Magaha 10

1Solomon yetɔgɔbiŋa: Yam bia n bo'ore sɔ nyeema, ge bigɔɔŋɔ bo'ore la ma ɛnregɔ. 2Potolɔgɔrɔ ka tare yɔɔrɔ, ge tontɔɔvom faanre ho la kum poan bahera. 3Na'ayenɛ kan bahɛ te tontɔɔdoma vibe, ge a sagom potɔpa la n mɔ'ɛ nini bote sɛla la zan'an bahɛ. 4Nu'o bɔbɔga bo'ore la nɔŋɔ, ge nu'o seko n tole kan'ahere la lɔgɔrɔ. 5Bia n tone se'a ge lagaha lɔgɔrɔ dela yamdaana, ge nyanɛ n dite bia en ginhe kɛ'a beere. 6Som ma'an n dole tontɔɔdoma, ge potɔpa nɔya kɔn' la too. 7Tontɔɔdoma yu'ura tɛɛnhegɔ dela som, ge potɔpa la yu'ura wan pon'ɛn. 8Se'em n de yamdaana suunre to'ohe la yɛla, ge gɔɔŋɔ la en dole bebela la wan sige sagaŋɔ poan, 9Hom se'em n kinɛ birikinte kine la fai, ge se'em n ŋmɛlene yɛla nɛɛre la peelomen. 10Mumuhugo daana tare la daaŋɔ kena na, ge gɔɔŋɔ la n dole bebela la wan sige sagaŋɔ poan. 11Tontɔɔdaana nɔɔrɛ bule la vom, ge potɔya nɔɔrɛ kɔn' la too. 12Diŋo tare la zaba yɛ'a na, ge nɔŋerɛ pin'ire la tuure woo. 13Se'em n bɔkere yɛla yetɔgom tare la yam, ge kafɛɛbega en sigere la se'em n ka tare yamdaana poore zuo. 14Yamdaana lagahere la potɛn'ɛrɛ, ge gɔɔŋɔ bebelegɔ ve'ere la sagaŋɔ lɛna a mɛŋa na. 15Bontata lɔgɔrɔ dela a sokazen'en, te nɔŋɔ dɛna naha sagaŋɔ. 16Tontɔɔdaana yɔɔrɛ bo'ore en la vom, ge toonfɛn'ɛhadaana yɔɔrɔ dela namehegɔ. 17Hom se'em n to'ohe kan'aŋɔ boe la vom sore zuo, ge se'em n ka to'ore tanhega bahere te nɛreba en bɔrɔgera. 18Ponpɔrɔŋɔ nɔɔrɛ kɔn' la diŋo, te yu'urɛ sagaŋɔ daana dɛna gerego. 19Yetɔgom han ta zɔ'ɔra, be'em ka koŋere bini, ge se'em n tan' a nɔɔrɛ muna n tare yam. 20Tontɔɔdoma zɛleŋa gane sanlenpeelega, ge toonfɛn'ɛha suunre ka tare vɔnrɛ. 21Tontɔɔdaana yetɔgom diihire la nɛrekooŋɔ, ge geto kiiri la gerekum. 22Na'ayenɛ ka'an bo'ore la tarega, a me ka dekere ninbaanlega pa'aha bini. 23Toonbe'ero dela de'eŋɔ bo gerego, bala te yam ana bɔ'ɔra se'em n tare bɔkerɛ. 24Toonfɛn'ɛhadaana paleŋa n ɛngere la sɛla la wan sige ba zuo na, ge tontɔɔdoma suunre n bote sɛla la, ba wan to'e. 25Toonfɛn'ɛhadaana wan tole kalam wo saabeeokeŋɔ n lobe tole la, ge tontɔɔdoma la boe la bala yɛ'ɛha, 26Wo ko'terehegɔ n kete nyɛna se'em, te zun'uhe kpɛnta nini se'em la, zinyangarɛdoma ane la bala ba kpɛ'ɛndoma nɛŋan. 27Na'ayenɛ zɔɔlom pa'ahere la vom woko, ge be'emdoma yuuma ka paare. 28Tontɔɔdoma potɛn'ɛrɛ ba'ahere mɛ la nyeema, ge be'emdoma tɛn'ɛhegɔ bahere la yoo. 29Na'ayenɛ sore la dela seradaana paŋa, ge dɛna be'emdaana sagaŋɔ. 30Tontɔɔdoma ka tare vikire, ge toonfɛn'ɛhadoma la kan bɔna teŋa la poan. 31Tontɔɔdaana nɔɔrɛ tɔgɔre la yam, ge ba wan ŋmaɛ zɛleŋa sɛka n parone bahɛ. 32Tontɔɔdoma nɔya mi' la yetɔgɔsomɔ, ge be'emdoma nɔya mi' la ponpɔrɔŋɔ.

will be added

X\