Magaha 12

1Hom se'em n nɔŋɛ tobedɔnlegerɛ, nɔŋɛ la yam, ge hom se'em n ka bote tanhega dela yaloma. 2Na'ayenɛ zo'ohore la nɛresoma, ge a sagone be'emdoma mɛ. 3Toonfɛn'ɛha ka tare fai, ge tontɔɔdoma nyɛga ba' la bala ka vɔɔnra. 4Pɔgɔ mɛŋka dela a sera muŋa, ge se'em n tare nyanɛ kena na pon'ore la a sera konba. 5Tontɔɔdoma tɛn'ɛhegɔ dela ma'an, ge potɔya kan'aŋɔ dela ponpɔrɔŋɔ. 6Potɔya yetɔgom dela yabega gan'an gura, ge nɛresoma yetɔgom yehere ba mɛ. 7Potɔpa wan lu sagom, ge tontɔɔdaana yire ze' la bala. 8Yam somɔ zuo ta ayema nyɛta yu'urɛ, ge ba ka bote se'em n tare potɛn'gonlema, 9Se'em n sigehe ho mɛŋa ge tara yameŋa nyane hom nam ho mɛŋa ge ka tara wan di. 10Tontɔɔdoma mi' ba duuhe n bote sɛla mɛ, ge potɔpa toonɛ zan'an dela mɛlehegɔ. 11Sɛba n lebegere ba va'am wam kɛ' dia zo'e, ge sɛba n dole yeleyooro ka tare yam. 12Potɔpa pini la potɔɔ, ge tontɔɔdoma nyɛga wan wom dia. 13Be'emdoma nɔɔrɛ n de bɛnregɔ nyɔkera ba, ge tontɔɔdoma peɛnre daaŋɔ poan mɛ. 14Nɛra wan tegɛ la a nɔɔrɛ yetɔgɔsomɔ sebo n wom wɔla la, tontona woo tare a yɔɔrɛ mɛ. 15Geto tɛn'ɛhe te bama ete la soŋa, ge yamdaana kelehe la kan'aŋɔ. 16Geto sunsunyiim ka sogore, ge se'em n tan' a mɛŋa ka dekɛ toorɛ yi sɛla. 17Yelemɛŋɛrɛ daana han pa'ala yele de dela sera, ge aze'elenyɛdaana se'em n parone pan'ahere mɛ. 18Nyabega ane mɛ wo so'a n bote la, ge yamdoma zɛleŋa bo'ore la tebegɔ. 19Se'em n tɔgɔrɛ yelemɛŋɛrɛ la ka ki'ire, ge ponpɔrɔŋɔ ka yuure. 20Pan'ahegɔ boe sɛba n maahene be'em la poan, ge sɛba n kan'aŋɔ sunma'ahom la nyeene mɛ. 21Daaŋɔ ka paare tontɔɔdoma la, ge daaŋɔ ma'an en perɛ potɔpa la. 22Nɔse'ere n parone fɛn'ɛn mɛ Na'ayenɛ nɛŋan, ge Yenɛ nini gan' birikindoma la zuo mɛ. 23Se'em n wekɛ ka tɔgɔrɛ sɛla te a mina la zan'an, ge gerego la mɔɔle gere yetɔgom. 24Se'em nini n mɔ'ɛ la tooma wan sɔna nɛreba behera, ge zenyangedaana wan lebege yameŋa. 25Dabeem lobere la nɛra, ge yetɔgɔsomɔ bo'ore en la nyeeŋɔ. 26Tontɔɔdoma bo'ore ba zɔdoma la kan'aŋɔ soŋɔ, ge potɔpa kan'aŋɔ bahɛ te nɛra n bɔrɔgera. 27Zinyanka kan malom tuure bugum, ge tontona nu'taton tegere la nini. 28Tontɔɔdoma sore tare la vom, ho han dɔla dɛ kum ka boe.

will be added

X\