Magaha 20

1Daam bahɛ te ba kɛhega ho mɛ, daam kpe'eŋo bahɛ te nɛra vɔɔla ge zabera, hom se'em n bugure ka tare yam. 2Naba sunsunyiim ane mɛ wo gbegenɛ en tanhere la, se'em n nyie naba suunre kan vɔna. 3Se'em n yehe a mɛŋa zaberɛ poan nyɛte la na'ahegɔ, ge gerego woo zaberɛ mɛ. 4Zinyanka ka kɔɔre seɔn, bala kɛ'a saŋa ka nyɛte sɛla. 5Potɛn'se'a n boe asaala poan la kɔ' mɛ wo bulega la, ge bɔkere daana wan yehere a. 6Nɛreba zo'e zo'e yeti bama dela birikindoma, ge ho wan nyɛ' birikina la bɛha? 7Tontɔɔdoma kenɛ mɛ la birikinte, te ba kɔma dɛna popeelomdoma. 8Naba en zin' a na'am gɔŋɔ gankera, yelegere la be'em woo. 9Ane wan ta'an yeti enŋa suunre ka tare faai, te be'em ka bɔna a poan. 10Piŋa lɔgɔrɔ magahegɔ dela yelefɛn'ɛha Na'ayenɛ nɛŋan. 11Nɛreba baŋere bodibipaalega te a dela tontɔɔ la sera, la etegɔ poan. 12Tobe se'ere n wone, la nin sebo n nyɛte, Na'ayenɛ n maalɛ ba zan'an. 13Da ginha ge nɔŋɔ wan nyɔkɛ hɔ, pekɛ niho te ho wan tegɛ. 14Se'em n da'are lɔkɔ ne yeti, ko ka ane soŋa, ge a han da' ba'ahɛ keŋɛ a ta ŋmɛ'ɛra la nyɔn'ɔn. 15Sanlema boe, te kuga mɔlebagenɛ bɔna, ge baŋere la dela toolom bonɔ. 16Se'em n ze'ele to'e sanɛ bo saana, to'e ya a fuo biŋe, se'em n ze'ele to'e sanɛ bo saana la, bahɛ ya te a yɔ. 17Dia te nɛra pan'ahɛ to'e zan'anhom mɛ, ge pooren, a nɔɔrɛ la wan perɛ la tentɔnɔ. 18Kɛlehe kan'aŋɔ ge baŋɛ hon wan eŋɛ se'em, gu' ho mɛŋa la yam ge zabɛ. 19Yelebibiha pirihe la yɛla, bala da lagona la yelebibiha. 20Ho han zɛrɛgɛ sɔ, bii ma, a wan ki' keŋɛ lika poan. 21Ho han fan' lɔgɔrɔ vaɛ kalam, ho kan ba'ahɛ soŋa. 22Da yeti n wan lerege be'em, gura Na'ayenɛ te a soŋɛ ho. 23Piŋa lɔgɔrɔ magahegɔ fɛn'ɛn mɛ Na'ayenɛ nɛŋan, lɔgɔseko n tare magaha ha la han dagana ma'an la ka ane soŋa. 24Na'ayenɛ n zengehe to na'ma wa, se'em ka boe wan baŋɛ la wan ana se'em beere. 25La dela tuure te ho kanbelɛ yeti bonɔ wa dela Na'ayenɛ dene ge pooren ta tɛn'ɛhɛ la yele. 26Naba sɛka n de yamdaana yelegere potɔpa la mɛ namehe ba. 27Nɛra sea ane wo nɛɛhom te Na'ayenɛ tara beha te puuren yɛla zan'an. 28Zo'ohogɔ la yelemɛŋɛrɛ n tare naba, zo'ohogɔ en bahɛ te a behera a zen'en la. 29Bonbilipaalehe nyeema dela ba paŋa ge bonkɛgehe soŋa dela ba zupeelego. 30Ho han feebe nɛra la wan bahɛ te a tee a be'emtooma la poan ge dɛna nɛresoŋɔ.

will be added

X\