Yooma 108

1Yenɛ, mam suunre ze' la kaŋkaŋe. Mam wan yoon ge baam la n suunre zan'an. 2Kɔnlɔgɔ la duureŋa wa, ihege ya. Mam wan ŋmɛ' nɛɛ beere. 3Na'ayenɛ, mam wan pɛngɛ hɔ teŋhe teŋasoka. Mam wan yoon ho yɛla nɛreba teŋasoka. 4Se'ere n sɔe la, ho tare la nɔŋerɛ kantɛ la wɔgɛ gaŋɛ saŋgbanɛ wa, te ho sakerɛ sera la paara saŋgbanɛ wa. 5Yenɛ, ho boe saazuin zuin mɛ ha, te ho soŋa to'e teŋparɛ wa zuo zan'an. 6Fan' tɔ, ge soŋɛ tɔ la ho paŋa la, te sɛba te hom nɔŋɛ wa nyɛ faanrɛ. 7Yenɛ tɔgɛ la a fa'a bɔŋa la poan bahɛ na yeti, Mam nyeene mɛ yeti, N wan tɔnrɛ Sekem teŋa wa tehɛ, ge aanhom Sukot bɔn'ɔn wa lobe bahɛ. 8Gilead dela mam denɛ, Manase dela mam denɛ, Epraim dela mam zuowanɛ, te Yuda dɛna mam paŋa. 9Moab dela mam nɔsarɛ, te Edom dɛna mam tagara biŋere zen'an. Mam tanhɛ mɛ nyaŋɛ Pilistia teŋa. 10Ane n wa tare mam wa'an teŋa wa te dangoone mɛ kae ka mum wa poan? Ane n tare mam keŋɛ Edom teŋa wa poan? 11Yenɛ, hom ka zagahɛ tomam mɛ en bala wa? To pɛɛntɛɛnreba wa han yɛ'a pɛɛntɛɛnrɛ, ho ka boe la ba. 12Yenɛ, bo to soŋorɛ te to nyaŋɛ to diŋdoma wa, ge nɛresaala soŋorɛ dela yoo. 13To han keŋɛ la Yenɛ, to wan nyaŋɛ. A wan nɛ to diŋdoma wa taalɛ teŋa.

will be added

X\