Yooma 118

1Bo' Na'ayenɛ fara. Se'ere n sɔe la, a ane la soŋa, te a zo'ohogɔ la ka tara ba'ahegɔ. 2Israel, yele te, a zo'ohogɔ la ka tare ba'ahegɔ. 3Bahɛ te Aron yiredoma yeti, a zo'ohogɔ la ka tare ba'ahegɔ. 4Yamam sɛba n zote Na'ayenɛ wa, yele ya yeti, A zo'ohogɔ la ka tare ba'ahegɔ. 5Mam woŋerɛ la poan, mam kaahɛ bo la Na'ayenɛ, te a lerege mam doohe la en fan' mam bahɛ la. 6Na'ayenɛ boe la mam mɛ, mam kan zɔta dabeem. Asaala ete mam la bene? 7Na'ayenɛ n boe la mam. Enŋa n de mam soŋora. Mam nyaŋere n diŋdoma mɛ. 8La ane soŋa te ho sogɛ ho mɛŋa Na'ayenɛ poan, gana ho delom nɛresaala. 9La ane soŋa te ho sogɛ Na'ayenɛ poan, gana ho delom dakanpa. 10Teŋhe zan'an n kae mam mum, ge Na'ayenɛ yu'urɛ la poan, mam nyaŋɛ ba mɛ. 11Ba gilige mam mɛ n logorɛ woo, ge Na'ayenɛ yu'urɛ la poan, mam nyaŋɛ ba mɛ. 12Ba biligere mam mɛ wo sim la, ge ba nukum mɛ wana kalam wo gɔn'ɔhe bugum la. Na'ayenɛ yu'urɛ la poan, mam nyaŋɛ ba mɛ. 13Ba zan'ɛn mam mɛ ta lebe pooren ha, te mam gee la n lu, ge Na'ayenɛ n soŋɛ mam. 14Na'ayenɛ n de mam paŋa la mam yoonɛ. Na'ayenɛ n de mam faanrɛ. 15Nyeema woologo, la faanrɛ n ze'ete tontɔɔdoma yiya la poan na. Na'ayenɛ paŋa la tom la toonkanra. 16Na'ayenɛ paŋa la en nyaŋɛ. Na'ayenɛ paŋa la tom la toonkanra. 17Mam kan ki, n wan vɔna, la n mɔɔlɛ Na'ayenɛ n eŋɛ sɛla. 18Na'ayenɛ dɔnlegɛ mam toberɛ paɛ mɛ, ge a ka dekɛ mam bo kum. 19Na'ayenɛ, yu'ɛ tontɔɔdoma nayaŋa wa bo mam, te n kɛn' bo Na'ayenɛ farafara. 20Na'ayenɛ nayaŋa en bala, te tontɔɔdoma la dɔla kɛn'ɛra. 21Mam wan bo ho fara la hom lerege mam la. Hom n de mam faanrɛ. 22Kuguse'ere te mɛteba zagahɛ la, denɛ en ta dɛna ɛnberɛ kugure. 23Na'ayenɛ n tom dena wa, te to beha te la dɛna nyalema to ninin. 24Na'ayenɛ dabaherɛ n wana te a eŋɛ zina. Bahɛ ya te to tara popeelom, ge nyeem la en. 25Na'ayenɛ, fan' to bahɛ. To belone ho mɛ, bo to nyaŋerɛ to tooma poan. 26Kan'somɔ boe mɛ la se'em n wa'ana la Na'ayenɛ yu'urɛ. To ze'ele la Na'ayenɛ yire la poan kan'ara baha ho na. 27Na'ayenɛ n de Yenɛ ge a bahera te a bugum n nɛɛra bɔ'ɔra tɔ. De'eŋ ya de'eŋɔ la la kpa'kpa' tia yila, wa'ara kaara kaanbegɔ daka la. 28Hom n de mam Yenɛ, mam wan bo la hom fara. Hom de' mam Yenɛ, mam wan pɛngɛ ho yu'urɛ la. 29Bo' Na'ayenɛ fara. A ane la soŋa. A zo'ohogɔ la ka tara ba'ahegɔ.

will be added

X\