Magaha 28

1Toonfɛn'ɛhadaana wan zɔta ge te se'em ka digera en, ge tontɔɔdaana la wan kpeem wo gbegenpaalega. 2Teŋsɛka doma n tom be'em, ba teehene ka poan nadoma la saŋa woo, ge teŋsɛka n tare naba n yehegɛ ge dɛna yamdaana teŋa wan kpeem ge me sɛ' ze'ele. 3Naba sɛka n muguhere nahadoma ane wo ko'sebego saa en ka maalɛ dia se'em la. 4Sɛba n ka dole pa'alegɔ la n pɛngere toonfɛn'ɛhadoma. Sɛba n dole pa'alegɔ zaberɛ mɛ la nɛrebɛ'ɛhe. 5Be'emdoma ka mi' sɛla n de ma'an, ge sɛba n kpeŋere ba mea te ba doohe Daana tare bɔkere soŋa. 6Naha n de birikina nyane dakanrɛ n de ponpɔrɔma bii nɛre ŋmɛleŋɔ. 7Se'em n dole pa'alegɔ la dela yamdaana, ge se'em n dole la nɛreyaalehe tare la vi kɛn'ɛha a sɔ. 8Nɛreba han tara ho sanɛ te ho pɛnrege ba te ba yɔ' nyuurɔ pa'ahɛ bini te i zo'e, daanse'ere i wan zo'e, ge ayema wan to'e i soŋɛ nahadoma. 9Ho han ka doohe pa'alegɔ la, ho Yenɛ po'ohegɔ dela be'em. 10Se'em n bahɛ te tontɔɔdaana bɔrege sige be'em sore poan, a mea wan lu boko poan. Ge som wan dɛna sɛba n ka tare tuure la denɛ. 11Dakanrɛ tɛn'ɛhere te a tooma dela yam tooma, ge naha n tɛn'ɛhere soŋa ge bɔkera dakanrɛ la n ane se'em. 12Yelemɛŋɛrɛdaana han bɔna nɛŋa, la dela popeelom saŋa, ge nɛre ŋmɛlema han bɔna nɛŋa, la ne ana soŋa te nɛreba soge. 13Ho han sogora ho be'em ho kan malom lebege nɛra. Porɛ ho be'em la ge bahɛ bo te Yenɛ wan zɔ ho ninbɔn'ɔn. 14Ho han na'aha Na'ayenɛ la ho tare popeelom me daarɛ woo, ge ho eŋɛ tobekperega, ba'ahegɔ poan ho boe la daaŋɔ poan. 15Naba potɔya se'em n muguhere nahadoma gane gbegenɛ n wuunɛ. 16Naba sɛka n ka tare yam somɔ wan dɛna potɔya ge tara muguhego, ge se'em zagahɛ te a kan pim nɛreba dɛna dakanrɛ wan vɔ yu'e. 17Da soŋɛ ya nɛrekooreba, bahɛ ya te la wunɛ ya ba bala gura ba kum. 18Se'em n de birikinte boe la fai, ge se'em n ŋmɛlene wan nyɛ' sagaŋɔ. 19Sɛba n kɔɔre ba va'am wan kɛ' dia zo'e, ge se'em n dole yaala wan dɛna nahe kɔɔlege. 20Se'em n de yelemɛŋɛrɛdaana wan to'e yɔɔre zo'e, ge Yenɛ wan namehe se'em n zegere te dɛna dakanrɛ tɔtɔ tɔtɔ. 21Se'em n koore doolom gankere poan tue mɛ. Se'ere n sɔe la se'em ta'an tom se'ere dia zuo. 22Bonbɛ'ɛleŋa kanbele te a nyɛ' lɔgɔrɔ, ge ka mina te a ba'ahegɔ dela nɔŋɔ. 23Ho han pa'alɛ nɛra ma'an, depooren ba wan wa'ana po'ohe hɔ, la nyane ho pan'ahere ba. 24Se'em n tɛn'ɛhe te n fan' sɔ bii ma la dagɛ yele, la ane wo se'em n gu' sɔrɔɔ zuo faanra. 25Bonbɛ'ɛleŋa tare la zaberɛ la daaŋɔ a giŋgiliŋa la poan, ge se'em n dele Na'ayenɛ wan malom nyɛrege mɛ. 26Se'em n delom a mea potɛn'ɛrɛ dela gerego, ge se'em tare yam wan piiɛn dɛŋa poan. 27Se'em n bo'ore nahadoma kan malom koŋe sɛla, ge pɔtɛ dole se'em bire poore bahɛ nahadoma. 28Potɔpa han dɛna nɛŋadoma, nɛreba ne sogɛ mɛ, ge potɔpa kpe'eŋo la han lu', nɛresoma n de nɛŋadoma.

will be added

X\