ho yameŋa wa soŋa, wo ho yelehom la n yele se'em la. 66Pa'alɛ mam mi'ilom, la gankerɛ se'ere n ane soŋa. Se'ere n sɔe la, mam sakɛ bo la hom nɔɔrɛ la. 67Mam tue mɛ zuo te mam nyɛ pogoloŋɔ la, ge nananawa, mam nya nam ho yelehom la. 68Ho ane la soŋa, te sɛla woo te ho eta dɛna som. Pa'alɛ mam ho malema la. 69Nɛre wuruba la n sagone mam yu'urɛ la ponpɔrɔŋɔ la, mam tare hom yelehom la mɛ la n suunre zan'an. 70Ba zuto n ki, te ba ka mina hom yelehom, ge mam suunre kɛn' mɛ la hom pa'alegɔ la. 71La ane soŋa la mam nyɛ pogoloŋɔ la, n nya wan ta'an zamehɛ hom malema la. 72Pa'alegɔ la n ze'ele ho nɔɔrɛn na, la tare la toolom bo mam, gana sanlenpeelega bii sanlema kpila tuhure. 73Hom nu'uhe n naam ge yagom mam. Bo' mam bɔkerɛ te n zamehɛ ho nɔɔrɛ wa. 74Bahɛ te sɛba n zote hom han ne nyɛ mam, ba nyeena. Se'ere n sɔe la, mam dekɛ n potɛn'ɛrɛ delom la hom. 75Na'ayenɛ, mam mi' te ho nɔze'elego la dela tontɔɔ, ge mina te ho ze'ele la ho birikinte poan namehɛ mam la. 76Bahɛ te ho zo'ohogɔ la bogola n suunre, wo hom biŋe nɔɔrɛ se'em bo ho yameŋa wa la. 77Bahɛ te ho ninbɔn'zɔrɛ la paɛ mam, te n vɔna, ge mam suunre kɛn' mɛ la ho pa'alegɔ la. 78Bahɛ te nyane di nɛre wuruba wa, la bama n tom mam be'em yoo la, ge mam potɛn'ɛrɛ boe la ho pa'alegɔ wa poan. 79Bahɛ te sɛba n zote hom kena la mam, te sɛba n bɔkere hom kan'aŋɔ la dɔla la mam. 80Bahɛ te n suunre da tara dɛngerɔ ho malema la poan, te nyanɛ da ta'an di mam. 81Mam suunre gu'uhe la hom faanrɛ ta taregɛ, ge mam dekɛ n potɛn'ɛrɛ enŋa la hom yelehom la poan. 82Mam nini ɛ la hom nɔbiŋere la ta fɔ zan'an, te mam sɔkera yeti, Wane ma'an te ho wan bogolɛ mam suunre? 83La mam pon ŋmɛgelom wo laŋa n yuli lɛm bugum la, mam kan malom tamɛ ho malema la. 84Ho yameŋa wa wan gu'uhe paɛ la wane? Wane ma'an te ho wan namehɛ sɛba n namehere mam wa? 85Nɛre wuruba la tun'ure la bogoro biŋera mam, eta sɛla te hom pa'alegɔ ka bɔta. 86Ho nɔɔrɛ la zan'an tare la birikinte. Soŋɛ mam ge nɛreba n namehere mam yoo. 87Ba piie mam teŋparɛ wa zuo bahɛ ba'ahɛ mɛ n bala ge mam kan zagahɛ ho pa'alegɔ la. 88Gu' n vom wa ho zo'ohogɔ la zuo, ge n wan nam ho nɔɔrɛ kan'aŋɔ la. 89Na'ayenɛ, ho yelehom la ka tare ba'ahegɔ. Bo sɛ mɛ kaŋkaŋe saazuin ha. 90Ho birikinte la boe la bala saŋa woo. Hom sɛ teŋparɛ wa ze'ele, te ka zɛ'a wa. 91Ho nɔze'elego la boe la