Magaha 16

1Tɛn'ɛhegɔ yɛla dela saala toonɛ, ge zɛleŋa leregere ze'ete la Na'ayenɛ zen'an na. 2Nɛra sore woo ane la soŋa a ninin, ge Na'ayenɛ behere la puuren. 3Dekɛ ho sɛla woo bo Na'ayenɛ, te hom en tɛn'ɛhe sɛla woo tom soŋa. 4Na'ayenɛ maalɛ sɛla woo mɛ la de toonɛ, ge mɛ maalɛ toonfɛn'ɛhadoma daaŋɔ dabeha la zuo. 5Nɛre wuruba woo fɛn'ɛn mɛ bo Na'ayenɛ, bala mina te ba kan peɛn namehegɔ. 6Zo'ohogɔ la yelemɛŋɛrɛ n kiinhe be'em, te Na'ayenɛ zɔɔlom yɛhera nɛra be'em poan. 7Nɛra tooma han tegɛ Na'ayenɛ nini, a ne bahɛ te ba diŋdoma tara la sunma'ahom la ba. 8Hom dole tontɔɔ ge tara fiin nyane hom pin ge tara zo'e. 9Saala suunre ta'an tɛn'ɛhɛ se'ere, ge Na'ayenɛ n pa'ale sore la. 10Naba tɔgɔre bɔ'ɔra la Na'ayenɛ nɔɔrɛ, a nɔɔrɛ ka tone be'em gankerɛ poan. 11Yelemɛŋɛrɛ lɔgɔmagehegɔ dela Na'ayenɛ denɛ, Yenɛ n eŋɛ sɛla woo n boe botere poan tebegɛ se'em la. 12La dela kihire te nadoma tona be'em. Se'ere n sɔe la na'am gɔŋɔ dela tontɔɔ bonɔ. 13Nadoma bote la tontɔɔdoma yetɔgom, te a puurɛ pɛɛra la sɛba n tɔgɔre tontɔɔ. 14Naba sunsunyiim dela kum te a tom, ge yamdaana wan lɔkɛ dɛ. 15Naba nɛŋa han lorege, vom boe mɛ, te a zo'ohogɔ ana wo sigisaa saŋgbana n tare saa kena na la. 16La ane soŋa te ho ɛɛra yam la bɔkerɛ gana sanlema la sanlenpeelega. 17Yelemɛŋɛrɛ daana sore dela a yɛhe be'em poan, a gu'ure la a vom. 18Ho han pa'alɛ ho mɛŋa ho nyɛte la sagaŋɔ, ho han zɛɛna nɛreba ho lute mɛ. 19La ane soŋa te ho sigehe ho mɛŋa bɔna la taromdoma, gana ho ton ta fan' lɔgɔrɔ la pa'alɛ mɛŋadoma. 20Se'em n tone la yam yɛla nyɛte la yɔɔrɔ, se'em n dele Na'ayenɛ tare la popeelom. 21Yamdaana tare la potɛn'sonɛ, ba kelehe yetɔgɔsomɔ daana mɛ. 22Yam somɔ ane wo vom bulega la, ge te geto nyɛta namehegɔ ba geretooma poan. 23Yamdaana gu'uhe a yetɔgom mɛ, ge te ba kɛleha en. 24Yetɔgɔsomɔ ane mɛ wo seerom la, zan'anhom ge kpɛ'ɛra giinla. 25Sore boe mɛ ana soŋa, ge de ba'ahegɔ dela kum. 26Tontona puure n bahɛ te a tona, kom n pɛnregere en te a tona. 27Nɛrebe'a eere la be'em, te a yetɔgom dita wo bugum la. 28Zabɔta gbirigere la zaberɛ, te se'em n dole waahena, yelegera zɔdoma. 29Gbiteba ne pan'ahɛ la ba sɔɔnrɔ, tare ba ta kɛn' zen'an n ka ane soŋa. 30Se'em n mumuhe nini dela dondonta, te se'em mum a nɔɔrɛ bahɛ te be'em tona. 31Zupeelego dela nyeema muŋa, ko dela tontɔɔvom nyonrɔ. 32Se'em n tan' a suunre din'inha, nyane paŋadaana, te se'em suunre en ka ihegere tɔtɔ nyana se'em n zabɛ nyaŋɛ teŋa. 33Ba ta'an ŋmɛ' gbaŋa, ge Na'ayenɛ potɛn'ɛrɛ n de zan'an.

will be added

X\