Magaha 14

1Yam pɔka mɛte la ka yire, ge pɔgɔ gerego mɛŋa nu'o n gbi'ire ka yire baha. 2Sɛba n kene tontɔɔ zote Na'ayenɛ mɛ, ge pimpimdaana ka zote Yenɛ, 3Gerego yetɔgom dela kafɛɛbega fɛɛbera en, ge tontɔɔdaana yetɔgom faanre en, baha mɛ. 4Nii n ka boe zen'an la, naŋdene la ka tare dɛngerɔ, ge nii koore i n ko zen'en la, dia gan' la yoo. 5Aze'elenyɛdaana yelemɛŋɛrɛ ka parone ge se'em n dagɛ yelemɛŋɛrɛdaana kɔ'ɔn ogora la ponpɔrɔŋɔ ma'an. 6Se'em kɛhere nɛreba eere yam ge bo ka boe, ge se'em n tare bɔkere, yam ka kpeem bo en. 7Da zɛ'a la gerego, ge ho kan nyɛ yam yelehom a zen'an. 8Yam wan pa'ale yehegerɛ doma la sore te ba doohe, ge geto la yɛ'a la pa'ahegɔ poan. 9Geto kɛhere lebehe yɔ' bo'olom mɛ, ge Na'ayenɛ to'ore yelemɛŋɛrɛdoma mɛ. 10Nɛra mɛŋa mi' a sunsagaŋɔ en ane se'em, nɛra ka ta'an baŋɛ ayema popeelom. 11Potɔya yire wan sagom, ge tontɔɔdaana sogorɛ wan tara la pa'ahegɔ. 12Sore boe mɛ ana soŋa bɔ'ɔra nɛra, ge de ba'ahegɔ dela kum. 13Nɛra ta'an la'ara ge te a suunre sagom, te nyeeŋɔ ba'ahegɔ dɛna too. 14Ŋmɛlemadoma to'ore la ba ŋmɛlema yɔɔrɛ, ge nɛresoma wan to'e yɔ'sonɛ. 15Yam pɔ'ɔlom daana sakere sɛla woo mɛ, ge se'em n yehegɛ ne magahɛ a behɛ mɛ. 16Yamdoma behere ba mɛŋa mɛ, ge yɛha ba mɛŋa be'em poan, ge gerego ka maahenɛ ge kɛn'ɛra be'em poan. 17Sunsunya tɔtɔdaana tone la gɔɔnɛ, te se'em n ŋmɛrehe nyɛta yaarɛ. 18Yam pɔ'ɔlom daana n sɔe vaɛ gɔɔnɛ, ge potɛn'ɛrɛ n perɛ la sɛba n yehegɛ. 19Be'em pɔnte la na'ma som nɛŋan, te potɔpa pɔnta na'ma tontɔɔdoma nayahe nɔɔrɛn. 20Naha mɛŋa nɛreba yaɛ mɛ, ge bontateba zɔdoma zo'e mɛ. 21Sɛba n zagahere ba sɔɔnrɔ dela be'emdoma, ge sɛba n tone som bɔ'ɔra nahadoma wan nyɛ' som Na'ayenɛ zen'en. 22Sɛba n maahena be'em la ka bɔregɛ mɛ? Ge etesoŋɔ la yelemɛŋɛrɛdoma n maahenɛ la som. 23Namehegɔ toonɛ woo tare yɔɔrɔ mɛ, ge yetɔgɔwɔgɔrɔ yoo bo'ore la nɔŋɔ. 24Yamdaana muŋa dela tarega, ge gɔɔnɛ n de geto lɔkɔ. 25Aze'elenyɛdaana se'em n tɔgɔre yelemɛŋɛrɛ wan fan' vom bahɛ, ge se'em n parone koohere la nɛra. 26Se'em n zote Na'ayenɛ suunre lo mɛ te a kɔma wan nyɛ sokazen'en. 27Na'ayenɛ zɔɔlom dela vom, te nɛra wan ta'an peɛn kum bɛnregɔ poan. 28Naba tebehom dela nɛreba, ge Nɛreba han kana, nabia boe la yoo. 29Se'em n tan' a sunsunya tara, tare la bɔkerɛ, ge sunsunyiim daana na'ahere la gɔɔnɛ. 30Sunsonɛ daana tare vom mɛ, ge nyuunre daana konba wan pon'ɛ. 31Sɛba n muguhere nahadoma, toore la se'em n maalɛ ba la, ge sɛba ete nahadoma soŋa la na'ahere en mɛ. 32Potɔpa be'em n lubere ba mɛ, ge tontɔɔdoma han ki' ba tare sokazen'en mɛ. 33Yam boe la potɛn'ɛrɛ daana zen'en, ge yam ka pote geto sunya poan. 34Tontɔɔ vom zɛnkere la teŋa, ge be'em dela sagaŋɔ bo se'em woo. 35Yameŋa sɛka n tone soŋa la n nyɛte naba zo'ohogɔ, ge se'em n tone nyanɛ tooma nyɛte la a sunsunya.

will be added

X\