Magaha 19

1Naha n de birikina, nyane ponpɔrɔma n de gerego. 2Ho han bɔta sɛla ge ka tara yam la ka ane soŋa, te atɔtɔ daana me baha sore. 3Nɛra mɛŋa gɔɔnɛ n sagone en, ge te a zabera la Na'ayenɛ. 4Tarega yi'ire la zɔdoma, ge naha ka tare zɔ. 5Aze'elenyɛdaana se'em n parone kan keŋɛ fai, ponpɔrɔma me kan peɛn. 6Nɛra woo eere la soŋorɛ se'em bo'ore zen'en, te nɛra woo me bɔta ba dɛna se'em n bo'ore zɔ. 7Naha sɔɔnrɔ zan'an yaɛ en mɛ, ge a zɔdoma mɛ wan eŋɛ en la wane, a wan doohe ba poore la yetɔgom ge ba pon kan kelehe en. 8Yam tarega dela ho mɛŋa nɔŋerɛ, te bɔkerɛ tara som. 9Aze'elenyɛdaana se'em n parone kan keŋɛ fai, ponpɔrɔma wan mɛlom. 10La ka nare gerego bɔna na'am poan, bii yameŋa sɔna nabia beha. 11Nɛra n tare bɔkere ka ete sunsunya tɔtɔ, ge te la dɛna nyeema bo en te a bahɛ nɛra tuure bo en. 12Naba sunsunyiim ane woo gbegenɛ tanhere la, ge a nɔŋerɛ ane wo mɛgelom n lute mɔɔ zuo la. 13Bigɔɔŋɔ tare la ninbaanlega bɔ'ɔra ka sɔ, te pɔgɔ nyunyɔŋa ane mɛ wo ko'om n tɔgɔhe ho bɔ'en. 14Ho vaare yire la tarega la sɔ zen'en, ge Na'ayenɛ n bo'ore pɔgɔsɛka n tare potɛn'sonɛ. 15Zinyangarɛ bo'ore la gɔɔm, te kom wona azin'yoodaana. 16Sɛba n dole nɔze'elego la wan nyɛ vom, ge sɛba n zagahɛ a la wan ki'. 17Hom se'em n ete som bɔ'ɔra nahadoma, tare pɛmɛha la Na'ayenɛ, a wan lebehe yɔ hɔ. 18Te'ele dɔnlegera ho kɔma toba te la nyɛte wa, ge da bɔta ba sagaŋɔ. 19Sunsunyiim daana wan to'e a sunsɔn'a la yɔɔrɛ, ho han to'e en bahɛ beere la dɛna la bala mea. 20Kɛleha kan'aŋɔ, ge tɔ'ɔra tobedɔnlegerɛ, te ba'ahegɔ poan la ho wan tara yam. 21Asaala suunre ta'an tɛn'ɛhɛ yɛla zo'e zo'e, ge Na'ayenɛ n bote se'em n tone. 22Sɛla n nare la nɛra dela zo'ohogɔ, la me ane soŋa te ho dɛna naha, nyana ho ponpɔrɔma. 23Na'ayenɛ zɔɔlom dela vom, se'em n tare bala boe la fai te daaŋɔ ka paara ho. 24Zinyanka han dekɛ nu'o tom laa poan, a kan foe ko. 25Ŋmɛ' nɛre kɛha, te yampɔ'ɔredaana nyɔgɛ yam, tanhɛ yamdoma ge a wan malom nyɛ yam. 26Sɛba n pogolenɛ ba sɔdoma, ge digera ba madoma dela kɔmsɛba n tare nyanɛ, la vi. 27N bia, ho han ka kɛleha kan'aŋɔ, ho wan bɔregɛ yam yelehom wa poan. 28Aze'elenyɛdaana yore ka dekɛ sera yi' sɛla, te potɔpa vɔla be'em ma'an. 29Sagaŋɔ n gure nɛre kɛhereba, te ŋmɛ'ɛrɛ gura geto pɔya.

will be added

X\