Yooma 109

1Na'ayenɛ se'ere te mam pɛngera wa, da sina, 2ge toonfɛn'ɛhadoma la ponpan'aha doma n tɔgɔre mam yele. Ba parone mɛ bɔ'ɔra mam. 3Ba tare la yaarɛ yɛla ma'an kae mam mum. Ba zaberɛ mɛ la mam yoo. 4Ba dekɛ la zɛrɛgerɛ lebeha yɔɔra mam sonɔ la te mam nyɔkɛ la ba la. Ge mam dela boraa en sakɛ hom sohoga. 5Ba dekɛ la be'em yɔɔra mam som la, ge dekɛ yaarɛ yɔɔra mam sonɔ la te mam nyɔkɛ la ba la. 6Loe nɛrebe'o te da sakɛ bo n dima wa. Bahɛ se'em n wan zɛrɛgɛ en ze'ele zɛrɛgɛ en. 7Ba han di a yelehom la, bahɛ te a tara geere. Bahɛ te a mɛŋa sohoga ko en. 8Da bahɛ te a dabeha zo'e. Bahɛ te nɛra sɔe a na'arɛ tom a toonɛ la. 9Bahɛ te a kɔma dɛna keenbehe, te a pɔga kɔ'ɔn yee pɔkɔɔnrɛ. 10Bahɛ te a kɔma ɛɛra sohora. Bahɛ te ba kiilina dabooro la poan. 11Bahɛ te sanɛ daana nyɔkɛ en to'e sɛla woo te a tara. Bahɛ te saama fan' a murugere lɔgɔrɔ zan'an. 12Da bahɛ te se'em zo'ohɛ en, bii zɔ a keenbehe la ninbaanlega. 13Bahɛ te ba ŋmaɛ a yaahe bahɛ, ba saalom ba yu'ura buuri se'a n tagalɛ ba la poan bahɛ. 14Bahɛ te a sɔdoma be'em gan'an Na'ayenɛ nɛŋan saŋa woo, da bahɛ te a ma be'em malom saalom. 15Bahɛ te ba be'em la gan'an Na'ayenɛ nɛŋan saŋa woo, te a ŋmaɛ ba bahɛ te se'em da tɛnra ba yele teŋparɛ wa zuo. 16Se'ere n sɔe la, a ka malom tara zo'ohogɔ a suunre poan. A ne namehɛ la taromdoma, la nahadoma, la sɛba sunya n sagom te ba ta ki'. 17A nɔŋɛ la a tɛn'ɛha be'em bɔ'ɔra sɛba, bala te la me sige a zuo na. A ka bote a kan' bo ayema. Bala, bahɛ te kan'an me zaan la en. 18Tɛn'ɛhebe'ero n de a fuo te a yɛ. Tɛn'ɛhebe'ero kɛn' a iŋa la poan wo ko'om la, kɛn' a koɔnba poan wo kaam la. 19Bahɛ te be'em la nya ana wo fuo la wooe en kae. To ana wo sɛganɛ la bobe en ka malom lɔrɔgera. 20Na'ayenɛ yɔ sɛba n zɛrɛgerɛ mam la, sɛba n tɔgɔre be'em baha mam zuo la wana. 21Ge hom n Daana Na'ayenɛ tare mam mɛ ho yu'urɛ la zuo. Ho zo'ohogɔ la som zuo, fan' mam. 22Se'ere n sɔe la, mam dela taroma, ge dɛna naha. Mam suunre pogolom mɛ. 23Mam ye' mɛ bala wo zanɔɔrɛ ma'ahom la. Ba kpa'ɛ mam bahɛ mɛ wo sonwa'atɛ la. 24Mam ka dite la zuo mam duma ka le tan'na ba'ara, te mam iŋa baanlom tabɛ. 25Mam nya dela kɛhega lɔkɔ bo ba te ba han ne nyɛ mam, ba lobere ba zuto. 26Soŋɛ mam, Na'ayenɛ n Yenɛ wa. Fan' mam la ho zo'ohogɔ la bahɛ. 27Bahɛ te ba baŋɛ yeti, Hom nu'o, hom Na'ayenɛ n tom dɛ. 28Ba tɛn'ɛha be'em, ge hom Na'ayenɛ wan kan' bahɛ en zuo. Ba han zabera la mam, nyanɛ wan di ba, ge hom yameŋa wa wan nyeena. 29Bahɛ te nyanɛ di sɛba n zɛrɛgerɛ mam la. Bahɛ te ba nyanɛ la wooe ba wo fuo la. 30Mam wan dekɛ n nɔɔrɛ wa pɛngɛ Na'ayenɛ. Mam wan pɛngɛ n nɛrekooŋɔ poan. 31Se'ere n sɔe la, Na'ayenɛ ze' mɛ la naha, te a fan' a vom sɛba n yeti ba muguhe en la nu'uhen.

will be added

X\