Yooma 116

1Mam nɔŋɛ Na'ayenɛ mɛ! Se'ere n sɔe la, a kelehe mam mɛ. A kelehe mam kaahe ɛɛra a ninbɔn'zɔrɛ la mɛ. 2Enŋa n kele mam sohoga la zuo, mam wan yi'ira a yu'urɛ saŋa wa poan woo. 3Kum pigiri en kae mam. Yɔɔ en gure mam. Daaŋɔ la ninbɔn'ɔn en nyaŋɛ mam. 4Te mam yi' Na'ayenɛ yu'urɛ la yeti, Na'ayenɛ, n belone ho mɛ fan' mam bahɛ. 5Na'ayenɛ dela som la tontɔɔ Na'ayenɛ. To Yenɛ la perɛ mɛ la ninbɔn'zɔrɛ. 6Na'ayenɛ n gure sɛba n de geto. Lan wa wona mam la, a fan' mam bahɛ mɛ. 7Mam suunre wa, nya vɔ'ɔha fai. Se'ere n sɔe la, Na'ayenɛ n ete som bɔ'ɔra hɔ. 8Hom Na'ayenɛ n fan' mam kum poan bahɛ. Duuhe mam nintam bahɛ. Sɛ mam na'ma te a ka gɛnta. 9Te n nyaŋɛ bɔna ho nɛŋan teŋparɛ wa zuo. 10Mam sakɛ bo Na'ayenɛ mɛ, la n mɛlɛhegɔ la woo poan. 11La ta woŋɛ mam mɛ gaŋɛ, te mam fan' nɔɔrɛ yeti, nɛresaala wo dela ponpɔrɔma. 12Mam wan ta'an lebehe yɔ Na'ayenɛ etesoŋɔ wa te a eŋɛ mam wa? 13Mam han sohora Na'ayenɛ wa, mam wan zɛnkɛ en daam bo'olom la wanɛ bo a yu'urɛ fara n faanrɛ wa zuo. 14N wan bo Na'ayenɛ n nɔpo'ologɔ lɔgɔrɔ, nɛreba nɛŋan. 15Nɛresɛba nini en mɔ'ɛ la Na'ayenɛ, ba kum dele toolom lɔkɔ bo Na'ayenɛ. 16Na'ayenɛ, mam dela ho yameŋa. Mam dela ho tameŋa, ho mɛŋa pɔsɔɔ bia. Hom fan' mam n la banhe poan bahɛ. 17N wan kaanbɛ fara bo'olom bo Na'ayenɛ, ge sohɛ ho yu'urɛ la poan. 18N wan bo Na'ayenɛ n nɔpo'ologɔ lɔgɔrɔ la nɛreba nɛŋan. 19N wan ze'ele hom Na'ayenɛ yire la poan, Yerusalem poan bo n nɔpo'ologɔ lɔgɔrɔ la. Pɛnka dela Na'ayenɛ denɛ.

will be added

X\