bala na paɛ zina daarɛ wa. Se'ere n sɔe la, sɛla woo dela hom yameŋa wa denɛ. 92Mam suunre han ka kɛn' ho pa'alegɔ wa, wana n ki ne n namehegɔ la poan. 93Mam kan malom tamɛ ho pa'alegɔ la, bama poan te ho fan' mam vom bahɛ wa. 94Fan' mam bahɛ ge mam dela ho denɛ. Mam ɛ ho pa'alegɔ la mɛ. 95Toonfɛn'ɛhadoma la gure mɛ te ba sagom mam, ge mam tɛn'ɛhere la ho kan'aŋɔ la. 96Yelemɛŋɛrɛ woo tare du'a zen'an mɛ, ge hom nɔɔrɛ la ka tare. 97Mam nɔŋɛ ho pa'alegɔ la mɛ, mam tɛn'ɛhere de poan la saŋa woo. 98Ho nɔze'elego la eŋɛ mam te mam wekɛ mɛ gana n diŋdoma. Se'ere n sɔe la n tare potɛn'ɛrɛ la dɛ. 99Mam bɔkere yɛla gana n pa'aleba mɛ, mam tɛn'ɛhere ho kan'aŋɔ la poan la zuo. 100Mam tare mi'ilom mɛ gana bonkoroba, mam nane ho pa'alegɔ la zuo. 101Mam gu'ure n na'ma mɛ be'em sore woo zuo, te n ta'an nana ho yelehom la. 102Mam ka bahɛ ho nɔze'elego la, hom mɛŋa n pa'alɛ mam la zuo. 103Ho yelehom la zan'anhom mɛ mam nɔɔrɛn, bo zan'anhom mam nɔɔrɛn gana seerom. 104Mam nyɛte bɔkerɛ la ho pa'alegɔ la poan, bala zuo, n yaɛ be'em woo mɛ. 105Ho yelehom la dela bugum bo mam na'ma, ge dɛna nɛɛhom bo mam dɔlɔga zen'an. 106Mam pɔ mɛ, ge me maahom, te mam wan dɔla ho nɔze'elego la. 107Mam namehɛ zo'e mɛ. Na'ayenɛ gura n vom wa wo ho yelehom la n yele se'em la. 108Na'ayenɛ, to'e pɛnka wa n ze'ete n suunre poan na wa, ge pa'alɛ mam ho nɔze'elego la. 109La mam boe nyɔnpɔnhega poan saŋa woo la, mam kan malom tamɛ ho pa'alegɔ la. 110Toonfɛn'ɛhadoma la maahom la bɛnregɔ biŋe mam, ge mam ka bɔregɛ yehe ho pa'alegɔ la poan. 111Ho kan'aŋɔ la dela mam lɔgɔrɔ yɛ'ɛha. Bama n de mam suunre nyeema 112Mam suunre maahom mɛ, te de tara ho malema la bala ta paɛ ba'ahegɔ. 113Mam yaɛ potɛn'ɛra ayi' ayi' doma mɛ, ge mam nɔŋɛ ho pa'alegɔ la mɛ. 114Hom n de mam soka zen'an, la mam tɛ'ɛlega. Mam potɛn'ɛrɛ boe la hom poan. 115Toonbe'ero doma wa, fɔnregɛ ya mam nɛŋan. Te mam ta'an dɔla n Yenɛ la nɔɔrɛ la. 116Tara n vom wa wo hom biŋe ho nɔɔrɛ se'em la, te n da ki. Da bahɛ te nyanɛ di n potɛn'ɛrɛ wa. 117Hom han gorɛ mam, n wan nyɛ faanrɛ. Saŋa woo, n wan na'aha ho malema la. 118Ho zagahere sɛba n bɔregɛ yehe ho malema la poan mɛ. Ba doma pan'ahegɔ la dela yoo. 119Ho zagahɛ toonfɛn'ɛhadoma woo teŋparɛ wa zuo mɛ lai lai. Bala zuo, mam nɔŋɛ ho kan'aŋɔ la mɛ. 120Mam iŋa gbe'ere mɛ la dabeem ho zuo. Dabeem n