Filipi 4

1Bala, n sɔɔnsonɔ wa, n nɔŋɛ ya mɛ ge kɔ'ɔn bɔta te n nyɛ' ya. Ya bahɛ mam te n tara popeelom ge te n me ŋmɛ'ɛra n nyɔn'ɔn ya zuo. Dene poan, n sɔɔnsonɔ, de ya sɛba n wan sɛ' ze'ele ya Na'ayenɛ sore dɔlɔga poan. 2Ge n bene yamam pɔgɔhe seyi' wa, Euodia la Sintike te ya kpeŋe ya mɛhe la ya sakɛ tara nɔyenɛ yɛhera Na'ayenɛ yɛla poan. 3Ge n yeti hon me n zɔ' se'em te n nam wa, te ho soŋɛ pɔgɔhe seyi' wa. Ba lagom tom la mam la Klement, yelesoma mɔɔlegɔ poan la sɛba woo n tone te Yenɛ golehɛ ba yu'ura eŋɛ vom gɔŋɔ la poan la. 4Ya wan tara popeelom daarɛ woo ya bɔŋa poan to daana Yesu sore dɔlɔga poan. N le yele ya te ya tara popeelom. 5De ya sɛba n wan bo'ore ya nɛra woo na'ahegɔ. Te la kan yuue la Na'ayenɛ n lebe na. 6Ge da fabele ya sɛsɛla, ge sohɛ ya Yenɛ ya po'ohegɔ poan sɛla te ya bɔta. Ya sohora en daarɛ woo la popeelom. 7Yenɛ sunma'ahom la n gaŋɛ la asaala bɔkerɛ la, wan bahɛ te ya suunre la ya potɛn'ɛra bɔna ma'an Krista Yesu sore dɔlɔga la poan. 8Ba'ahegɔ poan, n sɔɔnrɔ, de ya sɛba n wan bahɛ te ya potɛn'ɛra kɔ'ɔn tɛn'ɛha la yelese'a n ane soŋa ge nara pɛnka. Yɛla la dela yelese'a n de yelemɛŋɛrɛ ge tara na'ahegɔ ge me dɛna ma'an. Yelese'a la n ka tara dɛngerɔ ge tara nɔŋerɛ, la yelese'a n nare. 9Tare ya sɛla te ya zamehɛ ge nyɛ' mam zen'en wa te la dɛna la n yetɔgom bii n tooma poan, tona. Bala la, Yenɛ se'em n bahere te to tara sunma'ahom la wan bɔna la ya. 10Mam tare popeelom Na'ayenɛ zuo te nananawa, ya le behera mam soŋa soŋa. Mam mi' te ya daa bote ya soŋɛ mam, ge ya daa ka nyɛ' sore. 11Mam n yele ya dena wa dagɛ la n bote la sɛla, ge mam mi' soŋa soŋa te sɛla woo te n tara, la seke mam. 12Mam mi' nɛra n ka tare n ane se'em la nɛra n tare gaŋɛ n ane se'em. Mam ta'an n mɛŋa yele dena wa te sɛla woo te n nyɛta daarɛ woo n tare popeelom. N tegɛ ya wo, n kon dune wo, n nyɛ' zo'e wo n ka nyɛ' zo'e wo. 13Mam wan ta'an sɛla woo eŋɛ doohe Krista paŋa la poan. 14Ge la de yelesonɛ te ya soŋɛ mam la n daanseto te n nyɛta la. 15Mam daa pin'ilom mɔɔlɛ yelesoma la Makedonia teŋhe la poan, ge bahɛ bini la, yamam Filipi teŋa nɛreba mi' soŋa soŋa te yamam ma'an n daa soŋɛ mam. Ge mam la yamam n daa lagom bɔ'ɔra taaba. 16Te sugumnɔɔren zo'e zo'e te n daa bɔta soŋorɛ Tesalonika teŋa poan te ya daa soŋɛ mam na. 17Ge la dagɛ la n kɔ'ɔn bɔta te n tɔ'ɔha la bo'olom, ge la ton dɛna la n bote ya nyɛ' la yɔɔrɔ pa'ahɛ ya etegɔ la poan. 18Nananawa, n tare sɛla woo te n bɔta la te ya dekɛ bo Epaproditus te a tare na bo mam la. Ya bo'olom la ane wo nyɔ'an kaanbegɔ bo'olom n tare nyuŋo soŋɔ te la tegera Yenɛ nini la. 19Bala, Yenɛ se'em n tare sɛla woo a zen'en la wan bo ya sɛla woo n wan soŋɛ ya yɛhera la Krista Yesu poan na. 20Pɛngera ya to Sɔ Na'ayenɛ wuuha wuuha. Taarɛ. 21Ge po'ohɛ ya nɛresɛba woo n dole Krista Yesu sore la. Ge nɛresɛba n dole Yesu sore la bɔna kalam tona la mam wa po'ohere ya na. 22Yenɛ nɛresɛba la zan'an n boe kalam wa po'ohere ya, ge ka yɛta wo nɛresɛba n boe Kaesar yire la poan la. 23Ge Na'ayenɛ Yesu Krista wan eŋɛ ya zan'an som.

will be added

X\