Magaha 13

1Bisɛka n tare yam kelehe a sɔ tobedɔnlegerɛ mɛ, ge nɛre kɛhera ka kelehe tanhega. 2Nɛresoma yetɔgom poan te a nyɛta yelesoma, ge ponpɔrɔŋdoma nɔŋɛ la gbirigereba tona be'em. 3Sɛba n ta'an ba' nɔya tara, gu'ure la ba vom, ge sɛba nɔya n ka ta'an muna sagone la ba mɛhe. 4Zinyanka koŋkoma'ahom tɔgɔre la yoo, ge tontona tegehere a koŋkoma'ahom mɛ soŋa. 5Tontɔɔdaana ka bote ponpɔrɔŋɔ, ge toonfɛn'ɛhadaana tone la tara nyanɛ tooma. 6Tontɔɔvom gu'ure la yelemɛŋɛrɛdaana, ge be'em vom lobere toonfɛn'ɛhadoma. 7Sɛba parom te ba tare mɛ, ge ka tara, te sɛba me parom te ba dela nahadoma, ge tara. 8Bontata ta'an yɔ to'e a vom, ge naha ka gangɛ se'ere. 9Tontɔɔdoma la ane wo nɛɛhom la, ge potɔpa ane wo butolela n kiŋire la. 10Pa'alɛ mɛŋa tare la gbirigere, ge yamdoma kelehe la kan'aŋɔ. 11Zaŋa lɔgɔrɔ wan yeregɛ, ge sebo n lagahere finfiinhe la, to wan ta zo'e, 12Nɛra han tara potɛn'ɛrɛ te sɛla n yeti la eŋɛ ge te la tom la dela ban'an, ge a suunre n bote sɛla han tom, la bo'ore en la vom. 13Sɛba n zagahɛ kan'aŋɔ, boe la namehegɔ poan ge sɛba n sakɛ kan'aŋɔ tare la yɔɔrɛ. 14Yamdaana pa'alegɔ tare la vom, te nɛra wan ta'an peɛn kum bɛnregɔ poan. 15Yam somɔ nyɛte la zo'ohogɔ, ge ponpɔrɔŋdoma sore dela daboto. 16Se'em n wakɛ ete sɛla woo mɛ la yam, ge gerego tone la gere tooma. 17Ho han tom nɛreyaalega, a tare la daaŋɔ, ge ho han tom nɛresoŋɔ a bo'ore la sunpogohom. 18Nɔŋɔ la nyanɛ dela a ka wone kan'ama denɛ, ge se'em n wone tanhega tare la zuo. 19Ho suunre n bote sɛla han tom la bo'ore ho la popeelom, ge gerego ka zahere be'em. 20Se'em n sonhere la yamdoma wan nyɛ yamdaana, ge se'em n naare la geto wan nyɛ namehegɔ. 21Zube'o dole be'emdoma, ge tarega n yɔɔrɛ tontɔɔdoma. 22Etesoŋɔdoma bahere ba kɔma la sɛla pooren, ge potɔpa tarega gan' bo la tontɔɔdoma. 23Naha va'am ta'an maalɛ dia soŋa, ge ŋmɛlema wan wa'ana piie ka keŋɛ. 24Sɛba n bahere kafɛɛbega ka nɔŋɛ ba kɔma, ge sɛba n nɔŋɛ ba kɔma toole mɛ la tobedɔnlegerɛ. 25Tontɔɔdoma kan koŋe ba di', ge potɔpa puya dela voore.

will be added

X\