tare mam la ho nɔze'elego la. 121Mam tone la sɛla n de tontɔɔ la yelemɛŋɛrɛ. Da dekɛ mam bahɛ sɛba n muguhere mam wa nu'uhen. 122Gorɛ ho yameŋa wa vom. Da bahɛ te nɛre wuruba wa muguhe en. 123Mam gu'uhe la ho faanrɛ wa te mam nini ta fɔ. Mam eere la ho tontɔɔ yelehom la. 124Ze'ele ho zo'ohogɔ la poan tom bo ho yameŋa wa, ge pa'alɛ mam ho malema la. 125Mam dela ho yameŋa, bo mam bɔkerɛ, te n bɔkera ho kan'aŋɔ la. 126La paɛ ya te hom Na'ayenɛ tom. Se'ere n sɔe la, diŋdoma wa tue hom pa'alegɔ la mɛ. 127Mam nɔŋɛ hom nɔze'elego la mɛ gana, sanlema. Mam nɔŋɛ nɔɔrɛ la gana salensoma mɛ. 128Bala zuo, mam sakɛ bo ho nɔze'elego yelemɛŋɛrɛ mɛ sɛla woo poan. Ge mam yaɛ be'em sore woo mɛ. 129Ho kan'aŋɔ la dela nyalema. Mam suunre n kɛn' ba. 130Hom yelehom la bɔkerɛ bo'ore mam la nɛɛhom. Bo bahɛ te geto nyɛta la bɔkerɛ. 131Mam ya'ɛ la n nɔɔrɛ, gura ho diihe mam la ho nɔze'elego la. 132Na'ayenɛ, zɔ n ninbɔn'ɔn, ge to'e mam, wo hom ete sɛba n nɔŋɛ ho yu'urɛ la se'em la. 133Bahɛ te n na'ma dɔla ho yelehom la n bote se'em la. Da bahɛ te be'em sebo sɔna mam behera. 134To'e mam nɛresaala muguhego poan, te n ta'an nana ho pa'alegɔ la. 135Bɔna la ho yameŋa wa, la ho pa'ala mam ho malema la. 136Mam nintam ka'are mɛ wo ko'om la, la nɛreba n ka nane ho pa'alegɔ la. 137Na'ayenɛ, hom dela tontɔɔ, te ho nɔze'elego la dɛna sera. 138Ho kan'aŋɔ la zan'an dela tontɔɔ. Ba dela sɛla te nɛra wan dɛla. 139Mam iŋkerega la kerɛ ta taregɛ mɛ. Se'ere n sɔe la, diŋdoma la pon ka dɔla ho nɔze'elego la. 140Ho yelehom la zan'an dela sera, bala n sɔe te ho yameŋa wa nɔŋɛ bo la. 141La mam nya pon gan'an teŋa, te se'em ka beha nyɛta mam la, mam kan malom tamɛ ho pa'alegɔ wa. 142Hom tontɔɔ bɔŋa la ka tare ba'ahegɔ. Ho pa'alegɔ la dela sera. 143Daaŋɔ la ninbɔn'ɔn n sige n zuo. Ge mam suunre kɛn' la ho nɔɔrɛ la. 144Ho kan'aŋɔ la dela yelemɛŋɛrɛ yɛ'ɛha. Bo' mam bɔkerɛ, te n ta'an vɔna. 145Na'ayenɛ, mam kaahere mɛ la n suunre zan'an. Lerege mam na, te n ta'an dɔla ho malema la. 146Mam kaahere bɔ'ɔra la hom, fan' mam te n dɔla ho kan'aŋɔ la. 147Mam ihegere la bolika yu'uŋyu'uŋɔ, kaaha ɛɛra ho soŋorɛ. Mam potɛn'ɛrɛ zan'an boe la ho yelehom la poan. 148Mam nini pege la bala yu'uŋɔ la woo poan, te mam tɛn'ɛhera ho yelehom la poan. 149Ho zo'ohogɔ la zuo, kelehe n kaahega wa. Ge to'e mam wo ho nɔze'elego la n pa'alɛ se'em la. 150Sɛba n tone toonfɛn'ɛha la pɔnre mam me na. Bana doma zaan mɛ la hom pa'alegɔ la. 151Na'ayenɛ, hom lɛm mɛ na. Ho nɔɔrɛ la zan'an dela sera. 152Mam zamehɛ ho kan'aŋɔ wa la bilomen ha. Ho ze'ele a mɛ te a ka tara ba'ahegɔ. 