Magaha 25

1Solomon yetɔgɔbiŋa a se'a n wana te Yuda naba Hezekia nɛreba tɔgɔhɛ golehɛ biŋe. 2Nɛreba na'ahere Na'ayenɛ. Se'ere n sɔe la a ka toonɛ a tooma peelomɛ, ba na'ahere nadoma. Se'ere n sɔe la ba vɛɛnhere yɛla. 3Wo saazuo ha n zaan se'em la, te teŋparɛ wa kɔ' sige se'em wa, nadoma sunya ane la bala te se'em kan nyaŋɛ baŋɛ. 4Pakɛ dɛngerɔ sanlenpeela poan, te kuta la ta'an maalɛ laa. 5Bala mea te ba yehe potɔpa naba nɛŋan, te naba la tana behera a nɛreba la tontɔɔ. 6Da eŋɛ ho mea wo nɛrekantɛ naba nɛŋan, bii ho zi'a nɛrekanreba zin'irego zen'en. 7Se'ere n sɔe la, la ane soŋa te ba yi' ho yeti, tole ka'lam na, nyana ba ta yehe ho nɛre nɛrekanreba la nɛŋan lebe pooren. 8Da kanbelɛ tare tɔgɔ yia. Se'ere n sɔe la, se'em ha ta diihe ho nyanɛ, ho wan eŋɛ la wane? 9Hon la ho tadaana han tara nɔkpe'ene, da pirege se'em yele pa'ahɛ, 10han dagana bala, se'em han wom, a wan diihe ho nyanɛ, te ho yu'urɛ sagaŋɔ la ka tara ba'ahegɔ. 11Hon tɔgɛ yetɔgom bo narehom saŋa, la ane wo sanlema kuga te ba maalɛ kɛn'ɛhɛ sanlenpeela poan la. 12Wo sanlema nu'toa n naɛ la sanlema zonregɔ se'em la, bala te tanhega naara la se'em n kelehe tanhega. 13Dia kɛ'a saŋa murugere te ko'ma'ahega ma'ara iŋa se'em la, bala mea te se'em n tom tontonbirikina ana. 14Wo saŋgbana la sabeeo n ziire yoo kan ni saa la, bala te se'em n ŋmɛ'ɛre nyɔn'ɔn te a wan bo bo'olom ge ka bo ana. 15Sugurom en pan'ahere naba, te yetɔgɔsomɔ paŋa giinla. 16Ho han nyɛ seerom, di makɛ ge ho han yeti ho di gaŋɛ, ho wan tin bahɛ na. 17Da bahɛ te ho na'ma ba ana lenɛ la ho sɔɔn yire, ge a sea wan ta yehe ho, te a yaɛ ho. 18Aze'elenyɛdaana se'em n parone bɔ'ɔra a tadaana ane mɛ zaberɛ gulumagu'o, bii so'a, bii pɛɛnɛ la, bo en. 19Ho han dekɛ ho mɛŋa delom nɛreyore daaŋɔ saŋa, a ane wo ho dite mɛ la nyɛnpunha, bii ho na'arɛ en kpirege. 20Ba han yoon yooma bo sunsagaŋɔ daana la ane wo ba eŋɛ la du'urɔ eŋɛ nɔtɛ poan bii ho ze' beele la ɔɔrɔ poan. 21Ho diŋdaana kom han dona, bo en dia te a di. Ko'nyuuro han tara en, bo en ko'om te a nyu'. 22Se'ere n sɔe la, ho vaare la bugumsaana la bugum pagela a zuo, te Na'ayenɛ wan yɔ hɔ. 23Sabeeo seko n ze'ete zuɔ nu'o bɔba na n tare saa, bala mea te se'em n dole waahena nɛreba tara nɛbobegere kena. 24La ane soŋa te ho gan' gɔhɔgɔ nyane, hon boe bɔ'ɔ poan la pɔgɔnyunyuŋa. 25Ko'ma'ahega n koore nɛra n tom tarege ko'nyuuro se'em, bala mea te nɛra poore peera la sɔɔleŋa n ze'ele sateŋzaanrɛ na. 26Tontɔɔdaana han bahɛ te nɛrebe'a pan'ahe en, a ane wo bulega te ba gbirun te bo ko'om dɛngɛ se'em la. 27La ka ane soŋa te ho di seerom zo'e, bala mea da pɛngera nɛreba zo'ora. 28Nɛra han ka tana a suunre di'inha, la ane wo teŋa en ka tare sɛla n gu'ure dela.

will be added

X\