Afilmõ 1

1Mam Paul se'em te ba pagɛ Yesu Krista zuo la la to sɔɔn Timoti n golehɛ gɔŋɔ wa. To golehɛ bɔ'ɔra la hom to zɔ' Filemon la tomam n lagom tona toyene la. 2To me lagom goleha bɔ'ɔra lagaŋseko lagone ho yire poan po'oha Na'ayenɛ la, la to tanya Appia la Arkipus se'em la tomam n lagom tona toyene la. 3To Sɔ' Na'ayenɛ la to Daana Yesu Krista wan eŋɛ ya som ge bahɛ ya te ya tara sunma'ahom. 4N sɔɔn Filemon, n han ne ta po'oha Na'ayenɛ, n tɛnre ho yele la bala po'oha bɔ'ɔra hɔ. 5Se'ere n sɔe la, n wom hon tare nɔŋerɛ se'em bo Na'ayenɛ nɛreba ge me nam to Daana Yesu se'em. 6N po'ohere daarɛ woo yeti lagaŋɔ seko te to tara la taaba wan bɔkɛ kan'somɔ sebo woo te to tara Yesu Krista poan la. 7N sɔɔn soŋɔ, hon tare nɔŋerɛ se'em la bahɛ mam te n poorɛ pee mɛ ge me soŋɛ mam. Ho eŋɛ Na'ayenɛ nɛreba la woo suunre nyɛlom mɛ. 8Dene poan, n ta'an kan zɔne hɔ dabeem ge yele ne ho sɛla te ho sona te ho eŋɛ wo mam de ho keema Yesu Krista sore dɔlɔga la poan la. 9Ge nɔŋerɛ zuo, n ton sohora ho mɛ. Ge la mam n pon de'a bonkɛka wa te ba pagɛ mam enŋa Yesu Krista zuo wa, n sine ge kelom sohora ho mɛ. 10Bala, n sohora ho yehera n bia to sakerɛ Yesu sore dɔlɔga la poan. Se'ere n sɔe, mam n boe pakadeen la, n bia Onesimus nam Yesu ge me dola en. 11Yia saŋa la, a daa nan ka tare soŋorɛ bo ho. Ge nananawa a nya tare soŋorɛ bo hon la mam mɛ. 12Dene poan, n dekɛ Onesimus se'em te n nɔŋɛ n suunren wa le ta'aha ho na. 13N bote ne te n bahɛ en te a yee bɔna n zen'en wo mam boe pakadeen yelesoma la zuo la. A han yee ne bala a wan sɔe ne hon zen'en soŋora mam. 14Ge dene de se'ere la, n ka bote n pɛnregɛ hɔ te ho soŋɛ mam. Mam wa ton bɔta se'em dela hon han bɔta te ho eŋɛ ba la, la bo la ho mɛŋa zen'en. Bala, n kan eŋɛ sɛla han dagana la hon sakɛ de zuo. 15Ge la ta'an dɛna te, Onesimus daa zɔ' ho zen'en ta bɔna ha la dabeha fiin wa, te hon me han le to'e en, a kɔ'ɔn bɔna la ho Yesu sore dɔlɔga la poan la wuuha. 16Te nananawa, a ka le kɔ'ɔn dɛna la yameŋa ge a gane se'em n de yameŋa te a dela to sɔɔn. Bala, n bote en mɛ la hon me bɔta en gana bala wo n de yameŋa la ho sɔɔn to Daana la poan la. 17Dene poan, ho han dekɛ mam te mam dɛna ho tadaana, ye to'e en soŋa soŋa ho zen'en wo hon wan to'e ne mam soŋa soŋa se'em la. 18Yelese'ere woo te a tue ho bii ho sanse'ere te a tara dekɛ dɛ te de dɛna mam sanɛ. 19Mam mea Paul n dekɛ n nu'o golehɛ kalam wa: mam Paul wan lebehe yɔ' hɔ. Ge hon me mina te ho tare mam sanɛ. Se'ere n sɔe la, mam n soŋɛ hɔ te ho sakɛ bo Yesu. 20Bala, n tadaana, n bene ho mɛ te ho soŋɛ mam dena wa poan. To Daana Yesu zuo, soŋɛ mam te n poorɛ pee wo ho tadaana Yesu Krista sore dɔlɔga poan la. 21Mam mi' soŋa soŋa te ho wan eŋɛ sɛla te n goleha la sohora ho wa. Ge ho wan eŋɛ sɛla n gane bala. 22Ge yelese'ere n ge dela ho behɛ deo biŋe mam. Se'ere n sɔe la, mam tɛn'ɛhɛ soŋa soŋa te Na'ayenɛ wan wom ya po'ohegɔ la ge bahɛ mam te n le bɔna la ya yɛ'ɛha. 23Epapras se'em n lagom bɔna la mam pakadeen Yesu Krista zuo la po'ohere ho na. 24Mark la Aristarkus, la Demas, la Luke me po'ohere ho na. Mam la bama lagom tona mɛ. 25To Daana Yesu Krista wan eŋɛ ya zan'an som.

will be added

X\