153Behɛ n namehegɔ wa ge fan' mam bahɛ. Se'ere n sɔe la, mam ka tamɛ ho pa'alegɔ la. 154Tɔgɛ n yele wa bo mam ge fan' mam bahɛ. Gu n vom wa wo hom biŋe ho nɔɔrɛ se'em la. 155Faanrɛ zaan mɛ la toonfɛn'ɛhadoma la. Se'ere n sɔe la ba ka dole hom Na'ayenɛ malema la. 156Na'ayenɛ, ho ninbɔn'zɔrɛ la kanregɛ mɛ. Gu' n vom wa wo ho nɔze'elego la n pa'alɛ se'em la. 157Diŋdoma n namehere mam la zo'e mɛ, ge la bala zan'an mam ka yehe hom kan'aŋɔ la poan. 158Mam suunre n nyie la nɛre ŋmɛlema wa. Se'ere n sɔe la, ba ka nane hom yelehom la. 159Behɛ mam nɔŋɛ ho pa'alegɔ wa se'em. Gu' n vom wa ho zo'ohogɔ la poan. 160Hom yelehom la dela yelemɛŋɛrɛ, te ho tontɔɔ nɔze'elego la zan'an bɔna bala yɛ'ɛha. 161Nadoma n namehere mam ge te n ka eŋɛ se'ere. Ge mam suunre zote la hom yelehom la. 162Mam nyeene mɛ ho yelehom la poan wo, nɛra n pin'e lɔgɔrɔ yoo nyeena se'em la. 163Mam yaɛ ponpɔrɔŋɔ la, ge nɔŋɛ ho pa'alegɔ la. 164Mam ne pɛngɛ hom la sugumnɔɔren boyopɔe daanyenɛ, ho tontɔɔ nɔze'elego la zuo. 165Sɛba n nɔŋɛ ho pa'alegɔ la tare la sunma'ahom kantɛ, te sɛla ka bɔna wan bahɛ te ba gɛnta. 166Na'ayenɛ, mam gure la ho faanrɛ la, ge dɔla ho nɔɔrɛ la. 167Mam nane ho kan'aŋɔ la mɛ. Se'ere n sɔe la, mam ba' nɔŋɛ ba mɛ. 168Mam nane ho pa'alegɔ la ho kan'aŋɔ la mɛ. Se'ere n sɔe la, mam etegɔ zan'an gan' la ho nɛŋan. 169Na'ayenɛ, bahɛ te n kaahega wa paɛ ho nɛŋan na. Bo' mam bɔkerɛ wo ho yelehom la n yele se'em la. 170Bahɛ te n fabelegɔ wa paɛ ho nɛŋa na, te ho fan' mam bahɛ wo ho yelehom n yele se'em la. 171Bahɛ te n nɔɔrɛ wa perɛ la hom pɛnka. Se'ere n sɔe la, ho pa'alɛ mam ho malema la. 172Bahɛ te n nɔɔrɛ wa yoon hom yelehom wa yele. Se'ere n sɔe la, ho nɔɔrɛ la zan'an dela tontɔɔ. 173Bahɛ te ho nu'o maahom te ko soŋɛ mam. Se'ere n sɔe la mam loe la hom pa'alegɔ la. 174Na'ayenɛ, mam gu'uhe la hom faanrɛ wa, te mam suunre kɛn' ho pa'alegɔ la. 175Bahɛ te n vɔna, la n ta'an pɛngɛ hom. Bahɛ te hom nɔze'elego la tara mam. 176Mam eere nyaanra mɛ wo pehego n bɔregɛ la. Ɛ ho yameŋa wa. Se'ere n sɔe la, mam kan malom tamɛ ho nɔɔrɛ la.

will be added

X\