Yooma 107

1Bo' Na'ayenɛ fara. Se'ere n sɔe la a ane soŋa. A nɔŋerɛ kantɛ la ka malom tara ba'ahegɔ. 2Bahɛ te sɛba te a yɔ to'e ba la, sɛba te a yɔ to'e ba dima la nu'uhen la mɔɔlɛ en eŋɛ ba se'em la. 3Nɛrebana te a kan'ahɛ ba teŋhe poan, ze'ele dapɔya tole nɛŋa bɔba, ze'ele zuɔ tole gɔbega bɔba na la. 4Ba basɛba daa wa tuuna mɛ pɔgɔtia poan ha, ka mina sore se'ere te ba wan doohe paɛ teŋsɛka poan te ba yɛ'a te ta zin'ire la. 5Te ko'nyuuro kɛngera ba, te kom tara ba, te la wona ba ba vom. 6Te ba kaahɛ bo Na'ayenɛ ba daaŋɔ la poan, te a yehe ba ba ninbaanlega la poan. 7Te a tare ba doohe sɔrɔɔ tontɔɔ ta kɛn'ɛhɛ teŋa la poan te ba ta'an zin'ire. 8Bahɛ te ba bo Na'ayenɛ fara, la a nɔŋerɛ kantɛ la en ka bahere la, la a nyalematooma la te a tona bɔ'ɔra nɛresaala la. 9Enŋa n bo'ore sɛba te ko'nyuuro tara ba, te ba nyuura tegera, ge diiha sɛba kom en duni la la yelesoma. 10Ba dela sɛba n daa zin' lika poan, bɔna nyɔnpɔnhega poan, bɔna paka deo poan nameha la banhe. 11Se'ere n sɔe la, ba bire la poore bahɛ Yenɛ yelehom la, ba zagahɛ la Gaŋɛ zan'an daana la kan'aŋɔ. 12Bala te a dekɛ ba tuunle namehegɔ seko n tɔe, te ba gɛnta, te se'em ka bɔna wan soŋɛ ba. 13Te ba nya kaahɛ bo Na'ayenɛ ba daaŋɔ la poan, te a fan' ba ba ninbaanlega la poan bahɛ. 14A tare ba mɛ ze'ele lika la poan yehe na, nyɔnpɔnhega la poan yehe na, nya kɔ' ba banhe la bahɛ. 15Bahɛ te ba bo Na'ayenɛ fara, la a nɔŋerɛ kantɛ la en ka bahera la, la a nyalematooma la te a tona bɔ'ɔra nɛresaaleba la. 16Enŋa n kɔ' nyɔgom nayahe, ge ŋma kuto nayahe bahɛ. 17Ba pobirega la poan, sɛba lebege la geto, ge nyɛ pogoloŋɔ, ba toonbe'ero la zuo. 18Ba kan le ta'an di, ge yɛ'a kum nɔɔrɛn. 19Te ba kaahɛ bo Na'ayenɛ ba daaŋɔ la poan, te a fan' ba ba ninbaanlega la poan. 20A tom la a yelehom la na, te bo tebɛ ba. A fan' ba mɛ yɔɔ nɔɔrɛn bahɛ. 21Bahɛ te ba bo Na'ayenɛ fara la a nɔŋerɛ kantɛ la, la a nyalematooma la te a tona bɔ'ɔra nɛresaaleba la. 22Bahɛ te ba tare fara bɔ'a bo'olom na kaanbɛ en, ge dekɛ a tooma la yoon yooma. 23Sɛba daa boe la ko'om poan la ɔɔnrɔnɔ, ba dela kɔɔhereba ko'kantɛ mea poan. 24Ba nyɛ Na'ayenɛ tooma la mɛ, ba nyɛ a nyalema en ane se'em ko'om mea poan mɛ. 25Se'ere n sɔe la a yetɔgom ma'an n gbirige ko'om la, te bo ko'mi'inhe kanra ŋmɛ'ɛra. 26Bo ŋmɛ'ɛre la bala zɔna saazuo ha, ge lɛbera sigera teŋa na, te daaŋɔ la bahɛ te ba kiinla kɔ'ɔhɛ. 27Te ba wola, ge gɛnta wo ba buge mɛ la. Ba boe la ba ba'ahegɔ beenɛ en bala. 28Te ba kaahɛ bo Na'ayenɛ ba daaŋɔ la poan, te a fan' ba ba ninbaanlega la poan bahɛ. 29Enŋa n go'e saabeeokeŋɔ la te ko lɔbera fola fola, te ko'kantɛ ko'mi'inhe kanra ma'ɛn zan'an. 30Lan ma'ɛn la, ba poorɛ pee mɛ, te a tare ba bala ta paɛ ba ye'ehego zen'an. 31Bahɛ te ba dekɛ pɛnka bo Na'ayenɛ, la a nɔŋerɛ kantɛ la, la toon nyalema se'a te a tona bɔ'ɔra nɛresaaleba la. 32Bahɛ te ba zɛnkɛ en nɛreba lagaŋɔ la poan, ge pɛngɛ en keendoma la nɛŋan. 33Yenɛ n bahera te kolaahe lebege pɔgɔtia, te bɔgɔhe en zote ku'e gan'an kɛ'ɛhe, 34Enŋa n bahera te samana soma sabagɛ, sɛba n kɛn'ɛre bini la toonfɛn'ɛha la zuo. 35Te a bahɛ te pɔgɔtia zen'an lebege bɔgɔhe, te teŋkɛ'ɛŋa zen'an lebege kolehe. 36Bilam te a tare sɛba te kom tara ba wa na bahɛ, te ba nyɛ teŋa la, nya kɛn'ɛra. 37Te ba borɛ dia, ge sɛ tiihe, te se wom velegɛ. 38Te a kan' bahɛ ba zuo, te ba kanlɛ malom pa'ahɛ gaŋɛ. Te a bahɛ te ba dunhe ka kiira. 39Te muguhego, nɔyalegerɛ, la ninbɔn'ɔn sigehe ba teŋa na te ba kanlɛ la sirige, 40Te Na'ayenɛ ka'ɛ a sunsunyiim bahɛ nɛrekanreba zuo na la. Enŋa n bahɛ te ba ɛɛra tuuna sɔrɔtɔ yooro zuo. 41Ge a zɛnkɛ taromdoma la mɛ yehe pogoloŋɔ la poan, bahɛ te bama nɛreba wi'ira wo piihe la. 42Te se'em n de tontɔɔ la nyɛ nyeena, ge te toonfɛn'ɛhadoma mum ba nɔya. 43Se'em n tare yam, bahɛ te wom yele ana wa, la a mina Na'ayenɛ zo'ohogɔ la.

will be added

X\