Yooma 105

1Bo' Na'ayenɛ fara. Yi' a yu'urɛ la. Mɔɔlɛ enŋa n tom sɛla la bo teŋhe. 2Yoon bo en. Yoon pɛngɛ a yu'urɛ la. Mɔɔlɛ a yelekerehe la zan'an. 3Tara popeelom a fa'a yu'urɛ la poan. Bahɛ te sɛba sunya en eere Na'ayenɛ la nyeena. 4Beha Na'ayenɛ, la a paŋa la. Ɛɛra en saŋa woo. 5Tɛnra nyalema se'a te a tom. A kerehe tooma la, la a gankerɛ la te yele la. 6Abraham n de Na'ayenɛ yameŋa yaahe wa, n de Yakob buuri te a loe wa, 7Na'ayenɛ to Yenɛ. A gankerɛ boe teŋparɛ wa zuo woo mɛ. 8A tɛnre a nɔbiŋere la mɛ wuuha. A tɛnre a nɔɔrɛ la te a bo la mɛ yɛ'a paara saŋa tuhure poan ha. 9Nɔbiŋere se'ere te a biŋe la Abraham la, la pɔtɛ se'ere te a pɔ' la Isaak la. 10A tom dɛ mɛ bo Yakob te de dɛna malema, ge ton de bo Israel te de dɛna nɔbiŋere n ka tare ba'ahegɔ yeti, 11yamam te n wan dekɛ Kanaan teŋa wa bo te ka dɛna ya tɔntɛ te ya sɔna. 12Ba nan pɔ'ɛ la, seren nan ba' pɔ'ɛ la, ge dɛna saama ka poan la, 13ba nan eere nyaanra mɛ lɔ'ɔha teŋhe, ze'ele sɔ'ɔlom loŋe sɔ'ɔlom. 14Te a ka bahɛ te nɛra muguhe ba. A tanhɛ nadoma mɛ ba zuo. 15Da makɛ kalom se'em te mam sɔ' en la kaam wa. Da daam mam nɔtɔgɔha. 16Yenɛ dekɛ la kom bahɛ teŋparɛ wa zuo na, te dia ka bɔna, 17ge tom a nɛreba nɛra Yosef, te ba koohe en te a dɛna da'aberɛ, te a deŋɛ ba nɛŋa na. 18Te ba ba'a na'ma la zɔntɔ, lo a nyugela la zɔntɔ, 19gura te enŋa Na'ayenɛ n yele se'em la ta wana tom. Na'ayenɛ yelehom magahɛ Yosef behɛ mɛ. 20Te naba la tom te ba ta yehe en na. Nɛreba naba la te ba nya bahɛ en na. 21Te naba wa bahɛ en te a dɛna a yire la zan'an daana, beha a lɔgɔrɔ zan'an, 22ge te a tara kpe'eŋo gana nabiihe la, ge pa'ala naba wa bonkɛgehe la yam. 23Te Israel ta wa'an Mizraim na. Yakob wa'an Mizraim mɛ na, dɛna saana kɛn'ɛra Ham. 24Te Yenɛ bahɛ te a mɛŋa nɛreba wa wi'ɛ. A eŋɛ ba mɛ te ba wi'ɛ te ba kanlɛ zooe ba diŋdoma, 25Te Yenɛ bahɛ te ba yaɛ a mɛŋa nɛreba la, nya naara taaba zabera la a yamehe la. 26Te a nya tom a yameŋa Moses, la Aron se'em te a loe la. 27Te wa'ana tom nyalema nɛreba wa teŋasoka. Ba tom la nyalema Ham teŋa. 28Te a tom lika te ka wa'ana lige teŋa la. Ba ka zagahɛ la Na'ayenɛ yelehom? 29Te a bahɛ te ba ko'om lebege ziim, te ba zim ki. 30Te lono wa'ana perɛ ba teŋa la kɛn'ɛra ba kpɛ'ɛndoma la bɔ'gan'atɔ poan. 31Te Yenɛ tɔgɛ te zun'uhe bibige na, sagom ba teŋa la zan'an. 32Te a bahɛ saa ni kuga, te saa bugum sigera ba teŋa la poan zen'an woo, 33sagom ba dia tiihe, la ba kenkanhe, ge voen ba teŋa la tiihe zan'an bahɛ. 34Te a tɔgɛ te sonwa'ara wa'ana, sonwa'ara n ka tara kanlɛ, 35obe bonbule woo n soboge ba teŋa la poan, obe sɛla woo n bule ba teŋa la poan yehe na. 36Ge nya ko ba bikeema woo teŋa la poan. Ba boraanɛ pɔhega wɔla n bala. 37Ge nya tare Israeldoma yehe na, te ba unhura la sanlenpeelega, la sanlema, te taroma ka bɔna ba poan. 38Te Mizraim poorɛ pee la bama yehe la. Se'ere n sɔe la, Israel zuo te yɛla la luta ba zuo la. 39Te a yeregɛ saŋgbanɛ te de pin' ba, ge dɛna bugum bo ba yu'uŋɔ. 40Te ba sohɛ en, te a bo ba kɔrɔhe, ge tegehɛ ba la dia n ze'ele saazuo na. 41Te a yu'ɛ taŋa, te ko'om ɔlɔgɔra na, eŋɛ wo kolaa la, zɔta sigera pɔgɔtia la poan ha. 42Se'ere n sɔe la, a tɛnre a nɔbiŋere la te a biŋe la a yameŋa Abraham la mɛ. 43A tare a nɛreba yehe mɛ na la nyeema. A tare sɛba te a mɛŋa loe la yehe mɛ na la nyeema voole, 44dekɛ nɛreba basɛba teŋhe bo ba, te ba sɔe sɔna sɛba murugere bonɔ, 45te ba ta'an tara a malema la, ge dɔla a pa'alegɔ la. Pɛngɛ Na'ayenɛ.

will be added

X\