Yooma 103

1Mam suunre wa pɛngɛ Na'ayenɛ. Mam wan pɛngɛ a fa'a yu'urɛ la. 2Mam dekɛ n suunre zan'an pɛngɛ la Na'ayenɛ, n ka malom tamɛ a som la. 3A bahɛ to be'em bɔ'ɔra tɔ. A tebere tɔ. 4A to'e to kum poan. A dekɛ a nɔŋerɛ kantɛ la vugule to zuo, ge vuge to la a zo'ohogɔ la. 5A tegehere tɔ vom dabeha la yelesoma, te to kpe'em wo tuguho. 6Na'ayenɛ n tɔgɔre soŋora sɛba n boe muguhego poan. 7A pa'alɛ a sore bo Moses la, te a pa'alɛ Israeldoma zan'an a eŋɛ la se'em. 8Na'ayenɛ dela ninbɔn'zɔta, la zo'ohogɔ daana, ka eta suunre tɔtɔ, ge tara nɔŋere kantɛ. 9A ka tanhere tɔ saŋa woo. A sunsunyiim kan bɔna la tɔ saŋa woo. 10A ka eŋɛ tɔ wo to be'em la en nare se'em, bii a namehe tɔ wo to be'em la en nare se'em la. 11Wo saazuo yɛ'a teŋa na n zone se'em la, a nɔŋerɛ kantɛ zone la bala mea bo sɛba n zote en la. 12A dekɛ tomam be'em lobe zaan mɛ wo dapoore bɔba n zaan la zanɔɔrɛ bɔba se'em la. 13Na'ayenɛ zote sɛba n zote en ninbɔn'ɔn mɛ, wo sɔ en zote ka kɔma ninbɔn'ɔn se'em la. 14A mi' tomam n pɔhɛ se'em me na. A mi' te to dela tentɔnɔ. 15Nɛresaala vom dabeha ane me wo mɔɔ la, zɔ'ɔra pɔla pɔla wo tia puuro la, 16ge sabeeo han lobe, ba ne suuɛ la zan'an te ba ka tɛnra ba yele. 17Na'ayenɛ nɔŋerɛ kantɛ la ka tare ba'ahegɔ bo sɛba n zote en la, te a tontɔɔ bɔŋa la bɔna la ba kɔma me kɔma la 18sɛbadoma n teenre a nɔbiŋ'a la ge dɔɔla a kan'aŋɔ la. 19Na'ayenɛ zin' la saazuo ha ge sɔna teŋa wa zuo doma behera. 20Na'ayenɛ soŋoreba zan'an, pɛngɛ ya en. Yamam paŋadoma sɛba n ete sɛla te a bɔta wa, la yamam sɛba n nane a yelehom la, pɛngɛ ya en. 21Na'ayenɛ pɛɛntɛɛnreba wa, pɛngɛ ya en. Yamam sɛba n nane a yelehom la pɛngɛ ya en. 22Mam dekɛ pɛnka bo Na'ayenɛ la n suunre zan'an. Sɛla woo n boe Na'ayenɛ nu'uhen la pɛngɛ ya en.

will be added

X\