Magaha 15

1Leregere se'ere n ane baanlam koore la sunsunya, ge nyabega ihegere la suunre. 2Yamdaana zɛleŋa tare la bɔkerɛ, ge geto nɔya tɔgɔre la gɔɔnɛ. 3Na'ayenɛ niho nyɛte nɛra woo mɛ, beha be'em la som zan'an. 4Zɛleŋa soŋa bo'ore vom, ge ponpɔrɔŋɔ han bɔna ka poan, ka koore la sea. 5Gerego n ka kelehere a sɔ tobedɔnlegerɛ, ge se'em n to'ohe tanhega dela yamdaana. 6Yamdaana yire poan, lɔgɔrɔ buge mɛ, ge daaŋɔ n sigere potɔpa lɔgɔrɔ zuo. 7Yamdoma pa'ale la bɔkere, ge geto suunre ka ane bala. 8Potɔpa kaanbegɔ fɛn'ɛn mɛ bo Na'ayenɛ, ge a toba kelehe tontɔɔdoma sohoga mɛ. 9Potɔpa sore fɛn'ɛn mɛ bo Na'ayenɛ, ge a nɔŋɛ la sɛba n dole som. 10Se'em n zagahɛ sore la, a ne nyɛ la tobedɔnlegerɛ, ge hom se'em n ka bote tanhega wan ki. 11Kum, la yɔɔ gan' la Na'ayenɛ nɛŋan, a mi' nɛra suunre gana bala. 12Nɛre kɛhereba ka bote tanhega, ba kan keŋɛ yamdoma zen'en. 13Sunsonɛ n bo'ore nɛŋsoŋa, ge suunre se'ere n sagom, koore la sea. 14Se'em n tare bɔkerɛ en eere la yam, ge geto nɔya tɔgɔre la gɔɔnɛ. 15Se'em n boe too poan dabahese'a woo la, dela dabeha be'o ge sunsonɛ tare la de'eŋɔ daarɛ woo. 16Hom tare fiin ge zɔta Na'ayenɛ nyane hom tare zo'e ge tara daaŋɔ. 17Hom obere zen'vɔɔnrɔ ge tara nɔŋerɛ nyane hom obere nɛnɔ, ge te yaarɛ bona. 18Sunsunyiimdoma gbirigere la daaŋɔ, ge sɛba n ta'an ba' nɔya tara ne kiinhe la sunsunyiim. 19Zenyanka sore kpanrɛ mɛ la gɔn'ɔhe, ge tontɔɔdoma sore gan' la filam. 20Yam bia bo'ore la ka sɔ nyeema, ge kɔma geto ka nane ba madoma. 21Geretooma dela nyeema bɔ'ɔra yampɔ'ɔredaana, ge se'em tare bɔkerɛ kenɛ la tontɔɔ. 22Kan'aŋɔ han ka bɔna, yɛla sagone mɛ, ge kan'aneba han zo'e nyaŋerɛ n boe. 23Lebehe soŋɔ bo'ore la nyeema, te a maahom tɔgɛ me ana soŋa. 24Yamdoma dole la vom sore la kena tontɔɔ te ba da lu kum poan. 25Na'ayenɛ gbi'ire pa'ale mɛŋa doma yiya bahera mɛ, ge a behere pɔkɔɔnrɛ beene woo mɛ. 26Be'em maaheŋɔ fɛn'ɛn mɛ Na'ayenɛ nɛŋan, ge yetɔgɔnyɛlegɔ ka tare dɛngerɔ. 27Sɛba n pini te ba tara la, ba eere la daaŋɔ biŋera ba yiredoma, ge sɛba n kihi mu'ure bo'olom wan vɔna. 28Tontɔɔdaana potɛn'ɛrɛ ne maahom la n wan lerege se'em ge potɔya nɔɔrɛ ogore la be'em. 29Na'ayenɛ zaan mɛ la potɔpa, ge a kelehe tontɔɔdoma sohoga mɛ. 30Nini behega nyeeŋɔ boe la suunren te yelesonɛ mɔɔlegɔ kpɛmeha nɛra iŋa. 31Tobese'ere n kelehe yam kan'aŋɔ wan pa'ahɛ yamdoma poan. 32Sɛba n ka to'ore kan'aŋɔ lobe la ba mɛŋa bahɛ, ge sɛba n to'ore kan'aŋɔ nyɛte la bɔkerɛ. 33Na'ayenɛ zɔɔlom en pa'ale yam, sigehe mɛŋa n yia ge nyɛ' na'ahegɔ.

will be added

X\